בעזרת ה' יתברך
יום ד' לסדר כי תבוא לאומאן, י"ג אלול, שנת תשפ"ו לפרט קטן
... נרו יאיר
ליבער ברודער, ניץ אויס די פאר טעג וואס דו געפינסט זיך אין אומאן, גיי נאכאמאל צום ציון און נאכאמאל צום ציון, ווייל מיט יעדע מאל וואס מען גייט צום ציון און מען זאגט נאכאמאל די צען קאפיטלעך איז מען זוכה צו גרויסע תיקונים, אזוי ווי מוהרנ"ת האט זיך אויסגעדריקט, אז אפילו די עונש פון מגולגל ווערן איז אזוי געפערליך – דאך איז ער גרייט מגולגל צו ווערן און נאכאמאל אראפקומען אויף די וועלט, בתנאי אז ער וועט קענען נאכאמאל זוכה זיין צו זיין ביים הייליגן רבינ'ס ציון און זאגן די תיקון הכללי; עד כדי כך איז דאס נאכאמאל קומען צום רבינ'ס ציון.
וואויל איז דעם מענטש וואס ניצט אויס די טעג ביים הייליגן רבי'ן אין אומאן מיט תפילה והתבודדות און תחינות ובקשות און דברי רצוי, והעיקר מיטן גיין נאכאמאל און נאכאמאל צום ציון, און מיטן זאגן נאכאמאל און נאכאמאל די תיקון הכללי; וועט ער זוכה זיין צו די אלע תיקונים און צו א כתיבה וחתימה טובה, א גוט געבענטשט יאר מיט אלע ישועות, אמן ואמן.