תוכן השאלה
לכבוד דער ראש ישיבה שליט"א,
איך בין א פרוי וואס איז זיך זייער מחזק מיט די שיעורים, איך פרוביר צו רעדן אסאך צום אייבערשטן און ארבעטן אויף מיינע מדות, אין זכות פון די שיעורים.
דער עיקר בעט איך אסאך דעם אייבערשטן איך זאל זוכה זיין מחנך צו זיין מיינע קינדער אויפ'ן ריכטיגן וועג, זיי זאלן ליב האבן אידישקייט און זיך פירן ווי עס דארף צו זיין מיט שמחה.
מיר האבן א מיידל וואס איז ב"ה זייער קלוג און געראטן, ס'מאכט זיך אבער צומאל וואס זי רעדט געוויסע ווערטער, אדער טוט געוויסע זאכן, וואס פאסט נישט פאר איר, וואס זי האט געזען ביי אנדערע מיידלעך פון קלאס אדער משפחה. איך וויל וויסן די ריכטיגע וועג ווי אזוי דאס צו באהאנדלען, ווי אזוי קען איך איר ערקלערן אז מיר פירן זיך אנדערש, ביי אונז רעדט מען נישט אזוי, און וואס טוט מען מיט די קשיא, "פארוואס זיי מעגן יא און אונז נישט?".
יישר כח
תשובה מאת הראש ישיבה שליט"א:
בעזרת ה' יתברך
יום ב' פרשת במדבר, כ"ח אייר, שנת תשפ"א לפרט קטן
מרת ... תחי'
איך האב ערהאלטן אייער בריוו.
וואויל זענען די עלטערן וואס זענען מחנך די קינדער; עבודת החינוך איז זייער א וויכטיגע זאך.
עס איז א שווערע זאך, עלטערן האבן נישט קיין כח צו ארבעטן שווער מיט די קינדער, מען איז אפגעמאטערט - יעדער איינער מיט זיינע איבערגייאכץ, מען מיינט אז מען וועט שפעטער מחנך זיין, מען טראכט אז מען האט צייט ווען זיי וועלן עלטער ווערן, מען כאפט זיך נישט אז די קינדער וואקסן אונטער און שפעטער ווילן זיי שוין נישט הערן.
אז די קינדער קומען אהיים פון חדר אדער סקול מיט ווערטער וואס זיי האבן געהערט פון אנדערע, דארף מען זיי זאגן: "מען רעדט נישט אזוי"; מען דארף זיי זאגן ווי אזוי צו רעדן איידל. אז זיי פירן זיך אויף ווי אנדערע, זיי מאכן נאך חברים אויף נישט קיין גוטע וועג - דארף מען זיי זאגן איינמאל און נאכאמאל ווי אזוי זיך צו פירן, אז זיי הייבן אן זינגען די ניגון 'פארוואס זיי מעגן און נאר אונז טארן נישט?' טאר מען נישט ווערן פארלוירן, מען דארף נישט ווערן דערשראקן און שוואך און זאגן 'וואס טוט מען דא? וואס ענטפערט מען?' עלטערן דארפן נישט געבן קיין דין וחשבון פאר די קינדער ווי אזוי צו פירן א שטוב; וויי און ביטער איז פאר די וואס פרעגן די קינדער ווי אזוי צו פירן די שטוב, קינדער האבן ליב צו פרובירן באקומען וואס זיי דארפן און זיי האבן נאך אסאך מער ליב ווען זיי האבן עלטערן וואס ווייסן וואס זיי ווילן און זענען זיי מחנך אויף די גוטע וועג.
בעט דעם אייבערשטן יעדן טאג פאר גוטע קינדער, מען האט געפרעגט דעם הייליגן חתם סופר זכותו יגן עלינו ווי אזוי ער האט זוכה געווען צו אזעלכע גוטע קינדער, האט דער הייליגער חתם סופר געענטפערט: "יעדע נאכט בשעת איך האב געזאגט תיקון חצות האב איך אנגעפילט א כוס מיט טרערן, איך האב געבעטן פאר גוטע קינדער"; דאס איז דער וועג ווי אזוי מען איז זוכה צו ערליכע דורות.
בשעת איר טוט א מצוה, איר שיידט אפ חלה, איר צינד די שבת ליכט און אנדערע מצוות - זאלט איר שטענדיג בעטן פאר די קינדער זיי זאלן אויפוואקסן ערליכע אידן, איר זאלט זוכה זיין צו קינדער וואס וועלן זיין גרויסע צדיקים.
דער אייבערשטער זאל העלפן איר זאלט האבן הצלחה אין אלע ענינים.