תוכן השאלה
לכבוד דער ראש ישיבה שליט"א,
יישר כח פאר'ן מיר עפענען די אויגן צו זען און שפירן אז דער יצר הרע וויל מיר נאך מאכן טרויעריג, ער וויל מיר אוועקנעמען די שמחת החיים, ער מאכט אז איך זאל נאר זען יעדע זאך שלעכט, און איך האף אז דער אייבערשטער וועט מיר העלפן צו קענען זען דאס גוטס אין לעבן, איך זאל לעבן מיט'ן אמת.
איך וויל פרעגן אן אנדערע זאך וואס ליגט מיר אויפ'ן הארץ, און מאכט מיר שווער אויפ'ן הארץ טאג טעגליך. ווען איך בין אויפגעוואקסן האב איך באקומען זייער ווייניג ליבשאפט פון מיין מאמע, איך האב קיינמאל נישט געשפירט אז מיין מאמע זאל מיר טראסטן, אז מיין מאמע זאל האלטן עפעס פון מיר אדער פון מיינע געשוויסטער, עס איז כסדר געווען קריטיק און געשרייען, כמעט קיינמאל נישט באקומען א גוט ווארט, און אזוי ווייטער.
יעצט בין איך שוין א מאמע ברוך ה', און מיין מאן איז יא אויפגעוואקסן אין א געזונטע שטוב, געלויבט דעם אייבערשטן, געדענק איך גוט זיכער צו מאכן אז מיינע קינדער זאלן יא באקומען ליבשאפט, זיי זאלן שפירן אז מען האלט פון זיי און אז מען טראסט זיי, ש'כח אייבערשטער אז אונזער משפחה לעבט אין א געזונטע פרייליכע געשמאקע שטוב.
פון די אנדערע זייט האלט איך אבער אין איין צוריק טראכטן פון מיין יוגנט, איך באקום נאכאלץ קריטיק פון מיין מאמע, און איך האב זייער א שווערע און ביטערע הארץ אויף איר, איך שפיר אז איך האב אין זיך אסאך אומגענוצטע טאלאנטן, נאר אזוי ווי מיין זעלבסט זיכערקייט איז אזוי אראפגעקלאפט געווארן אלס קינד, דעריבער האב איך קיינמאל נישט געקענט ארויסברענגען מיינע טאלאנטן. איך ווייס און איך גלייב אז אלעס איז באשערט פון הימל, אבער די שווערע ווייטאג בליעט נאכאלץ אין מיין הארץ מיט פולסטן שטארקייט.
ווי אזוי קען איך ווייטער אנגיין אין לעבן, און אננעמען אלעס באהבה, נישט זיין אלץ אנגעלייגט מיט ווייטאג אין הארץ? און ווי אזוי קען איך ארבעטן אויף מיין צעשאסענע און צעבראכענע זעלבסט זיכערקייט?
יישר כח
תשובה מאת הראש ישיבה שליט"א:
ערב שבת קודש פרשת עקב, י"ז מנחם-אב, שנת תשפ"ו לפרט קטן
מרת ... תחי'
איך האב ערהאלטן אייער בריוו.
עס איז זייער ווייטאגליך ווען קינדער גייען אריבער די זאכן פון די אייגענע עלטערן וכו', מען באקומט נישט קיין ליבשאפט וכו'; עס קלאפט אויס אין די שפעטערע יארן אינעם נפש, השם ישמרינו.
די עצה צו היילן די נפש און אויפבויען די זעלסבט זיכערקייט - איז דורך אמונה, ווי מער מען לייגט זיך אריין אין די אמונה ווערט די נפש געהיילט, (די אלע וואס גייען זיך היילן ביי טעראפי, און אויך ביי פרומע טעראפי; אויב זיי נעמען זייערע מעטאדן פון די גוים - קען דאס נישט היילן די נפש פונעם איד), נאר אמונה היילט; אז מען חזר'ט אמונה, מען חזר'ט אז 'אלעס וואס איך בין אריבער איז פונעם אייבערשטן, אלעס וואס האט פאסירט איז מיט א חשבון, און אויך די ווייטאג, און אויך די פארשעמונג, אלעס אלעס קומט מיט א חשבון, און עס איז זיכער פאר מיין טובה, אפילו עס זעט נישט אויס אזוי'; ווי מער מען חזר'ט דאס - ווערט מען געהיילט.
אמונה באקומט מען דורך התקרבות לצדיקים, ווען מען לערנט די תורות פון צדיק, און אויך פרויען וואס קענען נישט לערנען די טיפע תורות פון רבי'ן, אז זיי לערנען ספרים און קונטרסים וואס זענען געשריבן פון תלמידים פונעם צדיק, ווי די תלמידים ברענגען אראפ אויף מער א פשוט'ע שפראך, א גרינגע שפראך - די עצות און די תורות פון צדיק - איז מען זוכה צו א קלארע לויטערע אמונה; און וואס מער צייט מען הערט די קול פון צדיק - אלץ מער ווערט די נפש אויסגעהיילט, מען באשולדיגט מער נישט קיינעם, מען באשולדיגט נישט די טאטע מאמע, מען באשולדיגט נישט מאן און ווייב; עס ווערט זייער ליכטיג דאס לעבן, מען שפירט זיך ארומגענומען מיטן אייבערשטן.
על כן אז איר ווילט ווערן אויסגעהיילט פון די קינדער יארן וכו' - זאלט איר זיך צוהערן צום קול פון הייליגן רבי'ן, סיי מיט לערנען גרינגע ספרים און קונטרסים וואס מוהרא"ש האט געשריבן פאר אונזער דור, און סיי דורך הערן שיעורים פון רבינ'ס עצות, ביז איר וועט אנהייבן טון די עצות; די עצה פון התבודדות, די עצה פון זוכן אין זיך גוטס, די עצה פון זיך פרייען מיט יעדע גוטע זאך; דאס וועט צוביסלעך היילן אייער נפש, ביז איר וועט צוריק קוקן און נישט קענען פארשטיין וואס האט אייך אמאל בכלל געשטערט פון אייער מאמע, איר וועט זיין געזונט און שטארק פיזיש און גייסטיש.
דער אייבערשטער זאל העלפן איר זאלט האבן הצלחה אין אלע ענינים.
א כתיבה וחתימה טובה.