תוכן השאלה
לכבוד דער ראש ישיבה שליט"א,
מיין מאמע רעדט מיט אסאך שדכנים, מ'טראגט אן שידוכים, אבער זי פאדערט אז מ'זאל זיך אפשערן און טראגן א שייטל, און ס'איז דא אסאך וואס ווילן נישט זיך אפשערן, אדער אזעלכע וואס טראגן א טיכל וכדומה, און זי וויל נישט הערן פון די אלע זאכן.
איך ווייס נישט וואס צו טון, איך פון מיין זייט אינטערעסירט מיר נישט ווי אזוי זי זאל גיין אנגעטון, אבער מיין מאמע עקשנ'ט זיך אז ס'פאסט נישט. דערפאר וויל איך פרעגן, איך מצידי, וואס דארף איך פאדערן? מעג איך הערן א שידוך וואס שערט זיך נישט?
איך בעט דער ראש ישיבה זאל מיר ענטפערן, איך וויל וויסן וואס צו טון, זי וויל אפילו נישט אנהויבן הערן ווען עס רעדט זיך פון אזא סארט שידוך.
יישר כח
תשובה מאת הראש ישיבה שליט"א:
בעזרת ה' יתברך
יום א' לסדר כי תבוא לאומאן, י"ד אלול, שנת תשפ"א לפרט קטן
לכבוד ... נרו יאיר, ירושלים
איך האב ערהאלטן דיין בריוו.
האסט א קלוגע ערליכע מאמע; גערעכט איז זי אז זי וויל נישט אויסהערן פאר א שידוך א מיידל וואס שערט זיך נישט אפ די האר נאך די חתונה.
דאנק דעם אייבערשטן אז דו האסט א ערליכע מאמע, אז דו קומסט פון א הייליגע שטוב.
דער אייבערשטער זאל דיר העלפן זאלסט טרעפן אן ערליכע וואוילע שידוך, א בא'שער'טע שידוך, א שידוך וואס די כלה וועט זיך שערן; אין אידיש איז בא'שער'ט די זעלבע ווי שערן.
א כתיבה וחתימה טובה, א גוט געבענטשט יאר.