תוכן השאלה
לכבוד דער ראש ישיבה שליט"א,
ווי אזוי ווערט מען פטור פון טראכטן אויף יעדן מענטש אז ער טוט חלילה עבירות? אפילו ווען מיינע קינדער שפילן זיך אפאר מינוט צו שטיל, גיי איך שוין קוקן צי זיי שפילן זיך איידל. ווען מיין מיידל שפילט זיך מיט מיין פלימעניק, פינף זעקס יעריגע קינדער, בין איך די גאנצע צייט אנגעצויגן.
איך האב מורא עס זאל נישט שאטן מיינע קינדער'ס צוטרוי פון מיר צו זיי, און בכלל שטערט עס מיר מורא'דיג שטארק, איך וויל ארויסגיין פון דעם אינגאנצן.
איך האף דער ראש ישיבה האט ארויס דעם פראבלעם, כאטש עס איז נישט אינגאנצן ארויסגעברענגט.
יישר כח אויף די כסדר'דיגע חיזוק, בפרט מיט'ן באזוך אין ארץ ישראל.
יישר כח
תשובה מאת הראש ישיבה שליט"א:
יום ה' פרשת בהעלותך, ט"ז סיון, שנת תשפ"ה לפרט קטן
מרת ... תחי'
איך האב ערהאלטן אייער בריוו.
טראכטן אויף יעדן איינעם אז עפעס טויג נישט איז נישט געזונט, און נאכלויפן די קינדער יעדע רגע, יעדע מינוט - איז אויך נישט געזונט, און עס וועט שאטן פאר די קינדער פאר זייער זעלבסטזיכערקייט; ווייל ווי אזוי מען קוקט אויף די קינדער - אזוי וואקסן זיי, און אז די קינדער שפירן ווי די עלטערן זענען נישט רואיג מיט זיי - וואקסן זיי אויף נישט רואיג מיט זיך, און אז די קינדער שפירן ווי די עלטערן האלטן פון זיי און זענען רואיג מיט זיי - וואקסן זיי אויף זייער געזונט.
איך האב געהערט פון מוהרא"ש אז עס איז דא ביי געוויסע פרויען אזא זאך אז זיי געטרויען נישט זייער מאן, זיי לעבן שטענדיג מיט מחשבות 'אפשר קוקט מיין מאן אויף איינעם?' 'אפשר האט ער מיט איינעם?' 'אפשר רעדט ער מיט איינעם?' מוהרא"ש זאגט אויף דעם אז דאס איז א נישט געזונטע זאך, און אזוי אויך מיט קינדער; מען קען נישט טראכטן טאג און נאכט 'וואו זענען די קינדער?' און 'אפשר טוט איינער מיט זיי נישט גוטע זאכן?' דאס איז נישט געזונט.
דערפאר זאלט איר בעטן דעם אייבערשטן עס זאל ארויסגיין די זאך פון אייך, איר זאלט נישט טראכטן טאג און נאכט פון די זאכן, בעטס דעם אייבערשטן צו האבן גוטע אויגן, קוקן אויף יעדן איינעם גוט, און נישט ארום גיין מיט חשדות, און אויך זאלט איר מתפלל זיין אויף שמחה, בעטן דעם אייבערשטן צו זיין פרייליך, ווייל שמחה נעמט אוועק די אלע נישט גוטע מחשבות.
דער אייבערשטער זאל העלפן איר זאלט האבן הצלחה אין אלע ענינים.