א כסלו תשפ"ו

בעזרת ה' יתברך - ערב שבת קודש פרשת תולדות, ראש חודש כסליו, שנת תשפ"ו לפרט קטן

 

לכבוד ... נרו יאיר

עס איז אריבער נאך א וואך, דארפסטו דאנקען דעם אייבערשטן אויף יעדן איינציגסטן טאג פון די וואך. פרייטאג צו נאכטס ביי קבלת שבת ווען מען זאגט די קאפיטלעך פון לכו נרננה זאלסטו דאנקען דעם אייבערשטן אויף די פארגאנגענע וואך, מען זאגט זעקס קאפיטלעך אנטקעגן די זעקס טעג פון די וואך. די ערשטע קאפיטל זאגט מען "לְכוּ נְרַנְּנָה", ווען דו ענדיגסט די קאפיטל זאלסטו דאנקען דעם אייבערשטן אויף די פארגאנגענעם זונטאג, דערמאן זיך אלעס וואס איז געווען און דאנק אים אויף דעם טאג. די צווייטע קאפיטל זאגט מען "שִׁירוּ לַה' שִׁיר חָדָשׁ", ווען דו ענדיגסט דעם קאפיטל זאלסטו אים דאנקען אויף דעם מאנטאג וואס איז פארביי, און אזוי ווייטער, נאך די דריטע קאפיטל "ה' מָלָךְ תָּגֵל הָאָרֶץ" - זיי זיך מתבודד אויף דינסטאג, דאנק און לויב אין דיין שפראך, עס זאל דיר נישט אנגיין אויב דער חזן חזנות'ט, דו פארמאך דיינע אויגן און דאנק דעם אייבערשטן, און נאכן פערטן קאפיטל פון "מִזְמוֹר שִׁירוּ לַה' שִׁיר חָדָשׁ כִּי נִפְלָאוֹת עָשָׂה" - זאלסטו אים לויבן אויף מיטוואך, און נאכן פיפטן קאפיטל "ה' מָלָךְ יִרְגְּזוּ עַמִּים" - אויף דאנערשטאג, און ביי "מִזְמוֹר לְדָוִד הָבוּ לַה'" - דאנק אים אויף פרייטאג, און ביי "לכה דודי" זאלסטו זיך פארבענקען צום אייבערשטן דורך רעדן צו אים אין אידיש, ביז דער אייבערשטער וועט דיר פארגעבן פאר אלע זינד פון די פארגאנגענע וואך.

איך דאנק דעם אייבערשטן, היינט ראש חודש כסלו איז די טאג וואס איך האב חתונה געהאט. מוהרא"ש זאגט, מען זאל זאגן די קאפיטלעך פון תהילים פון הלל אין די טאג וואס מען האט חתונה געהאט צו דאנקען און לויבן דעם אייבערשטן אויף די גרויסע נס, די גרויסע חסד - אז מען האט א ווייב, מען קען לעבן הייליג און ריין.

מיין חתונה איז געווען ראש חודש כסלו שנת תשס"א, קומט אויס אז איך קען זאגן יעדע יאר אין די יום החתונה - הלל מיט די ברכה. איך דאנק דעם אייבערשטן פאר די נס אז איך בין ארויס פון תפיסה, חכמינו זכרונם לברכה זאגן (בראשית רבה סח, ד), א בחור און א מיידל, איידער זיי האבן חתונה זענען זיי אין תפיסה, זיי זענען ארעסטאנטן. די הייליגע חכמים זאגן דאס אויפן פסוק (תהילים סח, ז): "מוֹצִיא אֲסִירִים בַּכּוֹשָׁרוֹת", דער אייבערשטער מאכט זיווגים, ער נעמט ארויס די בחורים און מיידלעך פון זיין פארשפארט, און דער וואס האט שכל זינגט, דאנקט און לויבט זיין גאנץ לעבן דעם אייבערשטן, און דער וואס האט נישט שכל - וויינט זיין גאנץ לעבן, דאס איז די ווארט בַּכּוֹשָׁרוֹת - בְּכִי וְשִׁירוֹת; איינער וויינט, און איינער זינגט שירה, און אז דער רבי האט געזאגט איך וויל ענק זאלן מאכן ענקערע ווייבער פאר חסידות'טעס מוז זיין אז מען קען דאס טון, דער רבי זאגט אונז נישט זאכן וואס איז בשמים אדער מעבר לים, עס ווענדט זיך נאר אויב מען קען באשטיין אז די ווייב זאל זיין ביים רבי'ן אדער מען וויל דאס גאר שטארק, און מיר איז דאס געגאנגען אין לעבן ממש, און איך האב אסאך געבעטן דעם אייבערשטן און אסאך גערעדט און געמאכט און געטון וואס מען קען - אז מיין שטוב זאל זיין איינגעבאקן ביים רבי'ן, און ברוך ה' איך קען זאגן הלל מיט א ברכה אז מיין שטוב לעבט מיטן רבי'ן.

ביי די סעודה זאלסטו זינגען זמירות מיט שמחה, וויין נישט ביי די סעודות; קינדער האבן נישט ליב וויינעדיגע סעודות, זיי נאר פרייליך.

א פרייליכן שבת, א גוטן חודש.