כא שבט תשע"ט

בעזרת ה' יתברך

                                      יום א' פרשת משפטים, כ"א שבט, שנת תשע"ט לפרט קטן

 

לכבוד ... נרו יאיר.

איך בעט דיר זייער זאלסט זיך קובע זיין א שיעור אין גמרא; אפילו דו פארשטייסט נישט וואס דו לערנסט זאלסטו זאגן די ווערטער פון די גמרא.

חכמינו זכרונם לברכה זאגן (אבות ו, ב): "אֵין לְּךָ בֶּן חוֹרִין אֶלָּא מִי שֶׁעוֹסֵק בְּתַלְמוּד תּוֹרָה", נאר דער וואס לערנט תורה איז א פרייער מענטש און ער איז זוכה רייך צו ווערן.

גיי אין בית המדרש דאווענען שחרית וועסטו זוכה צו האבן פרנסה; פון לויפן מאכן געלט וועסטו גארנישט האבן. דער הייליגער קדושת לוי זכותו יגן עלינו האט אמאל געזען ווי איינער לויפט, האט ער אים אפגעשטעלט און געפרעגט: "זאג מיר, וואו לויפסטו?" האט דער איד געענטפערט: "צו מיין ארבעט, כדי צו מאכן געלט", פרעגט אים דער הייליגער קדושת לוי: "ווער זאגט אז דו לויפסט צו דיין פרנסה, אפשר אנטלויפסטו גאר פון דיין פרנסה?" דאס זעלבע זאג איך דיר: "לויף ענדערש אין שול, דורכדעם וועסטו האבן פרנסה".

דער אייבערשטער זאל העלפן זאלסט מצליח זיין אין אלע דיינע וועגן.