בעזרת ה' יתברך - אלול, שנת תשפ"ו לפרט קטן
איך האב געבארגט פון ... נרו יאיר צען טויזנט דאלער צו קויפן דעם בנין אויף די גאס 40 אקאדעמי אין ליבערטי, פאר מוסדות ברסלב אין קרית ברסלב.
זמן הפרעון איז חודש אלול תשפ"ט.
ועל זה באתי על החתום.
...
בריוון פונעם ראש ישיבה שליט"א
בעזרת ה' יתברך - ה' אלול, שנת תשפ"ו לפרט קטן
איך האב געבארגט פון הרב ... נרו יאיר צען טויזנט דאלער צו קענען קויפן א בנין פאר די ברסלב'ע מוסדות אין קרית ברסלב, 40 אקאדעמי אין ליבערטי ניו יארק.
זמן הפרעון איז ביז דריי יאר, חודש אלול תשפ"ט לפ"ק.
ועל זה באתי על החתום.
...
בעזרת ה' יתברך - ה' אלול, שנת תשפ"ו לפרט קטן
איך האב געבארגט פון האברך ... נרו יאיר א מיליון דאלער צו קענען קויפן די בנין 40 אקאדעמי אין ליבערטי ניו יארק, פאר אונזערע מוסדות.
זמן הפרעון איז ביז דריי יאר, חודש אלול תשפ"ט לפ"ק
ועל זה באתי על החתום.
...
בעזרת ה' יתברך - יום ג' פרשת כי תצא, ה' אלול, שנת תשפ"ו לפרט קטן
משפחת ... שיחיו, ירושלים
איך האב ערהאלטן אייער בריוו.
איך פריי זיך זייער צו הערן אז ענק זענען צופרידן פון די מוסדות, סיי ביי די אינגלעך, סיי ביי די מיידלעך. איך זע ענק שרייבן מיר יישר כח; איך האף אז ענק באדאנקען זיך אויך פארן מנהל און פאר די מנהלת, וואס פאר זיי קומט באמת דעם יישר כח, זיי לייגן אריין זייער גאנצע לעבן פאר די קינדער, און ווען עלטערן טוען שעצן די ארבעט - געבט דאס כח אויף ווייטער.
בנוגע וואו צו שיקן אייער טאכטער לערנען כלה שיעורים; מיר האבן אין די קהילה די חשוב'ע מנהלת פון בית פיגא מרת ... תחי', זי לערנט מיט די כלות אויף די וועג ווי מען לערנט אין היכל הקודש, אן קיין חומרות און פרישות; אבער דאס האט מיט ענק עלטערן, אויב ענק ווילן נעמען א פרוי וואס איז מער מומחה - זאלן ענק טון ווי אזוי ענק פארשטייען.
דער עיקר זאלן ענק נישט אויפהערן דאנקען דעם אייבערשטן פאר די חסדים, ווייל ווי מער מען דאנקט דעם אייבערשטן - אלץ מער גוטס באקומט מען, מוהרא"ש טייטשט דעם פסוק (תהלים קלו, א): "הוֹדוּ לַה' כִּי טוֹב", דאנק דעם אייבערשטן, זאג שטענדיג 'כי טוב', דער אייבערשטער איז גוט, דורכדעם וועט זיין "כִּי לְעוֹלָם חַסְדּוֹ", דו וועסט שטענדיג דאנקען דעם אייבערשטן אויף זיינע חסדים.
דער אייבערשטער זאל העלפן איר זאלט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ג' לסדר כי תבוא לאומאן, י"ב אלול, שנת תשפ"ו לפרט קטן
לכבוד דער חשוב'ער מגיד שיעור ר' ישראל יוסף שניצלער נרו יאיר
מיר ווילן ארויסווייזן אונזער הכרת הטוב פארן זיך אזוי אפגעבן אין ישיבה מיט אונזערע קינדער נחמן נתן און יצחק דוד, פארן לערנען מיט זיי תורה ויראת שמים און מידות טובות.
מיר זענען זייער דאנקבאר און דעריבער שיקן מיר די טיפ.
א כתיבה וחתימה טובה.
משפחת ...
בעזרת ה' יתברך - יום ג' לסדר כי תבוא לאומאן, י"ב אלול, שנת תשפ"ו לפרט קטן
לכבוד דער חשוב'ער לייפגארד הבחור ש. קאהאן נרו יאיר
מיר שיקן א קליינע טיפ ארויס צו ווייזן אונזער הכרת הטוב פארן מאכן א פארגעניגן ביים שווימען פאר אונזערע קינדער.
מיר זענען דיר זייער דאנקבאר.
א כתיבה וחתימה טובה.
משפחת ...
בעזרת ה' יתברך - יום ג' לסדר כי תבוא לאומאן, י"ב אלול, שנת תשפ"ו לפרט קטן
...
א קליינע טיפ פאר מרת ... תחי', פארן זיך אפגעבן מיט אונזער טאכטער ... תחי', איר טיטשן די אכט וואכן פון זומער תשפ"ו.
מיר זענען זייער דאנקבאר און מיר ווייזן ארויס אונזער הכרת הטוב.
א כתיבה וחתימה טובה.
משפחת ...
בעזרת ה' יתברך - יום ג' לסדר כי תבוא לאומאן, י"ב אלול, שנת תשפ"ו לפרט קטן
לכבוד דער חשוב'ער זומער דירעקטאר מרדכי ראזענבערגער נרו יאיר
מיר ווילן געבן א קלייניקייט ארויס צו ווייזן אונזער דאנקבארקייט פארן מאכן אזוי געשמאק די זומער וואכן פאר אונזערע קינדער יחזקאל און מענדל נרם יאיר.
