בעזרת ה' יתברך
יום ה' פרשת כי תשא, ט"ז אדר א', שנת תשפ"ב לפרט קטן
לכבוד די קינדער פון די עלטסטע כיתה אין קרית ברסלב ליבערטי, ה' עליהם יחיו
איך האב באקומען א גרוס פון א איד אויף ענק.
ער דערציילט מיר אז ענק זענען געווען אין קרית יואל אויף הפצה, צו פארשפרייטן דעם רבינ'ס ליכטיגקייט און ענק זענען געקומען עסן ביי די קאך פון מרבה לשובע לזכר נשמת הצדיק רבי ישעי' מקערעסטיר זכותו יגן עלינו. עס איז געווען צוגעגרייט פיינע פלייש, ענק קומען אריין הונגעריג און קיינער נעמט נישט קיין פלייש, ענק גייען צו פרעגן דעם איד וועמענס הכשר איז די פלייש; דער איד זאגט מיר ער האט נאך אזוינס נישט געזען, געווענליך ווען קינדער קומען אריין אין א היימישע פלאץ פרעגט מען נישט קיין קשיות, מען עסט; ער קוקט אויף ענק, ער זעט אז קיינער האט נישט צוגערירט צו די פלייש פאר'ן וויסן ווער עס געבט די הכשר; ער זאגט: "מען זעט די ברסלב'ער קינדער זענען ערליכע קינדער".
ענק מאכן מיר נאר נחת.