תוכן השאלה
לכבוד דער ראש ישיבה שליט"א,
איך בין נישט קיין תלמיד פון היכל הקודש, איך האב אבער ברוך ה' אסאך קונה געווען פון די שיעורים פונעם ראש ישיבה שליט"א.
איך האב געוואלט פרעגן איבער די נושא פון ברסלב; זייענדיג א סאטמארער אינגערמאן וואס זוכט א רבי, האב איך שוין אסאך מאל געטראכט אריינצוקוקן אין ברסלב, אבער וואו הייב איך אן און וואו ענדיג איך?
איך האב געעפנט א ליקוטי מוהר"ן און איך האב נישט פארשטאנען קיין איין ווארט, מיין שאלה איז וואו קען איך באקומען אן הקדמה צו ברסלב, צו זען און פארשטיין וואס דארט ליגט באהאלטן? אין וועלכע ספר אנצוהויבן און אין וועלכע צו ענדיגן? וואס איז דער מהלך אין די ברסלב'ע ספרים? און אזוי ווייטער.
יישר כח פאר די שיעורים, איך באלעק זיך די פינגער צו הערן פון איינעם וואס האט נישט מורא צו זאגן דעם אמת.
יישר כח
תשובה מאת הראש ישיבה שליט"א:
יום ד' פרשת פקודי, כ"ו אדר, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
הויב אן מיט לערנען די שיחות פון רבי'ן, מאך זיך א שיעור אין שיחות הר"ן און אין ספר חיי מוהר"ן, (הויב אן חיי מוהר"ן חלק ב, דאס וועט דיר זיין גרינגער אין אנהויב). רבי נתן האט געזאגט: "איך האב מער ארויס געהאט דעם רבי'ן פון זיינע שיחות און שמועסן"; דאס וועט דיר זיין גרינגער צו פארשטיין.
אז דו וועסט לערנען די שיחות פון רבי'ן - וועסטו ווערן אן ערליכער איד, אזוי ווי דער רבי האט געזאגט (חיי מוהר"ן, סימן שנח): "מיט יעדע שיחה וואס איך שמועס מיט ענק קענט איר זוכה זיין צו זיין אן ערליכער איד, נישט סתם אן ערליכער איד נאר אן ערליכער איד אזוי ווי איך מיין אן ערליכער איד".
אויך זאלסטו לערנען ליקוטי מוהר"ן, די קלענערע תורות וואס איז גרינגער אין אנהויב צו פארשטיין, אז דו וועסט לערנען ליקוטי מוהר"ן וועסטו אנהויבן בענקען צום אייבערשטן, דו וועסט לעבן מיט תשובה און מעשים טובים. אזוי ווי דער רבי האט געזאגט (חיי מוהר"ן, סימן שמט): "שֶׁיְּכוֹלִין לִהְיוֹת נַעֲשֶׂה בַּעַל תְּשׁוּבָה גָּמוּר עַל יְדֵי לִמּוּד הַסֵּפֶר שֶׁלּוֹ", מען קען ווערן אן אמת'ער בעל תשובה אז מען לערנט ליקוטי מוהר"ן, "וְאָמַר, שֶׁמִּי שֶׁיֵּשֵׁב וְיַעֲסֹק בִּסְפָרָיו רַק בְּלִי קִנְטוּר וְנִצָּחוֹן, וְיִסְתַּכֵּל בּוֹ בֶּאֱמֶת, אָז בְּוַדַּאי יִהְיוּ נִבְקָעִין אֶצְלוֹ כָּל גִּידֵי קַשְׁיוּת לְבָבוֹ, ואמר בזו הלשון: 'סע וועט אים אלע אדערן טרענען'", און ווער עס וועט לערנען זיין ספר מיט אן אמת, וועט זיך אים עפענען אלע פארשטאפטע אָדערן און ער וועט ווערן אן ערליכער איד. אין אנהויב וועסטו אפשר נישט פארשטיין יעדע זאך, זאלסטו זאגן די ווערטער אפילו אן פארשטיין, און ביים סוף - נאך אפאר מאל אריבערגיין דעם ספר הקדוש - וועסטו זוכה זיין צו פארשטיין.
ברסלב איז בכלל נישט קיין סתירה מיט די שיטה פון סאטמער, דער הייליגער רבי זכותו יגן עלינו מסאטמער ברענגט אין זיין הייליגע ספר ויואל משה (מאמר ישוב ארץ ישראל, סימן קנ), אז דער הייליגער רבי האט פאראויס געזען ברוח הקודש די שווערע ביטערע נסיונות פון די היינטיגע טעג, עיקבא דמשיחא, און אז די איינציגסטע וועג געראטעוועט צו ווערן פון די נסיונות איז גיין מיט די וועג פון די תורה אן קיין שום פשרות, בתמימות ופשיטות.
דער אייבערשטער זאל העלפן זאלסט האבן הצלחה אין אלע ענינים.