תוכן השאלה
לכבוד דער ראש ישיבה שליט"א,
איך בין שוין אפגעטיילט פון מיין ווייב פאר א יאר, מיר זענען געווען חתונה געהאט פאר א האלב יאר, ברוך ה' אז מיר האבן נישט קיין קינדער, זי האט ליידער אינגאנצן אפגעלאזט אידישקייט, זי וואוינט מיט הפקירות און דרייט זיך אין שלעכטע פלעצער, און מיר האלטן אינמיטן די פראצעדור פאר א גט, אבער זי איז נישט אינטערעסירט דוקא צו העלפן מיט די פראצעדור, פאר איר איז גוט אזוי אויך, ס'גייט איר גארנישט אן, איך בין אבער געבליבן שטעקן שוין פאר א גאנצע יאר, איך קען נישט זוכן א פרישע שידוך, און איך בין גענצליך צעבראכן פון דעם מצב.
איך ווייס נישט ווי אזוי צו גיין דא ווייטער, און איך וויל וויסן אויב ס'איז ריכטיג מתפלל צו זיין אז מיר זאלן צוריק זיך פאראייניגן טראץ די אלע זאכן, אדער ענדערש מתפלל זיין אז מען זאל קענען פארענדיגן דעם גט און פטור ווערן פון די גאנצע מעשה?
יישר כח
תשובה מאת הראש ישיבה שליט"א:
יום א' פרשת נח, כ"ה תשרי, שנת תשפ"ה לפרט קטן
לכבוד ... נרו יאיר
איך האב געזען דיין בריוו און עס טוט מיר זייער וויי וואס דו מאכסט מיט, דער אייבערשטער זאל רחמנות האבן אויף דיר, זאלסט האבן א ישועה בקרוב.
בעט דעם אייבערשטן ער זאל דיר העלפן, שמועס זיך אויס מיטן אייבערשטן וואס דו גייסט אריבער, אז דו האסט חתונה געהאט און דיין ווייב איז נישט מיט דיר, און ווי שטארק דו ווילסט געהאלפן ווערן, און דאס אליין - ווי אזוי דו זאלסט בעטן - זאלסטו אויך אויסשמועסן מיטן אייבערשטן, בעט: "הייליגער באשעפער העלף מיר, איך וויל נישט זיין אליין, מיין ווייב איז נישט מיט מיר, עס שלעפט זיך אזוי לאנג די גאנצע פרשה מיט די גט; פון איין זייט בעט איך דיר אז זי זאל מסכים זיין צו נעמען א גט, אזוי וועל איך קענען נאכאמאל חתונה האבן, און פון די אנדערע זייט טראכט איך, 'אפשר זאלן מיר זיך נישט גט'ן, אפשר איז מעגליך זי זאל תשובה טון און צוריק קומען צו מיר', איך בין אזוי צעמישט, איך בעט דיר זייער, העלף מיר, שיק מיר א ישועה, צי אזוי צי אזוי - העלף מיר, איך וויל לעבן א חתונה געהאטע לעבן און זוכה זיין צו קינדער בנים ובני בנים עוסקים בתורה ובמצוות".
דו קענסט זיך נישט פארשטעלן די תענוג און נחת רוח וואס מען מאכט אויבן אין הימל ווען א מענטש מיט א צעבראכענע הארץ, מיט א צעבראכענע מוט - קומט צום אייבערשטן, ער וויינט זיך אויס און רעדט זיך אויס זיין הארץ, דער זוהר הקדוש זאגט (פרשת בלק, קצה.) ווען א מענטש וויינט זיך אויס צום אייבערשטן, זאגט דער אייבערשטער: "לֹא בָּעִינָא הָכָא בֵּי דִינָא דִיְדוּנוּן בֵּינָנָא", איך וויל נישט אז בית דין של מעלה זאל זיך אריינמישן ווען דער מענטש קומט מיט זיינע טענות צו מיר, "אָנָא וְהוּא בִּלְחוֹדָנָא", נאר איך וויל זיין אליין מיט דעם מענטש, "וְלֵית תֵּיאוּבְתָּא לְקוּדְשָׁא בְּרִיךְ הוּא", דער אייבערשטער האט נישט קיין גרעסערע פארגעניגן, "אֶלָּא כַּד מְקַבֵּל לוֹן וְאוֹשְׁדוּ קַמֵּיהּ", ווי ווען א מענטש וויינט זיך אויס פאר אים, "דְּהָא כָּל נִטוּרֵי תַּרְעִין לֹא שַׁבְקִין הָכִי לְמֵיְעַל כַּמָה דְשַׁבְקִין לְמִסְכְּנִין", אלע טירן פון הימל זענען אפן פאר א צעבראכענעם מענטש וואס וויינט זיך אויס פארן אייבערשטן, "דְּהָא בְּלֹא רְשׁוּתָא עָאֳלִין", און זיינע תפילות גייען ארויף אן קיין רשות.
מיט די עצה פון רבי'ן, די עצה פון משיח, פון התבודדות ותפילה - וועסטו געהאלפן ווערן און האבן א ישועה.
דער אייבערשטער זאל העלפן זאלסט האבן הצלחה אין אלע ענינים.