תוכן השאלה
לכבוד דער ראש ישיבה שליט"א,
איך האב געוואלט פרעגן איבער קויפן אינשורענס. דער ראש ישיבה שליט"א זאגט געווענליך אז עס פעלט נישט אויס צו קויפן "לייף אינשורענס", איז די זעלבע אויך ביי "העלט אינשורענס"?
און אויב איז "העלט אינשורענס" יא גוט צו קויפן, וועלכע סארט זאל איך קויפן? די העכסטע אדער איז גענוג א מינימאלע אינשורענס פאליסי?
יעצט צאל איך אסאך געלט פאר "העלט אינשורענס", נאך פון איידער איך בין מקורב געווארן, און איך ווייס נישט ווי אזוי זיך צו פירן מיט דעם היינט.
איך וועל זיך פרייען צו באקומען הדרכה אין דעם ענין.
יישר כח
תשובה מאת הראש ישיבה שליט"א:
יום ד' פרשת ואתחנן, י' מנחם-אב, שנת תשפ"ד לפרט קטן
טייערער ... נרו יאיר
איך האב ערהאלטן דיין בריוו.
לייף אינשורענס איז אן איבריגע זאך, עס פעלט בכלל נישט אויס, אבער העלט אינשורענס - זאגט מוהרא"ש - מוז מען האבן, ווייל חס וחלילה אז מען דארף אנקומען אין שפיטאל, אדער צו א דאקטער - דארף מען האבן דעקונג.
אזוי אויך אינשורענס אויף די דירה, איז אויך א זאך וואס מען דארף מאכן, ווייל חס ושלום אז עס וועט פאסירן א שריפה קען מען אין איין רגע בלייבן בערום ובחוסר כל.
העלט אינשורענס איז נישט קיין חסרון אמונה; מען דארף האבן אמונה און בעטן דעם אייבערשטן מען זאל נישט דארפן אנקומען צו קיין דאקטער, און אזוי אויך פייער אינשורענס איז נישט קיין חסרון אין אמונה; מען דארף האבן אמונה און בעטן דעם אייבערשטן מען זאל קיינמאל נישט דארפן אנקומען צו דעם.
דער אייבערשטער זאל העלפן זאלסט האבן הצלחה אין אלע ענינים.