תוכן השאלה
לכבוד דער ראש ישיבה שליט"א,
איך האב געלערנט אין שיחות הר"ן (סימן כ"ו), "גם בני אדם השומעים התורה של הצדיק האמת ואינם מבינים אותה, לעתיד בעולם הבא יבינו, כי עיקר התורה היא להנשמות", אז מענטשן וואס הערן די תורה פונעם צדיק האמת און זיי פארשטייען עס נישט, וועלן עס פארשטיין אויף יענע וועלט, ווייל די עיקר תורה ווערט געזאגט פאר די נשמות.
וואונדער איך זיך, אין היכל הקודש לערנט מען דאך אויס אז יעדע זאך וואס דער צדיק זאגט איז לעובדא ולמעשה, צו וויסן וואס מען האט צו טון אויף דער וועלט, איז וואס איז פשט פון הערן תורה פון א צדיק וואס מען פארשטייט נישט? די תורה פונעם צדיק איז דאך לעובדא ולמעשה?
נאך א זאך וואס איך האב געוואלט פרעגן, ווי מער איך גיי אריין אין די זאך פון אמונה, איך פרוביר צו לעבן מיט'ן אייבערשטן, מאכן התבודדות און דאנקען דעם באשעפער, זע איך ווי דאס זיין אזוי שטארק צוגעבינדן צום אייבערשטן, ברענגט מיר אסאך מאל אן אומאנגענעמע געפיל.
למשל, ווען ס'איז א שווערע וועטער, ס'רעגנט, אז מ'לעבט מיט א שטארקע אמונה ווייסט מען אז די רעגן קומט פונעם אייבערשטן, נישט סתם ס'איז א טבע, קען מען חס ושלום ווערן ברוגז, פארוואס רעגנט אזוי סאך? פארוואס מאכט דער אייבערשטער אז די רעגן זאל מאכן אזוי נערוועז?
אדער ביי אנדערע נישט בא'טעמ'טע זאכן אין לעבן, טאקע ווייל מ'לעבט מיט אמונה, שפירט מען מער אז די שוועריקייטן קומען גלייך פון אייבערשטן, מען פילט ווי דער אייבערשטער מאכט מיר די שוועריקייטן, און אזוי ווייטער, קען מען ווערן מער טרויעריג.
ווי אזוי קען מען מאכן אז אפילו מען איז מכיר אז אלעס קומט פונעם אייבערשטן, זאל מען זיך קענען האלטן אין די ראמען און נישט ווערן ברוגז פון שוועריקייטן אין לעבן?
יישר כח
תשובה מאת הראש ישיבה שליט"א:
יום ג' פרשת שופטים, א' דראש חודש אלול, שנת תשפ"ד לפרט קטן
לכבוד ... נרו יאיר
איך האב ערהאלטן דיין בריוו.
דער הייליגער רבי זאגט (לקוטי מוהר"ן חלק ב', סימן נב), דאס וואס עס איז דא קשיות אויפן אייבערשטן - אזוי דארף צו זיין, "וְכָךְ נָאֶה וְיָפֶה לוֹ" און דאס איז די שיינקייט פונעם אייבערשטן, ווייל אויב מיר וואלטן אלעס פארשטאנען וואלט דאך געווען זיין שכל אזוי ווי אונזער שכל, חס ושלום, דאס איז דער שיינקייט פונעם אייבערשטן, אז מיר ווייסן נישט און מיר פארשטייען נישט, און דער רבי האט אויסגעפירט: "וואויל איז דעם וואס האט נישט קיין קשיות אויפן אייבערשטן".
יעדע קשיא אויף די אמונה, יעדע פארוואס אויף וואס פאסירט - איז א קליפה; עס שטייט (תהלים קטו, ב): "לָמָה יֹאמְרוּ הַגּוֹיִם", זאגט מוהרא"ש: "לָמָה, יֹאמְרוּ הַגּוֹיִם", א גוי זאגט אויף יעדע זאך וואס גייט אים נישט אזוי ווי וויל, 'פארוואס?' ער ווערט נערוועז פון זאכן וואס גייען קעגן זיין ווילן, להבדיל א איד, פרעגט נישט קיין קשיות, א איד גלייבט אז דער אייבערשטער פירט די וועלט מיט א פינקטליכקייט בצדק ובמשפט.
איך בעט דיר זייער זאלסט חזר'ן די אמונה, חזר זיך אז וואס דער אייבערשטער טוט - איז גוט, מען קען נישט מאכן אנדערש, מען קען נישט מאכן פארקערט, מיר פארשטייען נישט בעסער, מיר ווייסן נישט וואס איז די סודות פון די בריאה, מיר דארפן נאר חזר'ן "כל מה דעביד רחמנא" אלעס וואס דער אייבערשטער טוט – "לטב עביד" איז צום גוטן.
מאך זיך א שיעור אין ספר הקדוש אשר בנחל - וועסטו אנהויבן שפירן דעם אייבערשטן, וועסט זען די שיינקייט פון די בריאה, ווי שיין דער אייבערשטער פירט אלעס, וועסט שפירן טעם עולם הבא.
דער אייבערשטער זאל העלפן זאלסט האבן הצלחה אין אלע ענינים.
א גוטן חודש און א
גוט געבענטשט יאר.