בעזרת ה' יתברך - יום ד' פרשת וישלח, י' כסליו, שנת תשפ"ה לפרט קטן
... נרו יאיר
איך האב ערהאלטן דיין בריוו.
האסט מיך אזוי מחי' געווען מיט דיין בריוו, איך ווארט אזוי שטארק צו באקומען פון דיר בריוו, צו זען ווי דו ביסט זיך מחזק אין עבודת השם יתברך, ווי דו לערנסט די הייליגע תורה, שיעורים כסדרן בכל התורה כולה על פי סדר דרך הלימוד וואס מיר האבן מקבל געווען פון הייליגן רבי'ן, כמבואר בשיחות הר"ן, סימן עו.
שטארק זיך בעבודת התפילה, זיי זיך מקבל צו דאווענען אויף איין פלאץ, מאך נישט נאך די פליטעס, וואס רופן זיך עובדים - וואס שפאצירן אהין און צוריק, גייען און קומען; שטיי אויף איין פלאץ פון אנהויב דאווענען ביזן סוף, און אז דו שפירסט ווי די הויט ברענט דיר, קענסט נישט איינזיצן - זאלסטו זיך עקשנ'ען און יא בלייבן אויף איין פלאץ פון אנהויב דאווענען ביזן סוף.
מוהרא"ש זכותו יגן עלינו האט געזאגט מיט יארן צוריק אין ישיבה פאר די בחורים, אז מען עקשנ'ט זיך צו בלייבן זיצן אויף איין פלאץ ביים דאווענען און ביים לערנען - ווערט מען בבחינת אדם היושב על הכסא, (עיין לקוטי מוהר"ן חלק א, סימן ו), מען איז א מענטש.
דאווען מיט א סידור, דאווען נישט פון אויסנווייניג. דער הייליגער רבי ר' אלימלך זכותו יגן עלינו זאגט (צעטל קטן, סימן יא): "יַרְגִיל אֶת עַצְמוֹ לְהִתְפַּלֵל בְּכָל כֹּחוֹ וּבְקוֹל הַמְעוֹרֵר הַכַּוָּנָה", מען זאל זיך צוגעוואוינען מיט אלע כוחות צו דאווענען אויפן קול, אזוי קען מען אינזין האבן דאס דאווענען, "לְהַדְבֵּק הַמַחְשָׁבָה לְדִיבּוּר", מען האט אינזין וואס מען בעט, "וּפָּנָיו אֶל הַכּוֹתֵל בְּתוֹךְ סִידוּר הַתְּפִלָה בַּבּוֹקֶר וּבָעָרֶב", מען זאל דאווענען אויף איין פלאץ מיט א סידור, "וְלֹא יִסְתַּכֵּל לִצְדָדִין מִתְּחִלַת הַתְּפִלָה עַד סוֹפָהּ", און מען זאל נישט ארום קוקן וואס טוט זיך ארום און ארום, נאר אריינקוקן אין סידור, "וּבַּחֲזָרַת הַשַׁ"ץ הַשְׁמוֹנָה עֶשְׂרֵה יְעַיֵּין בְּסִידוּר לַעֲנוֹת אָמֵן בְּכָל כֹּחוֹ עַל כָּל בְּרָכָה וּבְּרָכָה", און ביי הויכע שמונה עשרה זאל מען אריינקוקן אין סידור און ענטפערן אמן מיט כוונה, "וּבִּשְׁעַת קְִרִיאַת הַתּוֹרָה לְהַטּוֹת אָזְנוֹ עַל כָּל דִיבּוּר וְדִיבּוּר מֵהַקוֹרֵא כְּקוֹרֵא אֶת הַמְגִילָה", און ביים ליינען זאל מען זאל מען אויסהערן דאס ליינען אזוי ווי מען הערט אויס מגילה ליינען, "וְלַעֲשׂוֹת עַצְמוֹ כְּאִלֵם בְּבֵית הַכְּנֶסֶת אֲפִילוּ קוֹדֶם הַתְּפִלָה וְאַחֲרֶיהָ עַד הֲלִיכָתוֹ לְבֵּיתוֹ", און מען זאל זיך מאכן ווי א שטומער ווען מען דאווענט.
דאס זאל זיין אויף וואס דו זאלסט זיך פארלייגן פאר די קומענדיגע טעג, און איך האף צום אייבערשטן צו קענען זיין דער גוטער שליח, זיין דיין שדכן מיט א גוטער שידוך.
דער אייבערשטער זאל העלפן זאלסט האבן הצלחה אין אלע ענינים.