תוכן השאלה
לכבוד דער ראש ישיבה שליט"א,
איך האב נישט די ווערטער אויסצודרוקן מיין הכרת הטוב צום ראש ישיבה שליט"א וואס באלייכט די אויגן פון טויזנטער אידן מיט די שיין פון הייליגן רבי'ן, און איך האב אויך די זכי' נהנה זיין פון דעם גרויסן אור.
איך ווייס וויפיל דער ראש ישיבה רעדט אזוי סאך איבער אויסגעבן געלט פאר נארישקייטן ביי חתונות, אבער ביי אונזער קהלה האבן אסאך בחורים זיך איינגעקויפט שיינע און טייערע שטריימלעך לויט די היינטיגע מאדעס און איך צווישן זיי.
שבת אינדערפרי קומט מיר אן גאר שווער צו גיין מיט די שטריימל אין שול, ווייל עס ווערט קאליע אום זומער פון די שטארקע זון דא אין ארץ ישראל, און אום ווינטער פון די רעגן. מיין טאטע און מיינע עלטערע ברידער שרייען כסדר אויף מיר אז דאס איז נישט אויסגעהאלטן, נאר די ליידיגייער גייען אזוי, איך שפיר ווי זיי רייסן מיר אראפ.
פון איין זייט וויל איך זיך בייגן צו זיי און יא גיין מיט'ן שטריימל שבת צופרי, אבער פון די אנדערע זייט לאזט מיר נישט מיין הארץ קאליע מאכן מיין שיינע שטריימל. ביטע אויב דער ראש ישיבה קען מיר א עצה געבן.
יישר כח
תשובה מאת הראש ישיבה שליט"א:
בעזרת ה' יתברך
יום ה' פרשת דברים, ז' אב, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
די זאך פון טראגן א שטריימל האט דער הייליגער בעל שם טוב זכותו יגן עלינו מתקן געווען ווען ער האט געזען וואס די פריצים טוען מיט אידישע קינדער, זיי פלעגן נעמען א איד און חוזק מאכן, אים אנטון א הויט פון א חי' און געהייסן טאנצן, די פריצים זענען געזיצן אין קרעטשמע גע'שיכור'ט און געהוליעט, און דער צעבראכענער גלות איד האט געדארפט טאנצן ווען אלע לאכן פון אים; האט דער הייליגער בעל שם טוב זכותו יגן עלינו געמאכט פון דעם א שיינע לבוש פאר שבת קודש.
גיי שבת מיט'ן שטריימל אין שול, אפילו עס ווערט אויסגענוצט; יעדע בגד וואס מען טוט אן ווערט אויסגענוצט, פאר דעם צוועק קויפט מען דאס, עס זאל זיך אויסנוצן; וואס דארפסטו דעם שטריימל אויב דו גייסט נישט מיט דעם, סתם צו האבן א שיינע שטריימל זאלן ליגן אין שטריימל האלטער?
דער עיקר זאלסטו זיך פרייען שבת. דער רבי זאגט (לקוטי מוהר"ן חלק ב', סימן יז): "צָרִיךְ לִזָּהֵר מְאֹד לִהְיוֹת שָׂמֵחַ וְטוֹב לֵב בְּשַׁבָּת", שבת דארף מען זיין זייער פרייליך; זינג און טאנץ מיט דיינע קינדער. ווען קינדער זעען א פרייליכע שטוב שבת - ווילן זיי בלייבן ערליכע אידן; דאס איז דער עיקר, דאס איז וויכטיגער פון אלעמען, וויכטיגער פון א שיינע שטריימל.
דער אייבערשטער זאל העלפן זאלסט האבן הצלחה אין אלע ענינים.