תוכן השאלה
לכבוד דער ראש ישיבה שליט"א,
איך האב געזען אז מוהרא"ש שרייבט אסאך איבער אכטונג געבן צו גיין מיט זויבערע ציצית, די מעשה איז נאר אז אינדערהיים גיי איך אן א רעקל, און עס פאסירט אז די ציצית ווערט פארפלעקט און מען קען נישט רייניגן די ציצית. איך האב געקלערט צו קויפן יעדן חודש א נייע ציצית, אבער עס קאסט מיר צו סאך געלט.
מיין שאלה איז אויב איך זאל ענדערש קויפן נייע ציצית כסדר, אדער קען איך אריינלייגן די ציצית אונטער'ן העמד?
יישר כח
תשובה מאת הראש ישיבה שליט"א:
יום ב' פרשת מטות-מסעי, כ"ה תמוז, שנת תשפ"ה לפרט קטן
לכבוד ... נרו יאיר
גיי מיט די ציצית אויפן העמד. אזוי ווי עס שטייט אין שלחן ערוך (אורח חיים סימן ח, סעיף יא): "עיקר מצוַת טלית קטן ללובשו על בגדיו", די עיקר מצוה איז צו גיין מיט די ציצית אויף די קליידער, "כדי שתמיד יראהו ויזכור המצוות", מען זאל איר שטענדיג זען און געדענקען די מצוות פונעם אייבערשטן. דער מגן אברהם זאגט (סעיף קטן, יג): "ובכתבים, דטלית קטן דווקא תחת בגדיו", עיין שם, פון אריז"ל שטייט מען זאל גיין מיט די ציצית אונטער די קליידער; אבער ביי חסידים האט מען מקפיד געווען אז די ציצית זאל זיין אויפן העמד.
בלייב מיט די ציצית אויפן העמד און געב אכטונג עס זאל נישט ווערן שמוציג.
דער אייבערשטער זאל העלפן זאלסט האבן הצלחה אין אלע ענינים.