בעזרת ה' יתברך - יום א' פרשת ויצא, ג' כסליו, שנת תשפ"ו לפרט קטן
... נרו יאיר, קרית ברסלב ליבערטי
עס דערפרייט מיר דאס הארץ צו הערן אז דו קומסט אין שול יעדן טאג דאווענען און לערנען, האסט גענומען צוויי חברותות, דו לערנסט די הייליגע תורה, דאס איז דעם רבינ'ס ווילן געווען, אריינברענגען אין אונז א גליסטעניש צו לערנען און צו טון אסאך מצוות מיט א פשטות, אן קיין חכמות.
אויסער די שיעורים וואס דו האסט מיט דיינע חברותות – זאלסטו אויך לערנען פאר דיר אליין, גורס זיין פרקים משניות מיט בלעטער גמרא אפילו אן קיין פארשטאנד, אזוי ווי דער רבי האט אונז געזאגט צו לערנען (שיחות הר"ן, סימן עו), ווייל אז מען לערנען נאר מיט פארשטאנד און מיט א חברותא, קומט אויס אפאר הונדערט טעג א יאר וואס מען לערנט נישט, אז מען רעכנט צאם אלע שבתים און ימים טובים פון יאר, און ערבי שבתים – איז שוין איבער הונדערט טעג, און נאכדעם אלע אנדערע טעג וואס מען האט טרדות, איז אלעס צוזאמען גאר אסאך טעג, מה שאין כן אז מען לערנט באופן גירסא, דאס טוט מען אלע טעג, כולל שבתים, ערב שבת, און אזוי ווייטער.
אינדערפרי נאך ברכת התורה זאלסטו זיך קובע זיין צו זאגן די דרייצן אני מאמין, זאג עס מיט די טייטש, עס זאל דיר ווערן איינגעקריצט אין די ביינער די אמונה בה' ובמשה ובנביאים.