תוכן השאלה
לכבוד דער ראש ישיבה שליט"א,
קודם וויל איך געבן א גרויסן יישר כח פאר'ן ראש ישיבה שליט"א פאר די שיעורים וואס זענען מיר אזוי שטארק מחזק.
איך האב געוואלט פרעגן איבער דעם וואס דער ראש ישיבה שליט"א זאגט אלץ ביי די שיעורים, ווען מען רעדט פון התבודדות, אז מען דארף זיך אויסגיסן דאס הארץ צום אייבערשטן פונקט אזוי ווי מען שמועסט זיך אויס מיט א גוטער חבר, וויל איך פרעגן אזוי ווי איך בין א מענטש וואס קען רעדן און פארברענגען מיט מענטשן אויף כל מיני זאכן אפילו פאר שעות, ווען עס קומט אבער צו אייגענע זאכן, פריוואטע זאכן פון מיין לעבן, ווער איך פארמאכט און איך געב גארנישט ארויס, עס איז כמעט אוממעגליך אז איינער זאל זיך דערוויסן פריוואטע זאכן פון מיר דורך מיר; ווי אזוי קען איך גיין התבודדות ווען איך ווייס נישט ווי אזוי ארויסצוגעבן פריוואטע זאכן פון מיין הארץ צום מויל.
א גרויסן יישר כח פאר אלעס, איך וועל זיך זייער שטארק פרייען צו באקומען א תשובה.
יישר כח
תשובה מאת הראש ישיבה שליט"א:
יום א' פרשת נח, א' דראש חודש מרחשון, שנת תשפ"ז לפרט קטן
איך וואלט דיר גע'עצה'ט זאלסט דאס אליינס אויסשמועסן מיטן אייבערשטן, זאלסט מאכן פון דעם אליינס א תפילה. ווייל דער הייליגער רבי זאגט (לקוטי מוהר"ן חלק ב, סימן כה), אויב מען האט נישט קיין ווערטער וואס ארויס צו רעדן ביי התבודדות, זאל מען פון דעם אליינס מאכן א שמועס און א געבעט; ביז דער אייבערשטער וועט דיר העלפן דו וועסט זיך קענען עפענען דיין הארץ, אים אלעס דערציילן און אויסזאגן.
אויך זאלסטו וויסן אז אפילו ווען מען זעט ווי די מויל איז פארקלאפט און פאר האקט, מען וויל רעדן אבער די מויל עפנט זיך נישט - דאס איז אויך גוט, דער רבי זאגט (שם): "זֶה בְּעַצְמוֹ גַם כֵּן טוֹב מְאֹד", דאס אליין איז אויך זייער גוט.
העיקר זאלסטו יעדן טאג גיין אין א שטילע פלאץ און בעט אויף די זאך, אז דו זאלסט זיך קענען עפענען פארן אייבערשטן, אים דערציילן יעדע זאך, ובעיקר ווי שטארק דו ווילסט זיין אן ערליכער איד און עס גייט נישט, דער יצר הרע קומט יעדן טאג מיט נייע מעשיות און דרייט ארום מיט דיר, אבי דיך אוועק צו נעמען פונעם אייבערשטן, און מיט די צייט וועסטו זען אז דו וועסט זיך קענען עפענען דיין הארץ, דו וועסט קענען דערציילן אלעס, אפילו פריוואטע זאכן וואס האט נאר מיט דיר.
דער אייבערשטער זאל העלפן זאלסט האבן הצלחה אין אלע ענינים.
א גוטן חודש.