זיי האבן זייער הנאה געהאט פון די זומער פראגראם, מיר זענען זייער דאנקבאר.
א כתיבה וחתימה טובה.
משפחת ...
בעזרת ה' יתברך - יום ד' פרשת כי תצא, ו' אלול, שנת תשפ"ו לפרט קטן
לכבוד ... נרו יאיר
איך האב פאר דיר א גרוס פון אונזערע מוסדות, סיי פון די חדר, סיי פון בית פיגא און פון ישיבה; איך בין אזוי איבערגענומען פון די וועג ווי אזוי מען איז מחנך די קינדער מיט אזא איבערגעגעבנקייט, און פון די לימודים וואס מען לערנט; די אמונה, די יראת שמים און מידות טובות, און איך האף אז דו באדאנקסט זיך פאר די מלמדים פון דיינע קינדער, פאר די טיטשערס, קאונצלערס, באס דרייווערס און אזוי ווייטער וכו'.
נעכטן איז געווען א חתונה פון א תלמיד הישיבה מיט א תלמידה פון בית פיגא; מיר איז נישט גרינג צו פארן צו שמחות, יעדן טאג איז דא שמחות, איך פאר נישט צו קיין שמחות, אבער דא בין איך יא געפארן קיין קרית יואל צו זיין ביי די חתונה, ווייל דער בחור איר פאר א לאנגע צייט געווען אין שטעטל צו קענען העלפן די מוסד, ער האט געפירט א באס מיט א געטריישאפט, און אויך די כלה איז געווען די גאנצע יאר א טיטשער אין אונזער סקול אין קרית יואל, עס איז נישט גרינג געווען צו זיין א טיטשער פאר די קליינע מיידלעך, זיצן א יאר אן קיין חבר'טעס, נאר צו העלפן די מוסד; צוליב דעם בין איך געפארן זיין ביי זייער חתונה, איך בין געווען ביי די חופה און געליינט די כתובה, ווייל ביי מיר איז די מוסד זייער באליבט, און ווער עס העלפט מיר אין די מוסד - ווערט מיר זייער באליבט און איינגעקריצט אין הארץ.
אויך יעצט ווען די מוסד ווערט גרעסער האלט איך מיט יעדע קליינקייט, איך באקום א באריכט יעדן טאג פון די מנהלים, סיי פון ארץ ישראל, סיי פון שטעטל, און פון די ישיבה; סיי פון ארץ ישראל און פון שטעטל; דאס איז ביי מיר דער עיקר, און דאס איז מיין ערשטע און וויכטיגסטע זאך, אז די קינדער זאלן באקומען די בעסטע חינוך; דעם רבינ'ס חינוך אזוי ווי מיר האבן מקבל געווען פון מוהרא"ש.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ב' לסדר כי תבוא לאומאן, י"א אלול, שנת תשפ"ו לפרט קטן
לכבוד ... נרו יאיר
איך וויל דיך מחזק זיין דו זאלסט גיין הפצה, דו זאלסט פארשפרייטן די גליונות און קונטרסים עצות פון הייליגן רבי'ן.
דער הייליגער רבי האט דערציילט (ספורי מעשיות, מעשה ג): "מעשה, אמאל איז געווען א חכם, פאר זיין טויט האט ער גערופן זיינע קינדער און זיין משפחה, און האט זיי געלאזט צוואה זיי זאלן 'אנטרינקען ביימער'; איר מעגט עוסק זיין אין אנדערע פרנסות אויך, נאר דאס זאלט איר זען שטענדיג צו טון: 'אנטרינקען ביימער'"; מוהרא"ש זאגט (ספר נהרי אפרסמון) אז דאס גייט ארויף אויף עוסק זיין אין הפצה אין מקרב זיין מענטשן צום אייבערשטן, ווייל א מענטש איז צוגעגליכן צו א בוים, אזוי ווי עס שטייט אין פסוק (דברים כ, יט): "כִּי הָאָדָם עֵץ הַשָּׂדֶה", און מען דארף עס אנטרינקען מיט אמונה.
