תוכן השאלה
לכבוד דער ראש ישיבה שליט"א,
איך הער זייער אסאך ווי דער ראש ישיבה שליט"א רעדט אז מען טאר נישט האבן קיין סמארטפאון, איך דארף עס אבער האבן צו זען די ברסלב סענטער עפפ, צו זען אלע היכל הקודש נייעס, וויל איך פרעגן צי איך מעג עס האבן?
יישר כח
תשובה מאת הראש ישיבה שליט"א:
יום ה' פרשת בהר-בחוקותי, כ"ד אייר, ל"ט לעומר, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
היכל הקודש נייעס וועסטו טרעפן אין די חומש, אין די פרשת השבוע, און אין די גמרא, אינעם בלאט גמרא וואס מען לערנט יעדן טאג; נאר דאס איז היכל הקודש נייעס, נישטא קיין אנדערע נייעס אין היכל הקודש.
ווארף אוועק דיין סמארטפאן, דארפסט עס נישט האבן. קען זיין יעצט ווען דו ביסט אזוי אריינגעטון אין קוקן נייעס שפירסטו ווי דו דארפסט עס און דו מוזט עס האבן, עס זעט אויס ווי דו וועסט נישט קענען אן דעם, אבער איינמאל דו וועסט עס אוועק ווארפן - וועסטו זיך שפירן ווי אן אויסגעלייזטער מענטש, ווער רעדט נאך אז דו וועסט זוכן די אמת'ע נייעס פון די הייליגע תורה, פון די פרשת השבוע, פון די גמרא, מדרשים - וועסטו זיין אינגאנצן פריי. אזוי ווי חכמינו זכרונם לברכה זאגן (אבות ו, ב): "אֵין לְּךָ בֶּן חוֹרִין", ווער איז פריי? "אֶלָּא מִי שֶׁעוֹסֵק בְּתַלְמוּד תּוֹרָה", נאר דער וואס לערנט תורה.
אזוי אויך זאלסטו נישט אויסהערן קיין האטליינס, הער אויס נאר צדיקים וואס רעדן פון אמונה, פון אייבערשטער.
דער אייבערשטער זאל העלפן זאלסט האבן הצלחה אין אלע ענינים.