בעזרת ה' יתברך
יום א' פרשת ויקהל, י"ט אדר א', שנת תשפ"ב לפרט קטן
לכבוד מיין טייערער ... נרו יאיר, ירושלים
איך האב ערהאלטן דיין בריוו.
מען קען זיך נישט פארשטעלן די רחמנות פונעם אייבערשטן, דער אייבערשטער שטייט און ווארט מען זאל צוריק קומען צו אים, אפילו ווען א מענטש זינדיגט - ווארט דער אייבערשטער אז דער מענטש זאל תשובה טון.
די הייליגע חכמים זאגן (חגיגה יב.): "אדם הראשון מן הארץ עד לרקיע", דער אייבערשטער האט באשאפן אדם הראשון פון דער ערד ביזן הימל, "כיון שסרח", ווען אדם הראשון האט געזינדיגט, "הניח הקדוש ברוך הוא ידיו עליו", האט דער אייבערשטער אים אויסגעשטרעקט די האנט אזוי ווי א טאטע שטרעקט אויס זיינע הענט צו זיין זון, "ומיעטו", און אים קליין געמאכט; פשט איז, דער אייבערשטער שטרעקט אויס זיינע הענט כביכול אז דער מענטש זאל תשובה טון, ער ווייזט זיין רחמנות אזוי ווי מען ווייזט רחמנות פאר א קליינטשיגן.
וואויל איז דעם וואס לעבט מיט די הקדמה, ער ווייסט אז ער קען שטענדיג צוריקקומען צום אייבערשטן, ער הויבט שטענדיג אן פונדאסניי צו זיין אן ערליכער איד.