מיר פארן שוין אין צוויי וואכן קיין אומאן צום הייליגן רבי'ן, זאלסטו קומען צום רבי'ן מיט טון די ווילן פון רבי'ן, וואס האט געוואלט מיר זאלן אלע עוסק זיין אין הפצה, אזוי ווי רבי נתן זכרונו לברכה זאגט (חיי מוהר"ן, סימן תקמג): דער רבי פלעגט אונז מבזה זיין פארוואס מיר זענען נישט עוסק אין 'הפצה'; וּפַעַם אַחַת בְּלֵיל מוֹצָאֵי שַׁבָּת עָמַדְנוּ לְפָנָיו עִם כַּמָּה אֲנָשִׁים מֵהַחֲשׁוּבִים שֶׁלּוֹ, וְהוֹכִיחַ אוֹתָנוּ מְאֹד כַּמָּה שָׁעוֹת עַל עִנְיָן זֶה, איינמאל מוצאי שבת האט דער רבי אונז געגעבן מוסר אפאר שעה היתכן מיר זענען נישט גענוג עוסק אין הפצה, וּפַעַם אַחַת קָרָא אוֹתָנוּ 'עֵצִים יְבֵשִׁים' עַל שֶׁאֵין אָנוּ מוֹלִידִים נְפָשׁוֹת שֶׁיִּתְקָרְבוּ לְהַשֵּׁם יִתְבָּרַךְ עַל יָדֵינוּ, 'טרוקענע ביימער' האט אונז דער רבי אנגערופן; ווייל דער רבי האט געוואלט מיר זאלן עוסק זיין אין אנטרינקען ביימער - מקרב זיין אידישע קינדער צום אייבערשטן.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ג' פרשת כי תצא, ה' אלול, שנת תשפ"ו לפרט קטן
... נרו יאיר
איך וויל דיר בעטן זאלסט מאכן לייסענס צו קענען פירן קינדער מיט א באס, אונזער מוסד מוטשעט זיך מיט אינגעלייט וואס קענען דרייוון א באס; עס איז גאר א גרויסע זכות צו נעמען קינדער און אהיים טראגן די קינדער פון און צו חדר, מען האט א חלק אין קיום העולם, די הייליגע חכמים זאגן (שבת קיט:): "אֵין הָעוֹלָם מִתְקַיֵים אֶלָא בִּשְׁבִיל הֶבֶל פִּיהֶם שֶׁל תִּינוֹקוֹת שֶׁל בֵּית רַבָּן", די וועלט שטייט אויף די תורה פון תינוקת של בית רבן שלא טעמו טעם חטא; שטעל זיך פאר די זכות פון א באס דרייווער וואס פירט קינדער גיין העלפן די וועלט זאל נישט ווערן אויס.
ומתן שכרה בצדה, קוק זיך גוט אים, די אלע וואס העלפן די מוסדות – די זענען זייער זייער מצליח, און אז מיר וועלן רעדן פנים בפנים וועל איך דיר ווייזן, אז די וואס האבן אלע יארן געהאלפן אויפשטעלן די ברסלב'ע מוסדות, און אויך די וואס העלפן עד היום – ווי זייער הצלחה שיינט זיי, און אזוי וועט זיין ביי דיר, דיין ביזנעס וועט זיך פארמערן אין זכות פון העלפן די מוסדות.
בעזרת ה' יתברך - יום א' פרשת כי תצא, ג' אלול, שנת תשפ"ו לפרט קטן
לכבוד ר' ... נרו יאיר
איך וויל זיך באדאנקען פאר די שיינע סכום צדקה פון פינף און צוואנציג טויזנט דאלער וואס דו האסט געגעבן פאר די ישיבה.
יעצט ווען עס קומט דער גרויסער יום הדין, ווען מען גייט יעדן משפט'ן – זאל דיר זיין פאר א זכות די צדקה וואס דו האסט געגעבן פאר די ישיבה, און דו זאלסט זוכה זיין צו א כתיבה וחתימה טובה, א זיס ליכטיג יאר, פאר דיר און פאר דיין גאנצע משפחה.
אויך זאלסטו וויסן אז הבחור ... נרו יאיר איז זייער מצליח, ער לערנט, ער דאווענט, און האט גוטע מידות, און דאס איז אלעס דיין זכות מיט דיין חבר ר' ... נרו יאיר, און דאס איז פשוט כמשמעו: "המציל נפש אחת מישראל, כאילו קיים עולם מלא".
א גוט געבענטשט יאר.
בעזרת ה' יתברך - יום א' פרשת כי תצא, ג' אלול, שנת תשפ"ו לפרט קטן
לכבוד ר' ... נרו יאיר
איך וויל זיך באדאנקען פאר די שיינע סכום צדקה וואס דו האסט געגעבן פאר די ישיבה, די חשוב'ע סכום פון פינף און צוואנציג טויזנט דאלער.
איך בין זיכער אז די זכות פון העלפן די ישיבה וואס העלפט אזויפיל בחורים – וועסטו זוכה זיין צו א שנה טובה ומבורכת, דו וועסט האבן א גוט געבענטשט יאר, דו מיט דיין גאנצע משפחה, און אויך בזכות וואס דו העלפסט ... נרו יאיר.
איך ווייס נישט אויב דו זעסט די גרויסע שנוי אויף אים, ער לערנט פלייסיג, ער פירט זיך מיט גוטע מידות, און ער איז פרייליך, איך האב אים זייער ליב; זיין הארץ, זיין תמימות; דאס איז דיין זכות, מיט דיין חבר ... נרו יאיר; דאס וועט מען לייגן אויפן וואגשאל, און דו וועסט האבן א גוטע יאר.
בעזרת ה' יתברך - יום ה' פרשת שופטים, א' דראש חודש אלול, שנת תשפ"ו לפרט קטן
... נרו יאיר
די וואך האב איך געהאט א גאר שווערע טאג ווען מען האט מיך גערופן פון חדר אז א קינד פעלט, און מען האט לכתחילה געמיינט אז ער איז פארלוירן אין וואלד; איך האב עס זייער שווער גענומען, איך האב שוין לאנג נישט געהאט אזעלכע שווערע שעות.
בשעת איך האב געוויינט צום אייבערשטן אז די מעשה זאל זיך ענדיגן גוט האב איך געמאכט א חשבון הנפש, וואס דארף איך מתקן זיין, וואס וויל מען פון מיר? איז מיר אריינגעקומען אין מחשבה אז איך דארף מתקן זיין אויפצוזוכן אלע פארלוירענע בחורים און קינדער וואס זענען פארלוירן אין וואלד, זייער קערפער איז נישט אין וואלד, אבער זייער נפש, רוח ונשמה איז פארלוירן, קיינער קוקט זיך נישט אום אויף זיי, קיינער געבט זיי נישט קיין גוטע ווערטער.
