בעזרת ה' יתברך - יום ב' פרשת ויחי, ט' טבת, שנת תשפ"ו לפרט קטן
... נרו יאיר, וויליאמסבורג
איך האב ערהאלטן דיין בריוו.
האסט מיך זייער מחי' געווען מיט די בריוו און מיר דערציילן דיינע סיומים אז דו האסט מסיים געווען די זיבעצנטע מאל משניות און אז דו הערסט מער נישט קיין נייעס, עד כדי כך אז דו ווייסט גארנישט וואס טוט זיך אין די וועלט, דיין גאנצע נייעס איז די האט-ליין 'קול ברסלב', אז עס איז דא א באשעפער אויף די וועלט און דאס איז די תכלית; אים צו דינען און נישט עפעס אנדערש.
מוהרא"ש זאגט, ווען משיח וועט קומען וועט נאר דאס שטיין אין די נייעס, די גרויסע אותיות - וואס מיט דעם הייבט מען אן די ארטיקל – וועט שטיין מיט גרויסע קידוש לבנה אותיות אז עס איז דא א באשעפער אויף די וועלט, און צו אים דארף מען זיך ווענדן, און א רחמנות אויף די וואס פארלאזן זיך אויף מענטשן; און דער רבי זאגט (חיי מוהר"ן, סימן רסו): "צווישן מיר און משיח וועט נישט זיין קיין חילוק, וואס משיח וועט לערנען לערן איך שוין יעצט, איין חילוק איז דא, ביי מיר איז נאך דא די בחירה", און אז ביי משיח וועט זיין די נייעס "אין עוד מלבדו" – איז יעצט אזוי ביים רבי'ן, דאס איז אונזער נייעס, דאס רעדט מען צווישן אנשי שלומינו, אז עס איז דא א באשעפער אויף די וועלט, און עס איז נישטא קיין אנדערע תכלית אויף די וועלט נאר אים צו דינען, נאר צו אים רעדן, נאר דאווענען און לערנען און דאווענען (שיחות הר"ן, סימן רפז).
איך בין אויפן וועג קיין ארץ ישראל מחזק זיין אנשי שלומינו און מתפלל זיין פאר אונז אלע.