תוכן השאלה
לכבוד דער ראש ישיבה שליט"א,
איך וואוין דא אין ארץ ישראל, יעדער איז זייער דערשראקן פון די מלחמה, אפשר קען דער ראש ישיבה שליט"א מיר געבן אן עצה נישט צו מורא האבן פון די מלחמה?
יישר כח
תשובה מאת הראש ישיבה שליט"א:
יום ב' פרשת נח, ב' דראש חודש מר-חשון, שנת תשפ"ד לפרט קטן
מרת ... תחי'
איך האב ערהאלטן אייער בריוו.
געבט זיך איבער צום אייבערשטן - וועט איר ניצול ווערן פון די פחדים. חזר'ט זיך אמונה, דער אייבערשטער - ער מאכט אלעס און פירט אלעס. דער הייליגער רבי זאגט (ספר המדות אות מריבה, סימן כא): "כְּשֶׁיֵּשׁ הַכְנָעָה, עַל יְדֵי זֶה אֵין מוֹרָא בְּמִלְחָמָה, כְּאִלּוּ הוּא יוֹשֵׁב בְּמָצוֹר", אז מען האט הכנעה פארן אייבערשטן - דעמאלט האט מען נישט מורא אין צייט פון מלחמה, מען איז אזוי זיכער ביי זיך אזוי ווי מען וואלט ווען געזיצן אין א פעסטונג.
צינדט אן אין שטוב לעבעדיגע מוזיק. דער רבי זאגט (שם אות פחד, סימן יא): "מִי שֶׁיֵּשׁ לוֹ פְּחָדִים, יְזַמֵּר זֶמֶר שֶׁל שִׂמְחָה", ווער עס האט שרעק זאל זינגען לעבעדיגע ניגונים.
דער אייבערשטער זאל העלפן איר זאלט האבן הצלחה אין אלע ענינים.