איך וויל דיר בעטן דו זאלסט מיר העלפן אויפזוכן די פארלוירענע בחורים און קינדער וואס שטייען זייער נאנט צו דיר, זאלסט שמייכלען צו זיי און זיי געבן א גוט ווארט, נעם זיי ארויס פון וואלד.
נעכטן פארטאגס בין איך געפארן קיין קרית יואל צום ציון פון הייליגן רבי'ן פון סאטמער זכותו יגן עלינו, איך האב אסאך געבעטן פאר אונזער חדר, ישיבה און בית פיגא, צו האבן גוטע מלמדים, גוטע טיטשערס, און ווארעמע מגידי שיעור.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
א גוטן חודש.
בעזרת ה' יתברך - יום ד' פרשת שופטים, כ"ט מנחם-אב, שנת תשפ"ו לפרט קטן
ר' מרדכי נרו יאיר, מנהל תלמוד תורה היכל הקודש קרית ברסלב
איך וויל נאכאמאל בעטן דעם מנהל, איך הער פון די קינדער און פון די עלטערן אז מען שלאגט קינדער; איך וויל נאכאמאל קלארשטעלן אז איך אסר אנצורירן די קינדער בי מיר אין מוסד, די מוסד איז מוהרא"ש'ס מוסד און מוהרא"ש האט געזאגט אז א מלמד וואס שלאגט א קינד - זאל גיין ארבעטן ביי די מיסט, ער זאל צאמנעמען די מיסט און זיך אויסגעבן ביים ווארפן די מיסט קאנעס.
איך בין היינט פארטאגס געפארן קיין קרית יואל צום ציון פון הייליגן סאטמער רבי זכותו יגן עלינו, איך האב זיך דארט מתבודד געווען מיט בכיות, און איך האב זייער אסאך געבעטן דעם אייבערשטן, וואס טו איך דא מיט די חדר? איך דארף נישט א חדר וואו מען שלאגט, אז די קינדער וועלן אויסוואקסן מיט א פיינטשאפט צום אייבערשטן.
איך בעט דיר טייערער מנהל העלף מיר, און ענטפער מיר, זאג מיר צו אז געענדיגט מיט פעטש, געענדיגט מיט וויי טון קינדער; איך וועל ענדערש האלטן די קינדער אן מלמדים, זיי זאלן טאנצן א גאנצן טאג, ווי זיי זאלן צו'מזיק'ט ווערן.
איך שרייב דיר דעם בריוו נישט די ערשטע מאל, איך האב דיר שוין אזויפיל מאל געשריבן אז דו זאלסט זיך אויסנעמען מיט די מלמדים אז זיי קענען נישט אנרירן קיין קינדער, און אז מען דארף געבן א פאטש - דארפן זיי דיך רופן, און אז דו שפירסט ווי דו דארפסט געבן א פאטש - זאלסטו מיך רופן; דאס קען נישט גיין ווי עס גייט ביז אהער, איך בין זייער נישט רואיג.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ג' פרשת שופטים, כ"ח מנחם-אב, שנת תשפ"ו לפרט קטן
יוסל סאקס נרו יאיר, טברי'
איך האב ערהאלטן דיין בריוו.
דו זאלסט ווייטער בעטן דער מנהל יצחק זאל דיר העלפן; איך האב אים נישט אוועק גענומען פון דיר העלפן, איך האב אים נאר געזאגט אז דאס פארן יעדן טאג; איין טאג קיין טבריה, איין טאג קיין בני ברק און בית שמש וכו' - דאס פעלט שוין נישט אויס, אבער הילף מיט עצות און חיזוק - זאלסטו ווייטער נעמען פון אים.
זיי ממשיך מיט דיין הייליגע ארבעט, דערצייל פאר די קינדער מעשיות פון צדיקים, דאס וועט אויפפלאמען זייער הארץ. ווייל דער הייליגער צאנזער רב זכותו יגן עלינו האט אמאל געפרעגט דעם מלמד פון זיינע קינדער אויב ער לערנט מוסר מיט זיי, האט דער מלמד געזאגט: "יא", האט אים דער הייליגער רב געפרעגט: "וועלכע מוסר ספרים?" זאגט ער: "חובות הלבבות", זאגט אים דער הייליגער רב זכותו יגן עלינו: "נישט דאס מיין איך צו פרעגן, איך פרעג צי דו לערנסט מוסר, צי דו פארציילסט זיי מעשיות פון הייליגן רבי'ן ר' אלימלך זכותו יגן עלינו, און פון זיין ברודער דער הייליגער רבי ר' זושא זכותו יגן עלינו"; ווייל מעשיות פון צדיקים פייערט אויף דאס הארץ צו זיין אן ערליכער איד, אזוי ווי דער הייליגער רבי זאגט (לקוטי מוהר"ן חלק א, סימן רמח): "דַּע, שֶׁסִּפּוּרֵי מַעֲשִׂיּוֹת מִצַּדִּיקִים, הוּא דָּבָר גָּדוֹל מְאֹד", זאלסט וויסן – זאגט דער רבי – אז פארציילן מעשיות פון צדיקים איז זייער א גרויסע זאך, "כִּי עַל יְדֵי סִפּוּרִים מִצַּדִּיקִים, נִתְעוֹרֵר וְנִתְלַהֵב הַלֵּב בְּהִתְעוֹרְרוּת גָּדוֹל לְהַשֵּׁם יִתְבָּרַךְ, בְּחֵשֶׁק נִמְרָץ מְאֹד", ווייל ווען מען הערט א מעשה פון א צדיק, ווערט דאס הארץ אויפגעפלאמט צום אייבערשטן, און מען באקומט א שטארקע חשק צו ווערן אן ערליכער איד ווען מען זעט צו וואס דער צדיק האט זוכה געווען ווען ער איז בייגעשטאנען אלע זיינע נסיונות, און מען וויל אויך ווערן א צדיק; בפרט אז מען פארציילט מעשיות פון צדיקים פאר קינדער האט דאס א שטארקע השפעה אויפן קינד, ווייל ווען א קינד הערט א מעשה פון א צדיק, ווערט ער זייער נתעורר דורך דעם.
