בעזרת ה' יתברך - יום ד' פרשת פקודי, ג' אדר ב', שנת תשפ"ד לפרט קטן
לכבוד מיין טייערער ... נרו יאיר, קרית ברסלב
מזל טוב פאר דיין נייע געבוירענע מיידל, דער אייבערשטער זאל העלפן דו און דיין ווייב זאלן זען אסאך נחת און איר אויפציען לתורה ולחופה ולמעשים טובים.
פרעג דעם מענידזשער אליעזר אדער דער אדמיניסטראטער רפאל, אפשר קענסטו האלטן די ווענס; דאס אנצינדן מזמן לזמן, עס זאל נאך ארבעטן פארן זומער. מיר דארפן האבן די ווענס פאר זומער צו טראגן די עסן צו די קעמפס וכדומה, און אז עס שטייט לאנג אן נוצן – ווערט דאס חרוב.
עס איז דא נאך אסאך זאכן וואס מען קען העלפן, מען דארף נאר וועלן העלפן, מען דארף האבן אינגעלייט זאלן כסדר רופן דעם מענידזשער אדער אדמיניסטראטער פרעגן: "וואס קען איך היינט טון פאר די מוסד?"
געלויבט דעם אייבערשטן ביי מיר גייט אריבער רוב טאג מיט די מוסדות, מיט די חינוך הבנים והבנות, דאס איז מיין שענסטע און וויכטיגסטע זאך, און איך האף צום אייבערשטן אז דאס וועט זיין א כפרה און א תשובה און א תיקון אויף וואס איך דארף מתקן זיין.
איך שרייב דיר ווייל איך שפיר אז דו האסט א שטיקל געפיל פאר די מוסדות.