תוכן השאלה
לכבוד דער ראש ישיבה שליט"א,
ש'כח אייבערשטער אז איך האב זוכה געווען צו באקומען צום זעקסטן מאל א פקדון פונעם אייבערשטן, א טייער ליכטיג אינגעלע, ברוך ה'. דאס איז געקומען באגלייט מיט אסאך תפלות, מיט אסאך מעשה פון תפלה. ש'כח ראש ישיבה שליט"א פאר'ן די לימודים און עצות, פאר די זיסע לעבן, וואס מיר באקומען פון שיעורים און די בריוו.
איך האב געוואלט פרעגן אויב מען קען א נאמען פאר'ן קינד סתם א נאמען וואס די מאמע האט ליב, אדער זאל מען נאר א נאמען געבן נאך א צדיק אדער א זיידע?
יישר כח
תשובה מאת הראש ישיבה שליט"א:
יום ה' פרשת מקץ, כ"ח כסליו, ד' דחנוכה, שנת תשפ"ו לפרט קטן
לכבוד ... נרו יאיר
מזל טוב פאר דיין נייע געבוירענע אינגל, דער אייבערשטער זאל העלפן זאלסט מאכן די ברית אין צייט און אים מגדל זיין לתורה ולחופה ולמעשים טובים.
געב א נאמען אדער נאך א צדיק אדער נאך א זיידע וואס איז געווען א ערליכער איד, געב נישט אבי א נאמען, ווייל אז מען געבט א נאמען נאך א צדיק אדער נאך א זיידע אדער באבע וואס האבן געדינט דעם אייבערשטן - וועט דאס העלפן פארן קינד. אזוי ווי דער הייליגער רבי ר' אלימלך פון ליזענסק זכותו יגן עלינו זאגט (ספר נועם אלימלך, פרשת במדבר), אז א נאמען נאך א צדיק העלפט - "שֶׁיִּהְיֶה גַם כֵּן צַדִּיק", אז דער מענטש זאל אויך זיין א צדיק, "מַחֲמַת שֶׁנִּתְעוֹרֵר הָאוֹר שֶׁל הַצַּדִּיק שֶׁהוּא בָּעוֹלָם הָעֶלְיוֹן", דאס וועקט אויף די ליכטיגקייט פונעם צדיק אויבן אין הימל.
יעדע נאמען קען מען מאכן עס זאל זיך הערן מיט א זיסקייט און א געשמאק, מען קען רופן דעם קינד אויף א וועג אז די מאמע זאל ליב האבן דעם נאמען; מיט שיין רעדן צו די ווייב וועסטו איר קענען איבעררעדן יא צו געבן נעמען פאר די קינדער נאך צדיקים, אדער נאך זיידעס און באבעס וואס האבן זיך מוסר נפש געווען אויפצושטעלן שיינע ערליכע דורות, און דאס וועט משפיע זיין אויף די קינדער זיי זאלן זיין צדיקים.
דער אייבערשטער זאל העלפן זאלסט האבן הצלחה אין אלע ענינים.
א פרייליכן חנוכה.