מיין נישט אז מען האט ווייניג קינדער - איז די תלמוד תורה ווייניגער חשוב, און מיין נישט אז מען האט נישט קיין שיינעם בנין - איז עפעס ווייניגער מיט די חדר; א חדר איז נישט וויפיל קינדער לערנען, און נישט דעם שיינעם בנין; א חדר מיינט איין זאך, א מלמד זיצט מיט קינדער און לערנט מיט זיי תורה ויראת שמים, און מעשיות פון צדיקים. על כן ליבער ברודער, שטארק זיך, דערצייל פאר די קינדער מעשיות פון הייליגן רבי'ן, דערצייל זיי ווי אזוי דער רבי האט אלס קינד זיך גענומען צו עבודת השם דורכדעם וואס ער האט געהערט מעשיות פון צדיקים, ווייל די מאמע פיגא האט גע'ירש'נט די הויז פון איר מאמע - די צדיקת אדל, דעם הייליגן בעל שם טוב'ס טאכטער, וואס זי האט גע'ירש'נט דאס הויז פון איר טאטע דער הייליגער בעל שם טוב זכותו יגן עלינו. אין דעם הויז איז דער הייליגער רבי געבוירן געווארן, און ווען די תלמידים פון הייליגן בעל שם טוב פלעגן קומען קיין מעזיבוז צום ציון פון זייער רבי - דער הייליגער בעל שם טוב זכותו יגן עלינו, פלעגן זיי אריינגיין אין הויז פון בעל שם טוב און זיך דערמאנען די צייטן וואס זיי פלעגן זיין ביים בעל שם טוב, און זיי פלעגן שמועסן צווישן זיך פון זייער גרויסער רבי. דער רבי איז געווען א קליין אינגל דעמאלט, און ער פלעגט אויסהערן די שמועסן פון די קדושי עליון, די צדיקים תלמידי הבעל שם טוב זכותם יגן עלינו.
איינמאל האט דער רבי געהערט פארציילן די מעשה ווי אזוי דער בעל שם טוב איז געבוירן געווארן, אז זיין מאמע שרה איז געווען זייער אלט בשעת זי האט געבוירן דעם בעל שם טוב, און זי איז גלייך נאכדעם נפטר געווארן, און ווען דער בעל שם טוב איז אלט געווען פינף יאר האט אים זיין טאטע גערופן צו זיך און אים געזאגט בזה הלשון: "ישראליק! איך גיי יעצט אוועק פון דער וועלט - כדרך כל הארץ, איך בעט דיר זאלסט נישט מורא האבן פון קיינעם, דו ביסט קיינמאל נישט אליין, דער אייבערשטער איז מיט דיר, ביי דיר און נעבן דיר", און אזוי איז נפטר געווארן דעם בעל שם טוב'ס טאטע.
אזוי איז דער בעל שם טוב אלט זייענדיג פינף יאר געווארן א קיילעכיגער יתום, און איז געווען איינער אליין אין א גרויסע וועלט, אבער ער האט שטענדיג געדענקט זיין טאטנ'ס לעצטע ווערטער: "ישראליק! זאלסט נישט מורא האבן פון קיינעם, דו ביסט נישט אליין, דער אייבערשטער איז מיט דיר, ביי דיר און נעבן דיר", אזוי איז ער אויפגעוואקסן, און וואס ער האט נאר געדארפט האט ער געבעטן דעם אייבערשטן.
ביז איינמאל שפאצירט ער אין פעלד און זינגט זיך צום אייבערשטן, און ער זעט ווי עס קומט צו גיין א איד מיט א ווייסע בארד, און דער איד שטעלט זיך אפ און פרעגט אים: "וואס טוסטו דא אליין אין וואלד?" רופט זיך אן צו אים ישראליק: "איך בין נישט אליין, דער אייבערשטער איז דא מיט מיר", רופט זיך אן דער מענטש: "דער אייבערשטער איז מיט דיר? דער אייבערשטער איז אויבן אין הימל, ער איז זייער הויך, ער איז בכלל נישט דא", און ער לייגט צו אז עס איז א בפירוש'ע פסוק (יחזקאל ח, יב): "עָזַב ה' אֶת הָאָרֶץ", (וואס באמת שטייט דארט מען זאל נישט אזוי זאגן, אזוי ווי די וואס זאגן אז דער אייבערשטער זעט נישט וואס מען טוט אין די פינסטערניש, און מען זאל נישט זאגן אזוי ווי די וואס זאגן אז דער אייבערשטער האט אונז פארלאזט), און דער מענטש האט אנגעפאנגען צו רעדן צום בעל שם טוב קעגן די אמונה, האט דער בעל שם טוב געכאפט א צווייג פון דער ערד און אים אנגעפאנגען צו שלאגן, און בשעת ער האט געשלאגן דעם אלטן טיפוש האט ער געשריגן דעם פסוק (תהלים צב, י): "יִתְפָּרְדוּ כָּל פֹּעֲלֵי אָוֶן", און פלוצלונג זעט דער בעל שם טוב גארנישט, דער מענטש איז פשוט געווען אן אויג פארבלענדעניש פונעם סמ"ך מ"ם.
