תוכן השאלה
לכבוד דער ראש ישיבה שליט"א,
פאר עטליכע חדשים צוריק איז פארשוואונדען געווארן א קליין מיידל דא אין שטאט, און ביז יעצט ווייסט מען נאכנישט וואו זי איז. און זייט דעמאלט האט מיין ווייב ממש מורא ארויסצוגיין פון הויז, אפשר וועט זי אויך ערגעץ וואו פארשוואונדען ווערן. זי האלט מיר אין איין פרעגן אויב עס זענען דא שדים און רוחות.
זי לעבט ממש מיט געפערליכע פחדים, ווען זי האט געדארפט עפעס ארויפברענגען פון אונטן, איז זי צוריק געקומען ממש ווייס און דערשראקן, מורא האבנדיג אז די רוחות וועלן איר פארכאפן.
וואס קען איך איר זאגן? ווי אזוי קען איך איר בארואיגן?
יישר כח
תשובה מאת הראש ישיבה שליט"א:
בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן
לכבוד ... נרו יאיר
איך האב ערהאלטן דיין בריוו.
זע מען זאל מקפיד זיין ביי דיר אין שטוב זיך צו וואשן אינדערפרי גלייך ווען מען שטייט אויף - נעגל וואסער; דאס פארטרייבט די קליפות פון שטוב.
אויך זאל דיין ווייב זאגן יעדן טאג תהילים, ובעיקר זאל זי זאגן שבת תהילים; זאגן תהילים נעמט אוועק אלע בייזע רוחות. אזוי ווי מיר געפינען, חכמינו זכרונם לברכה זאגן (מדרש שוחר טוב א, ח) דוד המלך האט געבעטן דעם אייבערשטן, ווער עס זאגט תהילים זאל דאס זיין חשוב אזוי ווי מען לערנט מסכת נגעים און מסכת אהלות; וואס עפעס די צוויי מסכתות? ווייל ווען מען זאגט תהילים נעמט מען אראפ פון זיך אלע קרעץ, און אלע טומאות, אלע רוחות - גייען אוועק.
דער אייבערשטער זאל העלפן זאלסט האבן הצלחה אין אלע ענינים.