בעזרת ה' יתברך - יום א' פרשת דברים, ב' מנחם-אב, שנת תשפ"ה לפרט קטן
טייערער ... נרו יאיר
איך דאנק דיר פארן זיין דער ראש המדריכים פאר אונזערע קינדער דעם זומער, שנת תשפ"ה. איך זע מיינע קינדער ווי פרייליך זיי קומען יעדע נאכט אהיים, נישט נאר מען האט געהאט פארגענוגן, די פארגענוגן איז תוכן'דיג, עס איז נישט אן אויפגעבלאזענע לופט באלאן, עס איז געקניפט און געבינדן מיט אמונה, אמונת חכמים, יראת שמים; איך הער דאס פון אלע עלטערן, אלע זענען זייער צופרידן און פרייליך.
עס ליגט אויף דיר א גרעסערע אחריות ווי אויף א מלמד, ווייל דער מלמד קען נישט – בדרך כלל – כאפן אלע הערצער פון די קינדער, עס זענען דא קינדער וואס האלטן טאקע אלעס מיט וואס מען פארלאנגט אין א חדר, אבער עס איז בכפוי', געצווינגענערהייט; עכט, שטילערהייט, אינעווייניג – וויל ער אלעס אפלאזן, עס רעדט נישט צו אים מוסר וכו', אבער דער מדריך וואס שפילט און לייגט אריין ביים שפילן אמונה, אמונת חכמים, מידות ויראה, דעמאלט קען מען טרעפן אלע הערצער פון אלע קינדער און זיי אנפילן, אנשטאפן – מיט יראת שמים; זאלסטו אריינפלעכטן די פא"ן, די פארגענוגן מיט אמונה ויראה.