די מעשה האט דער הייליגער רבי געהערט ווי מען פארציילט עס אין זיין הויז ווען ער איז נאך געווען א קליין אינגל. גלייך ווען דער רבי האט געהערט די מעשה איז אריין אין אים א מורא'דיגע חשק צו ווערן א צדיק, ער האט אנגעפאנגען צו טראכטן: "געוואלד! איך וויל אויך זיין א צדיק! אפשר אז איך וועל דאס נאכטון, איך וועל אנהייבן רעדן צום אייבערשטן, וועל איך אויך ווערן א צדיק?" און דער רבי איז גלייך ארויס פון שטוב און ער איז געגאנגען צום ציון פון בעל שם טוב און געוויינט צום אייבערשטער: "רבונו של עולם, איך וויל אויך זיין א צדיק, איך וויל אויך זיין אן ערליכער איד וכו' וכו'", ביז דער רבי האט זוכה געווען צו וואס ער האט זוכה געווען.
אין פיר וואכן וועלן מיר זיך זען מיטן אייבערשטנ'ס הילף ביים הייליגן רבי'ן אין אומאן.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ד' פרשת שופטים, ערב ראש חודש אלול, שנת תשפ"ו לפרט קטן
...
דאס וואס דו העלפסט דרוקן די ספרים פון הייליגן רבי'ן און פון זיינע תלמידים, דאס איז די גרעסטע זכות פארן יום הדין, און ווען מען וועט משפט'ן ראש השנה און יום הכיפורים, מען וועט לייגן אלעס אויפן וואגשאל, וועט מען לייגן ביי דיר אויך אלע מצוות ומעשים טובים פון די צענדליגער טויזנטער אידן וואס ווערן נתעורר לתשובה פון די ספרים, און דו וועסט זוכה זיין צו א כתיבה וחתימה טובה, מיט דיין גאנצע משפחה.
בעזרת ה' יתברך - יום ד' פרשת שופטים, ערב ראש חודש אלול, שנת תשפ"ו לפרט קטן
לכבוד אשר לעמיל נרו יאיר, קרית ברסלב
איך בין זייער פרייליך, מען האט מיר יעצט באוויזן די נייע חלק פון "ותחיין את הילדים – חלק ג'", איך זע אז דו האסט גענומען די זכות, "מהדורת זוסמאן".
ווי גרויס איז דיין זכות, וואויל איז דיין חלק בזה, און וואויל איז דיין חלק בבא, און די אלע מלמדים, מחנכים, טיטשערס און עלטערן וואס וועלן לערנען דעם ספר, וועלן מחנך זיין די קינדער און די תלמידים ותלמידות; וועט דאס אלעס גיין אויף דיין נאמען, דו וועסט עסן די שכר בזה ובבא.
א כתיבה וחתימה טובה.
בעזרת ה' יתברך - יום ב' פרשת ראה, כ"ב מנחם-אב, שנת תשפ"ו לפרט קטן
לכבוד ... נרו יאיר
שלאג נישט דיינע קינדער, מען טאר נישט שלאגן קינדער; עס איז א טפשות צו שלאגן קינדער און עס העלפט גארנישט פאר חינוך, עס איז נאר זיך אויסצובלאזן די נערווען; ריר נישט אן דיין קינד, דו וועסט נאר קאליע מאכן.
אויך וויל איך דיר בעטן דו זאלסט אוועק געבן צייט יעדן טאג פאר דיין ווייב, דו זאלסט רעדן מיט איר און איר געבן אויפמערקזאמקייט. מאך איר פרייליך, ווייל דאס איז די ווילן פונעם אייבערשטן, און דאס וועט מאכן די שכינה ריען אין שטוב.
איך וויל לאדענען אלע אנשי שלומינו, ווער עס וועט זיך געפינען אין שטעטל אויף שבת קודש - צו די הכנסת ספר תורה. געלויבט דעם אייבערשטן אז איך האב זוכה געווען צו שרייבן א צווייטע ספר תורה, און אם ירצה ה' די וואך שבת וועט זיין די הכנסת ספר תורה. נאך שחרית, פאר קריאת התורה וועט מען טאנצן און אריינברענגען די נייע ספר אין שול, עס וועט נישט נעמען לאנג. מיינע עלטערן זענען אין מירון, אבער מיין שווער מיט די קינדער קומען אויף שבת מיטהאלטן די הכנסת ספר תורה.
אויך נעכטן איז געווען ביי מיר א שמחה, מען האט געמאכט פיאות פאר מיין אייניקל יחזקאל, א זון פון מיין איידעם הרב נתנאל. איך דאנק דעם אייבערשטן פאר די גרויסע ניסים וואס ער טוט מיט מיר.
אויך איז געווען נעכטן ביי מיר אין שטוב א שבע ברכות פאר משפחת לעזער שיחיו, מיר קומען א גרויסע הכרת הטוב פאר די משפחה, פארן זיך אוועק געבן פארן מיידל סקול בית פיגא. אויך איז געווען א שבע ברכות פאר משפחת זוסמאן, פאר זיי קומען מיר אויך א גרויסע הכרת הטוב, פאר דעם וואס זי פירט אן די בית פיגא זומער פראגראם, די דעי קעמפ פאר אונזערע קינדער.
