בעזרת ה' יתברך
יום ב' פרשת חקת, ד' תמוז, שנת תשפ"א לפרט קטן
לכבוד ... נרו יאיר
איך האב ערהאלטן דיין בריוו.
גמרא נעמט ארויס דעם מענטש פון אלע טונקלקייטן, פון אלע שלעכטס. חכמינו זכרונם לברכה זאגן (סנהדרין כד.) אויפ'ן פסוק (איכה ג, ו): "'בְּמַחֲשַׁכִּים הוֹשִׁיבַנִי כְּמֵתֵי עוֹלָם', אָמַר רַבִּי יִרְמִיָּה זֶה תַּלְמוּדָהּ שֶׁל בָּבֶל", דאס גייט ארויף אויף תלמוד בבלי; לכאורה, ווי אזוי קען מען זאגן אויף די הייליגע גמרא אז דאס איז א טונקעלע זאך, א טויטע זאך? זאגט מוהרא"ש זכותו יגן עלינו אז די הייליגע חכמים ווייזן אונז א וועג ארויסצוגיין פון די טונקלקייט; א מענטש זאגט 'עס איז מיר פינסטער', 'עס איז מיר טונקל', 'איך שפיר זיך ווי א טויטער מענטש', 'עס גייט אריבער אויף מיר שווערע ביטערע נסיונות, עס איז ממש ביי מיר מקוים געווארן דעם פסוק "בְּמַחֲשַׁכִּים הוֹשִׁיבַנִי כְּמֵתֵי עוֹלָם"', זאגט מען אים: "זֶה תַּלְמוּדָהּ שֶׁל בָּבֶל", נעם א גמרא תלמוד בבלי און הייב אן לערנען - וועט דיר ליכטיג ווערן, און דו וועסט ווערן צוריק לעבעדיג.
לערן יעדן טאג דעם בלאט גמרא; אז מען לערנט די בלאט גמרא וואס אלע לערנען, איז מער זיכערער אז מען וועט עפענען די גמרא יעדן טאג, עס ווערט א חלק פונעם טאג. נאך א שטיק צייט ווערט דאס א חלק פונעם מענטשליכן לעבן, עס ווערט אזוי ווי הנחת תפילין.
אז דו האסט אויסגעלאזט אפאר מסכתות זאלסטו קודם גיין ווייטער וואו מען האלט, היינט איז דער דף מסכת יומא דף סד, און זיי משלים די בלעטער וואס דו האסט פארפעלט.
דער אייבערשטער זאל העלפן זאלסט האבן הצלחה אין אלע ענינים.