תוכן השאלה
לכבוד דער ראש ישיבה שליט"א,
קודם דארף איך זיך באדאנקען פאר'ן ראש ישיבה שליט"א, ווייל די וואך האט מיר מיין ברודער געזאגט אז א צווייטער ברודער גנב'ט געלט פון מיין טאטנ'ס אקאונט און ער מאכט אים הארץ ווייטאג, און מען דארף יעצט אפהאבן מיט אים, און ווייל איך האב פארדעם געזען א בריוו פונעם ראש ישיבה שליט"א איבער גארנישט צו האבן צוטון מיט קיין מחלוקת, אפילו ווען עס זעט אויס לשם שמים, דעריבער האב איך זיך בכלל נישט וויסנדיג מאכן פון דעם.
יעצט צו מיין שאלה, איך האב געהערט ביי א שיעור ווי דער ראש ישיבה שליט"א רעדט פון די גרויסקייט פון גיין צו א ציון פון צדיק, סיי צו מתפלל זיין און סיי צו לערנען די שיעורים, לכבוד דעם בין איך געגאנגען צוויי מאל צום ציון פון הרה"ק מסאטמאר זי"ע אין קרית יואל און איך האב דארט געלערנט מיינע שיעורים, איך ווייס נישט פארוואס אבער אינמיטן לערנען איז אריינגעקומען אין מיר א מורא'דיגע ווארעמקייט און איך האב זיך געקענט גוט אויסרעדן מיין גאנצע הארץ צום אויבערשטן, אבער למעשה בין איך מער נישט צוריקגעגאנגען ווייל עס איז מיר זייער אומבאקוועם ווען עס קומען און גייען מענטשן און עס איז זייער אויפפאלנד ווען א אינגערמאן זיצט מיט א הויפן ספרים און לערנט דארט, עס קוקט נישט אויס ווי א נארמאלע זאך, און אויך איז דא ווייניג פלאץ צו זיצן; וויל איך וויסן אויב איך קען זיצן אין מיין קאר נעבן דעם בית החיים און דארט לערנען מיינע שיעורים, אויב עס איז די זעלבע ווי ווען מען זיצט ביים ציון?
יישר כח
תשובה מאת הראש ישיבה שליט"א:
מוצאי שבת קודש פרשת וישלח, י"ד כסליו, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
עס איז זייער א גרויסע זאך צו גיין צו קברי צדיקים מתפלל זיין. דער רבי זאגט (ספר המדות אות צדיק, סימן קעג): "עַל יְדֵי הִשְׁתַּטְּחוּת עַל קִבְרֵי הַצַּדִּיקִים, הַקָּדוֹשׁ בָּרוּךְ הוּא עוֹשֶׂה לוֹ טוֹבוֹת, אַף עַל פִּי שֶׁאֵינוֹ רָאוּי לְכָךְ", ביי קברי צדיקים ווערן אנגענומען די תפילות אפילו דער מענטש איז נישט ווערד מען זאל אויסהערן זיין געבעט; דערפאר איז א גרויסע זאך - סיי פאר מענער, סיי פאר פרויען - צו גיין צו קברי צדיקים און בעטן דעם אייבערשטן אז בזכות די צדיקים זאל מען זען ישועות.
דיינע שיעורים זאלסטו לערנען אין שטוב אדער אין שול, און ביי קברי צדיקים זאלסטו זאגן תהילים און מתפלל זיין; מיש נישט קיין יוצרות, און טו נישט אינטערעסאנטע זאכן.
דער אייבערשטער זאל העלפן זאלסט האבן הצלחה אין אלע ענינים.