אויך קומט פאר היינט די קאמפיין פאר די מוסדות און קהילה, איך בין זייער איבערגענומען פון אנשי שלומינו, ווי יעדער איינער איז פארנומען מיט גיין נאך געלט, מיט רופן באקאנטע, און אפילו עס איז נישט אזוי געשמאק און בא'טעמ'ט - טוט מען דאס; מיר האבן זיך נישט וואס צו שעמען מיט אונזער קהילה, אשרינו מה טוב חלקינו.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ג' פרשת שופטים, כ"ח מנחם-אב, שנת תשפ"ו לפרט קטן
לכבוד ... נרו יאיר
איך וויל דיך באדאנקען, און אויך אלע אנשי שלומינו - פארן העלפן קאמפיינען. איך בין זייער איבערגענומען פון אנשי שלומינו, ווי אלע האבן געהאלפן ברענגען צדקה פאר די קהילה און מוסד, מען האט די יאר געשפירט ווי אלע מיינען עס פערזענליך, מען טוט נישט אבי יוצא צו זיין, מען זעט אויף די סכום וואס אנשי שלומינו האבן אריינגעברענגט, קרוב צו א מיליאן מיט א האלב, און דאס מערסטע פון די סכום איז פון קליינע נדבות, און ברוך השם איך האב שוין באצאלט די וועם איך דארף באצאלן, און איך בענטש דיר מיט הצלחה, און איך בין זיכער אז די אלע מענטשן וועם דו האסט גערופן בעטן נדבות פאר די מוסד, און אויך די אלע שולן און קאנטריס וואו דו ביסט געגאנגען נאך געלט - דאס וועט דיר צוניץ קומען ביים יום הדין, און אויך ווען מיר וועלן צוריק גיין צום אייבערשטן און מען וועט אונז משפט'ן וועט דאס דיר העלפן.
מען דארף שוין מאכן די לעצטע הכנות צו קומען צום רבי'ן אויף ראש השנה, איך וויל דיך מחזק זיין דו זאלסט נישט ווערן דערשראקן פון דיינע מניעות, מניעות האט יעדער איינער, שפרינג אריבער אויף די מניעות, און אפילו דער צדיק אליינס וועט דיך פארטרייבן - זאלסטו געדענקען וואס רבי נתן האט געזאגט פארן רב - רבי אהרן, ווען ער איז געקומען פרעגן דעם רבי'ן וואס ער זאל טון וועגן קומען קיין אומאן אויף ראש השנה, ער האט געזאגט פארן רבי'ן אז די ראשי קהילה זאגן אים אז ער קען נישט אוועקפארן, ער טאר זיי נישט איבערלאזן וכו', און אז ער קען פארלירן זיין פרנסה אויב ער וועט אוועק פארן אויף ראש השנה; האט אים דער רבי געזאגט ער זאל נישט קומען, און אזוי האט ער געטון, ער איז נישט געקומען, שפעטער האט אים רבי נתן געפרעגט: "פון אזא רבי גייט מען אוועק? אפילו דער רבי זאל נעמען א דראנג (א דיקע האלץ) און מיך אוועק טרייבן פון אים, וואלט איך אויך נישט אוועק געגאנגען".
גיי אביסל זיך מתבודד זיין, שמועס מיטן אייבערשטן, דערצייל אים דיין הארץ, דערצייל אים דיין ווייטאג; וועסטו זען א גרויסע ישועה.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ד' פרשת ראה, כ"ב מנחם-אב, שנת תשפ"ו לפרט קטן
מרת ... תחי', קרית ברסלב
אייער זכות איז זייער גרויס מיט דעם וואס איר זענט מחזק ווייבלעך, איר הערט זיי אויס, איר האט מיטגעפיל מיט זיי, נישטא עפעס גרעסערס פון דעם, ווייל אזויפיל ווייבלעך און אויך עלטערע פרויען גייען אריבער שווערע טעג מיט די מאן און קינדער, און וואויל איז די וואס הערט זיי אויס און האט מיטגעפיל מיט זיי, און מוטיגט זיי זיך צו האלטן שטארק, און זיי געבן עצות נישט זיך צו לאזן ווערן ווי א שמאטע וכו'.
איך וויל נישט ארויפלייגן אויף אייך נאך ארבעט, איר טוט שוין אזויפיל פאר די קהילה און מוסדות, אבער דאך בעטן פרויען אז זיי ווילן איר זאלט אנהייבן געבן שיעורים; אז איר וועט דאס קענען טון – וועט דאס זיין א גרויסע זאך.
א כתיבה וחתימה טובה.
בעזרת ה' יתברך - יום ד' פרשת ראה, כ"ב מנחם-אב, שנת תשפ"ו לפרט קטן
מרת ... תחי', קרית ברסלב
די ציל פון אונזער פלעי אין "בית פיגא" איז, אז די מיידלעך זאלן אויפלעבן און זיך שפירן גוט, ספעציעל די מיידלעך וואס האבן נישט דורכן יאר א פלאץ וואו צו שיינען און זיין מעכטיג, ביי א פארשטעלונג (פלע"י), קענען זיך אלע עפענען און שפירן ווי זיי זענען חשוב.
על כן, אז איר האט די זכי' צו מאכן די פלעי, זאלט איר זיך גוט אומקוקן אויף יעדע איינציגסטע תלמידה, און ספעציעל אויף די תלמידות וואס זענען שטיל און איידל, זיי געבן א חשוב'ע פלאץ און א שיינע חלק ווי זיי זאלן זיך קענען עפענען און שיינען.
