לכבוד דער ראש ישיבה שליט"א,

יישר כח פאר די פילע חיזוק וואס מיר באקומען טאג ביי טאג, שעה ביי שעה, מינוט ביי מינוט, סעקונדע ביי סעקונדע.

איך האב געוואלט בעטן אן עצה מיט חיזוק און הדרכה; יעצט דא אין ארץ ישראל זענען די אראבער זייער צושפילט, זיי שיסן, שטעכן און פירן דורך שרעקליכע טעראר אטאקעס אין פילע פלעצער, אפילו אויף ערליכע אומשולדיגע אידן רחמנא ליצלן.

נעכטן איז געווען א שרעקליכע טעראר אטאקע וואס אן אראבער האט געשאסן אויף אידן אין בני ברק און גע'הרג'ט עטליכע ערליכע אידן רחמנא ליצלן, און איך בין זייער דערשראקן דערפון, איך קען פשוט נישט שלאפן און טון די ארבעט אין שטוב נארמאל,

אזוי ווי מיין מאן ני"ו גייט הפצה און ער שטייט געווענליך אין א געגנט וואס אסאך מאל האט ער זיך שוין אנגעטראפן דארט מיט אראבער. איבעראל זענען דא אראבער, אבער אין גרעסערע פלעצער איז דא מער, און דארט זוכן זיי מער צו שיסן, שפיר איך אז כאטש וואס א מענטש דארף טאקע גלייבן אז וועמען עס איז באשערט צו שטארבן קען דאס פאסירן אין סיי וועלכע פלאץ, אבער עס איז דא א זאך אז א מענטש טאר נישט גיין אין א מקום סכנה, אזוי ווי מ'פארשטייט אז א מענטש טאר זיך נישט שטעלן אינמיטן די גאס ווי אויטאס קענען אים איבערפארן און שעדיגן חס ושלום, און ער וועט זאגן אז אויב עס איז אים באשערט צו שטארבן וועט ער סיי ווי שטארבן, דאס קומט פון א חוסר אמונה, ווייל באמת טאר א מענטש נישט גיין צו א מקום סכנה.

היינט האב איך געבעטן מיין מאן ני"ו ער זאל בלייבן אין שטוב ווייל איך בין נישט געווען מסוגל צו טראכטן צו זיין אליין און נאכדערצו ער זאל זיין דארט.

וויל איך פרעגן וואס איז ריכטיג צו טון איבער דעם, און ספעציעל אין דעם יעצטיגן חודש ווען די אראבער האבן זייער חגא-חודש וואס זיי מאכן געווענליך דעמאלט מערערע טעראר אטאקעס. אפשר זאל מיין מאן ני"ו גיין נאר צו שטיבער, אדער אין שטילערע געגנטער, און אויך אויב מען קען מיר געבן אביסל חיזוק אויף אמונה אין די שווערע צייט.

ברכה והצלחה און גוטע בשורות.

יישר כח