ג כסלו תשפ"ו

בעזרת ה' יתברך - יום א' פרשת ויצא, ג' כסליו, שנת תשפ"ו לפרט קטן

 

... נרו יאיר

"וַיֵּצֵא יַעֲקֹב מִבְּאֵר שָׁבַע וַיֵּלֶךְ חָרָנָה", 'יעקב' דאס מיינט מען דער איד, 'באר שבע' דאס איז די אמונה, די זיבעטע ספירה, די מלכות; אויב א איד גייט אוועק פון די אמונה – 'וילך חרן' ווערט א חרון אף, עס ווערט דינים, און מיט אמונה ווערט אלעס נמתק.

שטארק זיך מיט אמונה, חזר זיך 'דער אייבערשטער איז דא, דער אייבערשטער איז מיט מיר'. דער רבי זאגט (שיחות הר"ן, סימן לג): "אֵצֶל הָעוֹלָם אֱמוּנָה הוּא דָּבָר קָטָן", ביי די וועלט איז אמונה א קלייניקייט, מענטשן זאגן 'וואס דארף מען רעדן און חזר'ן אמונה, ווער האט דען נישט קיין אמונה? יעדער האט אמונה!' און דער רבי זאגט, "וְאֶצְלִי אֱמוּנָה הוּא דָּבָר גָּדוֹל מְאֹד", אבער ביי מיר איז דער עיקר אמונה, "וְעִקַּר הָאֱמוּנָה הִיא בְּלִי שׁוּם חָכְמוֹת וַחֲקִירוֹת כְּלָל", מען דארף האבן אמונה אן קיין חקירות און אן קיין חכמות, "רַק בִּפְשִׁיטוּת גָּמוּר כְּמוֹ שֶׁהַנָּשִׁים וְהַהֲמוֹן עַם הַכְּשֵׁרִים מַאֲמִינִים", נאר פשוט אזוי ווי פרויען און פשוט'ע מענטשן וואס לעבן בתמימות ופשיטות מיט אמונה אינעם אייבערשטן.

ביי אונז אין ישיבה איז געווען שבת זייער שיין, מען האט גערעדט פון רבי'ן, איך וועל דיר שפעטער שרייבן.

דער אייבערשטער זאל העלפן זאלסט האבן הצלחה אין אלע ענינים.