בעזרת ה' יתברך - יום ג' פרשת ואתחנן, י"א מנחם-אב, שנת תשפ"ה לפרט קטן
... תחי'
ווי גרויס איז אייער זכות אז איר זענט א טיטשער אין "בית פיגא", איר געבט זיך אוועק פאר אידישע טעכטער, זיי צו לערנען אמונה ויראת שמים און מידות טובות. עס איז טאקע שווער צו זיין א טיטשער, אבער עס לוינט זיך, מען עסט פון די פירות אויף די וועלט און אויף יענע וועלט.
איך וויל אייך בעטן און אזוי אויך אלע "בית פיגא" טיטשערס, אויב א תלמידה פעלט פון סקול, אפילו נאר פאר איין טאג – זאל די טיטשער רופן די עלטערן זיך אינטערעסירן אויף די תלמידה; עס ווייזט אויף נאנטקייט און עס ברענגט גוטע רעזולטאטן, דאס איז אויסער די גוטע געפיל וואס די קינד באקומט אז מען אינטערעסירט זיך אין איר וכו'.
אויך זאלט איר זיך אנצייכענען אלע נעמען פון אייערע תלמידות, און האלטס חשבון אז אלע באזונדער זאלן באקומען פון אייך א ווארעמקייט, א שמייכל, א גוט ווארט, א קאמפלימענט וכו' וכו', דאס איז וויכטיגער ווי אלע לימודים; לערנען - קען מען שפעטער אויך לערנען, אבער אויפצובויען די נפש נעמט אסאך צייט, און מיט אסאך גוטע ווערטער בויט זיך עס אויף.