תוכן השאלה
לכבוד דער ראש ישיבה שליט"א,
איך ווייס נישט פארוואס, אבער אזוי איז עס, איך האב נישט קיין שום גדרים מיט קוקן אין א שפיגל, עס איז ביי מיר א געהעריגע מותר'דיגע זאך, און איך וויל פרעגן אויב עס איז אמת אז מען טאר נישט קוקן אין א שפיגל, און אויב מען טאר נישט, אויב איז דא א פאל ווען מען מעג יא קוקן, אדער טאר מען קיינמאל נישט?
איך וויל זיין ערליך, דורך התבודדות הייב איך אן טראכטן זיך צו פארבעסערן מיין יראת שמים.
יישר כח
תשובה מאת הראש ישיבה שליט"א:
יום ב' פרשת אחרי קדושים, ז' אייר, כ"ב לעומר, שנת תשפ"ה לפרט קטן
... נרו יאיר
איך האב ערהאלטן דיין בריוו.
עס איז א קלארע הלכה אין שלחן ערוך (יורה דעה סימן קנו, סעיף ב): "אָסוּר לְאִישׁ לְהִסְתַּכֵּל בְּמַרְאָה", מען טאר נישט קוקן אין שפיגל, נאר פרויען מעגן קוקן אין שפיגל, "מִשּׁוּם לֹא יִלְבַּשׁ גֶּבֶר" אלס די לאו פון לא תלבש, "אֶלָּא אִם כֵּן מִשּׁוּם רְפוּאָה", נאר אויב ער דארף דאס פאר רפואה, "כְּגוֹן שֶׁחוֹשֵׁשׁ בְּעֵינָיו", צום ביישפיל די אויגן טוען וויי און ער דארף קוקן וואס איז אין די אויגן, "אוֹ שֶׁמְּסַפֵּר עַצְמוֹ", אדער אויב מען שערט זיך אליין אפ און מען דארף זען נישט אפשערן די פיאות, "אוֹ אִם מִסְתַּפֵּר מִן הָעוֹבֵד כּוֹכָבִים בֵּינוֹ לְבֵינוֹ". דער רמ"א זאגט: "וְיֵשׁ אוֹמְרִים, הָא דְּאָסוּר לִרְאוֹת בְּמַרְאָה הַיְנוּ דַּוְקָא בְּמָקוֹם דְּאֵין דֶּרֶךְ לִרְאוֹת בְּמַרְאָה רַק נָשִׁים, וְאִית בֵּיהּ מִשּׁוּם לֹא יִלְבַּשׁ גֶּבֶר", עס איז דא א שיטה וואס זאגט אז דער איסור איז נאר אין א פלאץ וואו נאר פרויען קוקן אין שפיגל, נאר דעמאלט איז דא דער איסור פון לא תלבש, "אֲבָל בְּמָקוֹם שֶׁדֶּרֶךְ הָאֲנָשִׁים לִרְאוֹת גַּם כֵּן בְּמַרְאָה, מֻתָּר", אבער אויב דער סדר איז אז אויך מענער קוקן אין שפיגל - מער מען יא.
למעשה איז מען מחמיר נישט צו קוקן, נאר אויב מען דארף עס פאר רפואה פאר די אויגן, אדער פינטלעך וכו'.
שטארק זיך מיט התבודדות און מיט די עצות פון רבי'ן, ביז דו וועסט זוכה זיין אז דו אליין וועסט ווערן א שפיגל. דער רבי זאגט (לקוטי מוהר"ן חלק א' סימן יט, אות ט): "כִּי צָרִיךְ לְזַכֵּךְ אֶת הַפָּנִים", מען דארף זיך אויסלייטערן די פנים, "שֶׁיּוּכַל כָּל אֶחָד לִרְאוֹת אֶת פָּנָיו", אז יעדער איינער זאל קענען זען זיין אייגענע פנים, "בַּפָּנִים שֶׁלּוֹ", ווען מען קוקט אויף דיין פנים, "כְּמוֹ בְּמַרְאָה", אזוי ווי מען קוקט אין א שפיגל, "עַד אֲשֶׁר בְּלֹא תוֹכָחָה וּבְלֹא מוּסָר", אז אפילו מען וועט יענעם נישט זאגן קיין מוסר און קיין שטראף רייד, "יִתְחָרֵט חֲבֵרוֹ תֵּכֶף עַל מַעֲשָׂיו", וועט דער חבר זיינע חרטה האבן אויף זיינע מעשים, "רַק מִמַּה שֶּׁיַּבִּיט בַּפָּנִים שֶׁלּוֹ", נאר פון קוקן אויף זיין פנים, "כִּי עַל יְדֵי שֶׁיַּבִּיט בַּפָּנִים שֶׁלּוֹ", ווייל ווען ער וועט קוקן אויף דיין פנים, "יִרְאֶה אֶת עַצְמוֹ כְּמוֹ בְּמַרְאָה", וועט ער זיך זען אזוי ווי אין א שפיגל, "אֵיךְ פָּנָיו מְשֻׁקָּע בְּחֹשֶׁךְ", ווי פינסטער זיין לעבן איז אים.
הויב אן דיין טאג מיט התבודדות, גיי אין א ווינקל און רעד אויס דיין הארץ, זאג: "הייליגער באשעפער איך וויל אזוי שטארק זיין ערליך, איך וויל זיין הייליג, די קאפ ליגט מיר אין נארישקייטן און איך טו נארישקייטן, העלף מיר איך זאל שוין אפלאזן די נארישקייטן און זיך צוריק קערן צו דיר", לייג צו דיינע אייגענע תפילות, ביז דו וועסט זוכה זיין צו ווערן אליין א שפיגל.
דער אייבערשטער זאל העלפן זאלסט האבן הצלחה אין אלע ענינים.