בעזרת ה' יתברך - יום א' לסדר כי תבוא לאומאן, י' אלול, שנת תשפ"ו לפרט קטן
הרב ... נרו יאיר
אשריך ואשרי חלקך אז דו האסט זוכה געווען צו מנדב זיין דרייסיג טויזנט שקל צו דרוקן ספר עצתו אמונה לזכות די נשמה פון דיין טאטן זכרונו לברכה.
דאס איז גאר א גרויסע זכות פאר א נשמה, ווייל די ספר איז מחי' ומחזק צענדליגע טויזנטער מענטשן, עס ברענגט אריין אין אזויפיל מענטשן הרהורי תשובה און יראת שמים, און עס ווערט פון דעם א רעש אין הימל. אזוי ווי די מעשה גייט, אז ווען דער הייליגער צדיק רבי יצחק מדראהביטש זכותו יגן עלינו איז נפטר געווארן איז אים רש"י הקדוש אנטקעגן געקומען אויבן אין הימל און אים געפרעגט: "וואס פאר א גוטע מעשים טוט אייער זון דער צדיק רבי מיכל'ע זלאטשובער אז דא אין הימל מאכט מען אזא רעש פון אים?" האט דער טאטע רבי יצחק מדראהביטש געענפערט: "ער לייגט אריין שטארקע כוחות אינעם דאווענען וכו'", האט אים רש"י הקדוש געזאגט: "פאר דעם אליינס וואלט מען נישט געמאכט אזא רעש דא אין הימל פון אים; אסאך צדיקים לייגן אריין כוחות אינעם דאווענען און מען מאכט נישט אזא גרויסע עסק פון זיי", האט דער טאטע ווייטער געזאגט: "ער לערנט זייער פלייסיג", האט אים רש"י הקדוש געענפערט: "דאס קען אויך נישט זיין די סיבה, ווייל אסאך צדיקים לערנען פלייסיג די הייליגע תורה, פאר דעם אליינס רעש'ט זיך נאך נישט", האט ער געזאגט: "צוליב זיין חסד און צדקה וכו'", האט רש"י הקדוש נאך אלץ נישט מסכים געווען, ביז רבי יצחק מדראהביטש האט אים געזאגט: "אפשר ווייל ער ברענגט צוריק מענטשן צום אייבערשטן? ער איז עוסק אין דעם זייער שטארק", האט רש"י הקדוש געזאגט: "היינו דאהני ליה, יעצט פארשטיי איך שוין פארוואס עס רעש'ט זיך פון אים"; ווייל ביים אייבערשטן איז זייער חשוב דער וואס ברענגט צוריק זיינע קינדער צו אים.
בזכות די גרויסע מצוה פון העלפן דרוקן די ספרים וואס פארשפרייט דעם רבינ'ס עצות - זאלסטו זוכה זיין צו א כתיבה וחתימה טובה און א גוט געבענטשט יאר מיט אלעם גוטנס.