תוכן השאלה
לכבוד דער ראש ישיבה שליט"א,
קודם א יישר כח פאר אלע התחזקות, סיי די דרשות און סיי די בריוו, מיר זענען מתפלל אז דער ראש ישיבה שליט"א זאל ווייטער קענען ממשיך זיין צו ברענגען אלע אידישע קינדער צום אייבערשטן.
מיין אינגל איז 5 יאר אלט, ער גייט שוין צוויי יאר אין חדר, ער האט אבער א פראבלעם אז ער וויל בשום אופן נישט גיין אין בית הכסא אין חדר.
ביז יעצט פלעגט ער זיין נאר א האלבע טאג אין חדר, איז עס נישט געווען אזא גרויסע פראבלעם, כאטש וואס האט זיך געמאכט צומאל אז ער האט נאס געמאכט אין חדר. אבער יעצט גייט ער שוין אין חדר פאר לענגער, און ס'מאכט זיך אסאך אז ער ווערט נאס אדער ער פארשמירט זיך, און פארשטייט זיך אז דער מלמד שיקט אים ארויס, און ס'איז נישט קיין תכלית אזוי אנצוגיין.
מיר האבן שוין פרובירט אלע סארט וועגן, דער מלמד האט שוין אויך פרובירט, אויך מיט מתנות וכדומה, אבער דערווייל האט גארנישט געהאלפן. אמאל איז מיין ווייב געגאנגען אין חדר צו גיין מיט אים און נאר דעמאלט האט ער מסכים געווען.
מיר זענען מתפלל אסאך אויף דעם, אבער דערווייל זעען מיר נישט קיין ישועה. מ'האט אונז געזאגט זיך צו ווענדן צו מחנכים וואס וועלן אונז אפשר קענען העלפן, אבער דער ראש ישיבה שליט"א איז אונזער אדרעס צו פרעגן וואס מיר קענען טון דערצו.
א גרויסן יישר כח
תשובה מאת הראש ישיבה שליט"א:
בעזרת ה' יתברך
יום א' פרשת פנחס, י"ג תמוז, שנת תש"פ לפרט קטן
לכבוד מיין טייערער ... נרו יאיר.
איך האב ערהאלטן דיין בריוו.
מיט כח וועט איר נישט פועל'ן, עס וועט נאר ווערן ערגער און ערגער; אויב וועסטו האבן סבלנות וועט דאס אריבער גיין.
געב אכטונג ער זאל נישט ווערן פארשעמט; פרוביר צו מאכן צייט יעדן טאג אים צו העלפן. אדער דו אדער דיין ווייב זאלן מאכן א צייט צו קומען אין חדר אים טראגן אין בית הכסא עס זאל אים זיין גרינגער.
מיר האבן געהאט ביי אונז אין תלמוד תורה א קינד מיט'ן זעלבן פראבלעם, ער האט נישט געוואלט גיין אין בית הכסא און עס האט גארנישט געהאלפן, ער האט מסכים געווען צו גיין נאר מיט זיינע עלטערן; די עלטערן פלעגן קומען טאג טעגליך אים העלפן וכו', ביז ער איז ארויסגעקראכן פונעם פראבלעם.
געב אכטונג ער זאל נישט ווערן פארשעמט, ווייל פון דעם וועט ער נישט קענען ארויס קריכן; פון אלע פראבלעמען איז דא א וועג ארויס, אבער אויב א קינד ווערט פארשעמט, מען מאכט חוזק פון אים און מען טשעפעט אים - ווען ער וואקסט אויף וועט אים זיין זייער שווער.
דאנק דעם אייבערשטן אויף די גרויסע נסים וואס ער טוט מיט דיר - וועסטו זען גרויסע ישועות.
דער אייבערשטער זאל העלפן זאלסט האבן הצלחה אין אלע ענינים.