בעזרת ה' יתברך - יום ב' פרשת ויחי, ט' טבת, שנת תשפ"ו לפרט קטן
... תחי'
עס איז געבוירן געווארן אן אייניקל ביי מיר, ביי מיין איידעם נתנאל פארקאש. שבת בין איך געווען אין שטעטל, מען האט א נאמען געגעבן פארן קינד רייזל, נאך אייער מאמע עליה השלום.
ביי די קידוש האב איך דערציילט שיינע זאכן פון אייער מאמע עליה השלום, ווי זי האט זיך געשטארקט אין איר לעבן, און פון איר חכמת נשים בנתה ביתה; זי איז געווען א מאמע פאר ענק, אויך א מאמע פאר אלע אייניקלעך, און א מאמע פאר אסאך פון אנשי שלומינו, זי האט שטענדיג געטון חסד, איר טיר איז געווען אפן פאר חסד, אלץ מיט א שמייכל, און אפילו איר לעבן איז נישט געווען גרינג, זי האט אסאך מיטגעמאכט וכו' וכו', דאך איז זי געווען פעלזן פעסט מיט אמונה, און מיט אמונת חכמים, איך פריי זיך אז מיין אייניקל טראגט אזא נאמען.
אויב איר קענט איבערגעבן פאר אייער חשוב'ע טאטע ר' אברהם חיים א "מזל טוב", איך האב זייער געוואלט רעדן מיט אים, אויך מיין טאטע האט אים געוואלט רופן וואונטשן א מזל טוב, אבער ער האט נישט קיין טעלעפאן; איז אויב איר קענט אים זאגן אז איך וואונטש אים א מזל טוב מיט א ברכה ער זאל זיין געזונט און שטארק און קענען דינען דעם אייבערשטן מיט שמחה, איך האב אייך שיינע זאכן צו דערציילן וואס מוהרא"ש האט מיר געזאגט אויף אייער טאטע, אין א צווייטע געלעגנהייט אם ירצה השם.
שטארקט זיך מיט אייער ארבעט מיט אויפציען אייערע קינדער, אזוי מאכט איר א נחת רוח פאר אייער מאמע אין גן עדן.