תוכן השאלה
לכבוד דער ראש ישיבה שליט"א,
איך האב געוואלט פרעגן אויב דער ראש ישיבה שליט"א האט אן עצה צו שנעל פארגעסן ווען איינער געבט מיר א טשעפע בשוגג אדער במזיד, און נישט יעדע מאל ווען איך זע יענעם זאל איך נאכמאל געדענקען וואס יענער האט מיך געטשעפעט?
יישר כח
תשובה מאת הראש ישיבה שליט"א:
יום ג' פרשת שמיני, כ"ד ניסן, ט' לעומר, שנת תשפ"ה לפרט קטן
... נרו יאיר
איך האב ערהאלטן דיין בריוו.
ווען דו ליינסט קריאת שמע שעל המיטה זאלסטו זאגן: "רִבּוֹנוֹ שֶׁל עוֹלָם, הֲרֵינִי מוֹחֵל לְכָל מִי שֶׁהִכְעִיס וְהִקְנִיט אוֹתִי אוֹ שֶׁחָטָא כְּנֶגְדִּי, בֵּין בְּגוּפִי בֵּין בְּמָמוֹנִי בֵּין בִּכְבוֹדִי בֵּין בְּכָל אֲשֶׁר לִי, בֵּין בְּאוֹנֶס בֵּין בְּרָצוֹן, בֵּין בְּשׁוֹגֵג בֵּין בְּמֵזִיד, בֵּין בְּדִבּוּר בֵּין בְּמַעֲשֶׂה".
דער מקור פון דעם איז פון הייליגן זוהר (פרשת מקץ, דף רא:), וואו עס ווערט דערציילט, דער הייליגער תנא רבי אבא איז אמאל געזיצן ביים אריינגאנג פון די שטאט לוד, ער האט געזען איינעם אנקומען זייער אפגעמאטערט, דער איד האט זיך אראפגעזעצט זיך אפצורוען און ער האט איינגעדרימלט. ווען דער איד איז דארט געשלאפן באמערקט רבי אבא ווי א שלאנג קריכט צום מענטש און איידער דער שלאנג האט געקענט אנקומען צום מענטש איז אראפגעפאלן א צווייג אויף אים און אזוי איז די שלאנג גע'הרג'עט געווארן, און ווען דער איד האט זיך אויפגעוועקט און געזען די טויטע שלאנג האט זיך דער איד אויפגעשטעלט און זיך אוועק געריקט פון זיין פלאץ וואו ער איז געשלאפן און פינקט א סעקונדע דערויף איז אראפגעפאלן די גאנצע שטיקל ערד וואו דער איד איז פריער דארט געשלאפן.
רבי אבא האט דא געזען אז דער איד איז צוויי מאל געראטעוועט געווארן פון א זיכערע טויט, איז רבי אבא צוגעגאנגען צו דעם איד און אים געפרעגט: זאגט מיר, ווער זענט איר און וואס זענען אייערע מעשים אז דער אייבערשטער האט מיט אייך געטון צוויי גרויסע נסים?" זאגט דער איד: "נישטא קיין מענטש אויף די וועלט וואס האט מיר געטון עפעס שלעכט וואס איך זאל אים נישט מוחל זיין און אים איבערבעטן, און אויב בין איך נישט מצליח צו טרעפן דעם מענטש וואס האט מיר געטון שלעכטס, בין איך נישט אריין אין בעט שלאפן ביינאכט איידער איך האב אים מוחל געווען", האט רבי אבא געוויינט און געזאגט: "יעצט זע איך אז דו ביסט ווערד אז דער אייבערשטער האט געטון מיט דיר נסים".
חזר זיך אמונה, חזר זיך די ווערטער: 'עס איז נישט דער, עס איז נישט יענער, דאס וואס איך בין אריבער איז פאר מיין טובה, און אז עס טוט וויי איז דאס אויך פאר מיין טובה', און בעט דעם אייבערשטן דו זאלסט ליב האבן יעדן איינעם און קענען יעדן איינעם מוחל זיין.
דער אייבערשטער זאל העלפן זאלסט האבן הצלחה אין אלע ענינים.