אויך קען די פלעי זיין פאר הפצה, מען זאל רופן משפחה און גוטע פריינד, און אזוי אויך פרויען און מיידלעך פון קעמפס און קאנטריס, זיי זאלן הערן דעם רבינ'ס ספורי מעשיות מיטן טאנץ און מיטן ניגון, אבער העיקר וואס איך צאל די גרויסע קאסט פון די פלעי – איז פאר די תלמידות זעלבסט.
א כתיבה וחתימה טובה.
בעזרת ה' יתברך - יום ג' פרשת ראה, כ"א מנחם-אב, שנת תשפ"ו לפרט קטן
... נרו יאיר, קרית ברסלב
איך האב ערהאלטן דיין פראגע.
אז דו ביסט שולדיג טויזנטער דאלער פאר רענט, און טויזנטער דאלער פאר שכר לימוד און פאר די טיקעטס פון פאראיאר צו פארן קיין אומאן, איז זיכער אז דו קענסט נישט נעמען דיינע קינדער די יאר קיין אומאן; ווי קען מען זיין א שיינער איד ווען מען קומט פאר די לענדלארד און פאר שכר לימוד?
צעברעך דיין בושה און גיי נאך געלט צו באצאלן רענט און שכר לימוד, אזוי וועסטו קענען אנקומען צום רבי'ן, ווייל עס קען זיין אז דאס איז אויך פשט אין רבינ'ס ווערטער, (ספר המדות אות תשובה, סימן מו): "מִי שֶׁרוֹצֶה לָשׁוּב", ווער עס וויל תשובה טון און קומען קיין אומאן – "יִזָּהֵר מִלִּהְיוֹת בַּעַל חוֹב", זאל זיך אכטונג געבן פון חובות, ווייל מיט חובות, ווי מעג מען מאכן נאך חובות? פארן קיין אומאן, ווען מען קומט פאר מענטשן געלט?
דער אייבערשטער זאל רחמנות האבן אויף דיר.
בעזרת ה' יתברך - יום ג' פרשת ראה, כ"א מנחם-אב, שנת תשפ"ו לפרט קטן
... נרו יאיר
זיי מיר מוחל אז איך מיש זיך פריוואט ביי דיר, אבער אז דו גייסט יעצט קויפן טיקעטס פאר דיינע קינדער צו פארן אויף אומאן פאר צוואנציג טויזנט דאלער, ווען דו קומסט פאר די מוסד פאר שכר לימוד פופציג טויזנט דאלער; איך מיין אז עס איז נישט גערעכט.
איך האב צוויי פראגעס, איינס, ווי קען זיין אז פאר אומאן קענסטו שאפן פון אונטער דער ערד, יאר נאך יאר, פאר דיינע קליינע קינדער, און פאר שכר לימוד – נישט? צווייטנס, אז דו קומסט געלט פאר די מלמדים פון דיינע קינדער, האב איך א דין תורה מיט דיר, און די געלט וואס דו שאפסט פאר אומאן קומט ערשט פאר די מוסד.
פרעג דיין שווער אויב דאס איז ריכטיג צו טון, לדעתי ולדעת התורה הקדושה – איז א טאטע מחויב צו צאלן שכר לימוד, און פארן אויף אומאן מיט די קינדער – קומט נאכן באצאלן די חובות.
קען זיין דאס איז פשט וואס דער הייליגער רבי זאגט (ספר המדות אות תשובה, סימן מו): "מִי שֶׁרוֹצֶה לָשׁוּב", ווער עס וויל תשובה טון, דאס מיינט ער וויל פארן צום צדיק קיין אומאן – "יִזָּהֵר מִלִּהְיוֹת בַּעַל חוֹב", זאל אכטונג געבן פון חובות, ווייל מיט חובות איז גניבה צו קומען צום צדיק.
בעזרת ה' יתברך - יום ב' פרשת ראה, כ' מנחם-אב, שנת תשפ"ו לפרט קטן
... נרו יאיר
זיי מחזק דיין ווייב זי זאל אננעמען צו זיין סעקרעטערי אין אפיס צו איינקאסירן שכר לימוד, זאג איר אז דאס איז א הייליגע ארבעט, דאס איז נישט קיין שלעכטע ארבעט; שלעכט איז מען ווען מען לאזט לויפן די מוסד, מען מאנט נישט איין שכר לימוד, דעמאלט איז נישטא קיין געלט צו באצאלן די מלמדים, און די מלמדים וועלן זיך צעלויפן און מען וועט חס ושלום דארפן שליסן די מוסד (הי' לא תהי'); זיי איר מחזק אז זיין א שטארקע סעקרעטערי איז די גרעסטע זכות וואס מען קען נאר האבן, ווייל אזוי קען מען צאלן די טייערע מלמדים אין צייט.
הלוואי וואלסטו אויך גענומען עפעס אן ארבעט אינעם מוסד, א שאד די לעבן זאל אריבערגיין מיט ארבעטן ביטער שווער, און אויף דער עלטער געבט מען זיך א כאפ, מען פרעגט זיך: "וואס און ווען און פאר וועם האב איך געארבעט מיינע זיבעציג יאר?" ענדערש ארבעטן אינעם מוסד, בויען תורה, בויען די מלכות דקדושה.
אז דיין ווייב וועט קומען ארבעטן ביי די שכר לימוד דעפארטמענט וועט דאס זיין א גרויסע זכות, און אז זי וועט רעדן שטארק, זי וועט מאנען די געלט וואס קומט אונז – וועט דאס זיין די גרעסטע רחמנות וואס איז דא.