תוכן השאלה
לכבוד דער ראש ישיבה שליט"א,
זייט מיין חתונה דאווען איך יעדן פרייטאג צו נאכטס אין שול צוזאמען מיט מיין שווער, און נאכ'ן דאווענען גיי איך צו צו אים און איך קוש אים די האנט ווען איך זאג אים גוט שבת.
איך האב זיך שטענדיג געפילט אומבאקוועם דאס צו טון, און יעצט טראכט איך אז אפשר דארף ער עס בכלל נישט, און אפשר יא. מיין שאלה איז, אויב ער דארף עס נישט, זאל איך אויפהערן, אדער אפשר איז עס נישט קיין כבוד אויפצוהערן, און איך זאל ווייטער ממשיך זיין אדער אפשר פילט ער זיך אויך אומבאקוועם, און עס איז בעסער אויפצוהערן?
איך וועל מיר זייער פרייען פאר אן ענטפער.
יישר כח
תשובה מאת הראש ישיבה שליט"א:
יום א' פרשת לך לך, ז' מרחשון, שנת תשפ"ז לפרט קטן
... נרו יאיר
איך האב ערהאלטן דיין בריוו.
זייער גוט טוסטו אז דו ביסט מכבד דיין שווער, דו גרוסט אים "גוט שבת" און דו געבסט אים א קוש אין האנט אזוי ווי מען טוט מיט א טאטע, ווייל עס ווערט גע'פסק'נט (שלחן ערוך יורה דעה סימן רמ, סעיף כד): "חייב אדם בכבוד חמיו", מען דארף מכבד זיין א שווער, אזוי ווי מען איז מכבד א טאטע; און דו זאלסט דאס ווייטער טון.
זיי נישט פארנומען מיט די אלע חכמות 'דארף ער עס יא?' 'דארף ער עס נישט?' וכו', דו טו וואס איז ריכטיג, עס זאל דיר גארנישט אנגיין עפעס אנדערש, דו זיי אים ווייטער מכבד, אזוי וועט דאס מאכן דיין שלום בית שטארק, ווייל ווען די ווייב זעט ווי איר מאן פירט זיך צו אירע עלטערן מיט כבוד - מאכט דאס אז זי זאל ווערן מער נענטער צום מאן, און חס ושלום פארקערט, ווען מען איז מזלזל אינעם שווער און שוויגער - טוט דאס וויי פאר די ווייב, און די קשר צווישן מאן און ווייב ווערט שוואכער.
דער אייבערשטער זאל העלפן זאלסט האבן הצלחה אין אלע ענינים.