תוכן השאלה
לכבוד דער ראש ישיבה שליט"א,
קודם כל א יישר כח פאר די טייערע שיעורים וואס האט אין זיך א געוואלדיגע חן, אפילו ווען איך הער פון אייך איבער די זעלבע זאך נאכאמאל און נאכאמאל, איז עס געשמאק צו הערן, ווי אויך אין די ניגונים פון אמונה קען מען פילן א העכערקייט און אן התעוררות.
אויך וויל איך זיך באדאנקען אויף דעם וואס איך האב אייך געבעטן מתפלל צו זיין פאר מיר, און איך האב ב"ה געזען אסאך גרויסע שינויים לטובה.
מיין שאלה איז יעצט אזוי, איך האב זיך גע'גט און איך וויל זוכן א צווייטע שידוך און מקיים זיין מצות פריה ורביה, איך שפיר אבער אז איך האב נישט כוחות דערצו נאכאמאל זיך אונטערצונעמען א כתובה, ובפרט אז איך דארף נאך אויך אויסהאלטן מיין געוועזענע משפחה, וואס דאס קאסט מיר נאך טייערער ווי ווען מיר זענען געווען צוזאמען.
זאל איך שוין זוכן א פרישע שידוך, כאטש וואס איך בין זייער ענג אין געלט, און איך שפיר נישט אז איך בין שוין גרייט נאכאמאל צו געבן ליבשאפט פאר א פרוי.
איך האף דער ראש ישיבה שליט"א וועט מיר געבן אן עצה וואס צו טון, אויסער די עצות פון תורה און תפלה וואס דאס טו איך שוין, און אויב דער ראש ישיבה שליט"א קען ווייטער מתפלל זיין פאר מיר.
א גרויסן יישר כח, עקיבא
תשובה מאת הראש ישיבה שליט"א:
בעזרת ה' יתברך
יום ג' פרשת לך לך, ז' מר-חשון, שנת תשע"ט לפרט קטן
לכבוד עקיבא נרו יאיר.
איך האב ערהאלטן דיין בריוו.
איך בעט דיר זייער טייערער ברודער: ווארף אוועק דיינע חכמות המדומות. ווי קלוג מיר זאלן נאר זיין זענען מיר נישט קלוגער פון די הייליגע תורה; די תורה זאגט (בראשית ב, יח): "לֹא טוֹב הֱיוֹת הָאָדָם לְבַדּוֹ", עס איז נישט גוט אז א מענטש זאל זיין אליין.
קוק וואס דער הייליגער רבי האט געזאגט ווען ער האט פארלוירן זיין ווייב - ערב שבועות תקס"ז. די חברה קדושה האבן זייער שנעל געמאכט די טהרה און מען האט באוויזן איר צו מקבר זיין נאך פארן זמן אזוי אז דער רבי האט נאך געקענט האלטן אבלות פאר יום טוב, האט דער רבי דעמאלט געזאגט (פעולת הצדיק, סימן תרפו, סעיף קטן מ): "ווען איך זאל מיך נישט שעמען, וואלט איך געהייסן מען זאל מיר שוין אן טראגן א שידוך וויבאלד די תורה זאגט (בראשית ב, יח): "לֹא טוֹב הֱיוֹת הָאָדָם לְבַדּוֹ", עס איז נישט גוט פארן מענטש צו זיין אן א ווייב, דעריבער וויל איך נישט אז תורה זאל מיר אנרופן אז איך בין א 'לֹא טוֹב'".
אודאי זאלסטו נאכאמאל חתונה האבן; דאס אז דו האסט נישט קיין כוחות און דו שפירסט אז דו קענסט נישט געבן קיין ליבשאפט פאר א פרוי, דאס איז ווייל דו ביסט א פלג גוף, און חכמינו זכרונם לברכה זאגן (יבמות סב:): "כָּל אָדָם שֶׁאֵין לוֹ אִשָּׁה שָׁרוּי בְּלֹא שִׂמְחָה, בְּלֹא בְּרָכָה, בְּלֹא טוֹבָה", אז מען האט נישט חתונה האט מען נישט די אלע גוטע זאכן; ווען דו וועסט טרעפן דיין שידוך וועסטו גלייך באקומען פרישע כוחות און דו וועסט ווערן פרייליך.
דו ווילסט נישט אונטער שרייבן א כתובה ווייל דו האסט נישט קיין געלט? אן א ווייב איז נישט דא קיין ברכה אין די געלט און וויפיל געלט דו זאלסט נאר פארדינען וועט נישט זיין אין דעם קיין ברכה, ווייל דער רבי זאגט (ליקוטי מוהר"ן, חלק א', סימן סט): "עִיקָר הָעֲשִׁירוּת בָּאָה בִּזְכוּת הָאִשָּׁה", דער עיקר עשירות קומט בזכות די ווייב; דערפאר אז דו וועסט חתונה האבן און דו וועסט מכבד זיין דיין ווייב וועסטו זוכה זיין צו האבן פרנסה בריווח, דו וועסט קענען אויסהאלטן דיין גאנצע משפחה.