ז כסלו תשפ"ו

בעזרת ה' יתברך - יום ה' פרשת ויצא, ז' כסליו, שנת תשפ"ו לפרט קטן

 

לכבוד ... נרו יאיר

מען קען זיך דרייען אין ברסלב, און אויך אין היכל הקודש, און מען פארגעסט וואס דער עיקר איז און וואס איז דער טפל; וואס דארפסטו מער, דעם רבינ'ס איידעם, וואס איז דא נענטער פון קינדער, דאך שרייבט אים דער רבי (מכתבי רבינו ז"ל, בריש ספר עלים לתרופה): "בַּקָּשָׁתִי מֵאֲהוּבִי חֲתָנִי, שֶׁתִּלְמוֹד בְּכָל יוֹם שִׁיעוּר גְמָרָא וּפוֹסֵק, שֶׁלֹא תַּעֲשֶׂה חַס וְשָׁלוֹם מִטָּפֵל עִיקָר, רַק אֶת הָאֱלֹקִים יְרֵא וְכוּ', כִּי זֶה כָּל הָאָדָם", מיין ליבער איידעם, איך בעט דיר זייער זאלסט לערנען יעדן טאג גמרא און שלחן ערוך, זאלסט חס ושלום נישט מאכן פונעם טפל אן עיקר און פון עיקר א טפל; זעט מען וואס דער רבי האט געוואלט און וואס עס איז געווען ביים רבי'ן אן עיקר - נאר תורה ותפילה ויראת שמים.

זע עס זאל דיר נישט אריבערגיין דיין טאג אן לערנען מקרא, משנה, גמרא וכו' אויפן סדר דרך הלימוד פונעם הייליגן רבי'ן (המבואר בשיחות הר"ן סימן עו). דער רבי האט געזאגט: "איך האב גענומען דאס גוטס פון די חסידים און דאס גוטס פון די ליטווישע"; ביי חסידים איז דער עיקר 'תפילה', און ביי די ליטווישע איז דער עיקר 'תורה', און דער רבי האט גענומען ביידע - סיי תורה און סיי תפילה, וואס דאס איז געווען ביים רבי'ן דער עיקר, אזוי ווי דער רבי האט געזאגט (שם, סימן רפז): "מַה יֵּשׁ לְהָאָדָם לַעֲשׂוֹת בְּזֶה הָעוֹלָם", וואס האט א מענטש צו טון אויף די וועלט? "אֵין צָרִיךְ כִּי אִם לְהִתְפַּלֵּל, וְלִלְמֹד, וּלְהִתְפַּלֵּל", נאר דאווענען, לערנען און דאווענען.

וואו דו גייסט זאלסטו מיט נעמען דיין קליינע משניות'ל, מוהרא"ש פלעגט זיך בארימען: "ווען מען זעט איינעם מיט א משניות זאגט מען גלייך אויף אים 'ער באלאנגט ביי היכל הקודש'"; זע צו האבן דיין משניות ווי דו גייסט נאר, מען זאל זיך קענען בארימען מיט דיר אז דו ביסט א תלמיד היכל הקודש.

אויך זאלסט אכטונג געבן ווי אזוי דו רעדסט צו דיין ווייב, רעד שיין צו איר, רעד צו איר מיט די גרעסטע כבוד און דרך ארץ, דאס איז וואס מוהרא"ש האט אונז שטענדיג דערמאנט, מיר זאלן נישט פארגעסן ווי מיר האבן אויסגעקוקט איידער מיר האבן חתונה געהאט, ווי צעבראכן מען איז געווען, ווי מען האט שוין אויפגעגעבן אז מען וועט נאך אמאל חתונה האבן און האבן א שטוב.

געב אכטונג זי זאל נישט וויינען. חכמינו זכרונם לברכה זאגן (בבא מציעא נט.): "לְעוֹלָם יְהֵא אָדָם זָהִיר בְּאוֹנָאַת אִשְׁתּוֹ", מען זאל זייער אכטונג געבן נישט טשעפען די ווייב, "מִתּוֹךְ שֶׁדִּמְעָתָהּ מְצוּיָה", ווייל א פרוי וויינט שנעל, פרויען זענען זייער געפיליש, זייער הארציג, וויינען זיי שנעלער.

היינט נאכט וועט זיין די וועכנטליכע שיעור. ביים שיעור וועלן מיר רעדן פון וואס שטייט אינעם בריוו, פון לערנען און רעדן שיין אין שטוב.

דער אייבערשטער זאל העלפן זאלסט האבן הצלחה אין אלע ענינים.