תוכן השאלה
לכבוד דער ראש ישיבה שליט"א,
איך בין א בחור פון דריי און צוואנציג יאר, איך הער אויס אלע שיעורים, איך בין זיך מחי' די שיעורים און עס געבט מיר כח אנצוגיין אין לעבן, יישר כח
אויב שטיי איך אויף נאך חצות, זאל איך דאווענען די גאנצע דאווענען פון אנהויב ביז'ן סוף, אדער נאר א חלק? איך האב געהערט ביי א שיעור אז אפילו מען איז אויפגעשטאנען נאך חצות זאל מען גיין אין שול און דאווענען פון אנהויב ביז'ן סוף, אבער פון די אנדערע זייט האב איך געהערט אז עס קען זיין א ברכה לבטלה.
יישר כח
תשובה מאת הראש ישיבה שליט"א:
יום ד' פרשת נשא, ח' סיון, אסרו חג, שנת תשפ"ה לפרט קטן
... נרו יאיר
איך האב ערהאלטן דיין בריוו.
עס איז קלאר די הלכה אין שלחן ערוך אז מען קען דאווענען נאר ביז חצות, נאך חצות איז דאס "מעוות לא יכול לתקן", נאך חצות קען מען נישט דאווענען שחרית. אויב איז מען געווען אן אונס דאווענט מען צוויי מאל מנחה, די ערשטע מאל איז פאר מנחה און די צווייטע מאל איז פאר שחרית, און אויב מען איז געווען א מזיד קען מען נישט משלים זיין.
שטופ נישט אפ דאס דאווענען, דאס ערשטע זאך אינדערפרי זאלסטו לויפן אין שול דאווענען. דער רבי זאגט (שיחות הר"ן, סימן לא): "דאווענען איז אזוי גרויס אז מען טאר דאס נישט אפשטופן אויף שפעטער, און אז מען שטופט עס אפ אויף שפעטער - ווער ווייסט צי מען וועט בכלל דאווענען".
דער אייבערשטער זאל העלפן זאלסט האבן הצלחה אין אלע ענינים.