תוכן השאלה
לכבוד דער ראש ישיבה שליט"א,
א גרויסן יישר כח פאר די געוואלדיגע שיעורים און חיזוק, דער ראש ישיבה שליט"א איז מיר ממש מחי' כסדר מיט די חיזוק און עצות.
איך ארבעט אליין אין אן אפיס, א גרויס חלק פון טאג זיץ איך ליידיג ווארטנדיג עס זאל אריינקומען נאך ארבעט, מיין שאלה איז צי איך מעג אין די פרייע צייט אויסנוצן פאר מיינע שיעורים? ווייל למעשה באקום איך באצאלט אויפ'ן שעה
א דאנק, כה לחי אין די הייליגע ארבעט.
יישר כח
תשובה מאת הראש ישיבה שליט"א:
יום א' פרשת תצוה, ב' אדר, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
אז דיין בעל הבית צאלט דיר אויפן שעה - טארסטו גארנישט טון אין די שעות.
פרעג דיין בעל הבית וואס ער וויל דו זאלסט טון אין די ליידיגע שעות, אויב דו זאלסט עפעס אנדערש טון אדער אויב דו קענסט דעמאלט לערנען; ווייל אז מען איז פארדינגען אויף די שעה און אויפן טאג - טאר מען נישט טון זייטיגע אייגענע זאכן.
אז דיין בעל הבית זאגט דו קענסט לערנען - זאלסטו זיך מיטנעמען א זעקל ספרים. ברסלב'ע חסידים פלעגן זיך מיטנעמען צו די ארבעט א זעקל ספרים; א חומש'ל, א משניות, א גמרא, א תהילים, און ווען זיי האבן געהאט אן איבריגע מינוט - האבן זיי געלערנט און זיך מתבודד געווען, די גאנצע טאג זייערע איז געווען געפלאכטן און צוגעבינדן מיט לערנען און דאווענען.
דער אייבערשטער זאל העלפן זאלסט האבן הצלחה אין אלע ענינים.