בעזרת ה' יתברך
ערב שבת קודש פרשת וירא, י"ז חשון, שנת תש"פ לפרט קטן
לכבוד מיין טייערער ליבער ... נרו יאיר.
שטארק זיך ווייטער מיט דיין עבודת ה', לאז נישט אפ דיינע לימודים; חטוף ואכול, כאפ אריין נאך און נאך דפים גמרא, נאר דאס וועט בלייבן פון אונז.
איך וויל דיר פרעגן און בעטן א שטיקל טובה; די אינגעלייט בעטן מיר, זיי ווילן מסדר זיין זיי זאלן קענען קומען מיט זייער משפחה זיך דורך רעדן געוויסע זאכן, זיי בעטן מיר צו מאכן א סדר אז ווען איך קום אין שטעטל יעדע שבת מברכים זאל מען מאכן מוצאי שבת א זמן אויב איינער וויל עפעס דורך שמועסן – אליינס אדער מיט זיין ווייב.
וויל איך דיר פרעגן אויב דו קענסט באשטיין מיר צו העלפן, זיין מיין גבאי צו מסדר זיין א צייט פאר יעדן איינעם; אזוי וועסטו אויך האבן א חלק אין העלפן אידישע קינדער.
מוהרא"ש זאגט בשם צדיקים אז גבא"י איז נוטריקון די ראשי תיבות: אָ'נָּא בְּ'כֹּחַ גְּ'דוּלַת יְ'מִינְךָ, א גבאי דארף אומגיין מיט מענטשן מיט מדת החסד וואס איז צד ימי"ן, און אויך מיט אנ"א – לשון בקשה; איך וועל נאך רעדן מיט דיר מער פרטים.
וואס דו דארפסט זאלסטו בעטן דעם אייבערשטן; גיי שפאצירן אביסל יעדן טאג, אפילו עס איז גוט קאלט אין שטעטל זאלסטו זיך גוט אנפעלצן און גיין אביסל התבודדות, וועסטו זען נסים ונפלאות וואס דער אייבערשטער וועט טון מיט דיר.