בריוון פונעם ראש ישיבה שליט"א

בעזרת ה' יתברך - יום ג' פרשת וישב, ט"ז כסליו, שנת תשפ"ה לפרט קטן

מרת ... תחי'

איך האב ערהאלטן אייער בריוו.

איך פריי זיך צו הערן די גוטע נייעס, דער אייבערשטער זאל העלפן אלעס זאל זיין בנקל ובנחת.

מען געבט זיך טאקע אכטונג פון דערציילן וכו', אין די ערשטע חדשים דערציילט מען נישט צוליב עין הרע, אבער פאר א מאמע - איז א מצוה צו דערציילן, און "שׁוֹמֵר מִצְוָה לֹא יֵדַע דָּבָר רָע" (קהלת ח, ה), מיט כיבוד אם דערלייגט מען נישט, א מאמע האט נישט קיין עין הרע, א מאמע וויל נאר דאס גוטס פון די טאכטער.

איר זאלט נישט אויפהערן דאנקען דעם אייבערשטן פאר די גרויסע חסדים; וואלטן מענטשן געוואוסט ווי שטארק תודה והודאה איז, ווי עס פארטרייבט אלע קליפות און אלע שלעכטס, ווי עס נעמט אוועק אלע עין הרע'ס - וואלטן מענטשן נישט אויפגעהערט זאגן: "שכוח אייבערשטער", מען וואלט טאג און נאכט געדאנקט דעם אייבערשטן, ווייל דאס דאנקען און לויבן דעם אייבערשטן פארטרייבט אלע קליפות, אלע שדים און אלע עין הרע'ס.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת ויצא, ג' כסליו, שנת תשפ"ה לפרט קטן

מרת ... תחי'

איך האב ערהאלטן אייער בריוו.

שטארקט זיך, גלייבט אינעם אייבערשטן אז איר וועט זוכה זיין צו האבן קינדער; איך בעט אייך זייער, פארלירט זיך נישט, ווייל אט אט קומט אייער ישועה.

מאכט זיך א שיעור אין לערנען די מעשיות פון רבי'ן, סיפורי מעשיות, דער רבי זאגט (חיי מוהר"ן, סימן כה) אז דאס איז מסוגל צו האבן קינדער. און אויך זאלט איר זיין פרייליך, ווייל אמאל קען די אנגעצויגנקייט און נערוועזקייט צוריק האלטן פון האבן קינדער, זייט פרייליך, טאנצט יעדן טאג מיט פרייליכע מוזיק, דאס וועט ברענגען די ישועה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת ויצא, ב' כסליו, שנת תשפ"ה לפרט קטן

מרת ... תחי'

איך האב ערהאלטן אייער בריוו.

פארלירט זיך נישט, איר וועט האבן קינדער.

עס איז דא א גוטע ווייטאמין וואס העלפט האבן קינדער, די ווייטאמין נעמט מען דריי מאל א טאג; אינדערפרי, מיטאג און פארנאכטס; די ווייטאמין פון תודה והודאה, דאנקען און לויבן דעם אייבערשטן.

יעדן טאג אינדערפרי זאלט איר זאגן: "שכוח אייבערשטער פאר אלעס וואס דו טוסט מיט מיר, שכוח אייבערשטער פאר אלעס גוטס וואס דו מאכסט מיט מיר, שכוח אייבערשטער פאר דיינע חסדים, שכוח אייבערשטער אז דו גייסט מיר איין טאג געבן א זיסע צוקערדיגע בעבי".

דאנקען און לויבן עפנט אויף די הימל פאר ישועות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת תולדות, כ"ו מר-חשון, שנת תשפ"ה לפרט קטן

לכבוד מיין טייערער ... נרו יאיר, קרית ברסלב

א גרויסן יישר כח פאר אלעס וואס דו העלפסט און וואס דו טוסט פאר די שטעטל, משמש זיין דעם רבי'ן איז א גרויסע זאך, מען איז זוכה צו פאררעכטן אלעס.

איך האב דיר שוין געבעטן זאלסט מיר העלפן מיטן ענדיגן די מקוה ביים בית המדרש אשר בנחל, דאס מאכן כשר פאר א מקוה טהרה. האסט מיר געזאגט דו וועסט מיר לאזן וויסן וויפיל געלט מען דארף; איך ווארט צו הערן פון דיר, איך וויל אזוי שטארק דאס ענדיגן. איך קען שאפן די געלט, עס איז דא אינגעלייט וואס ווארטן אויף קינדער און ווילן כאפן די זכות פון בויען א מקוה טהרה, מענטשן לאזן זיך צאלן הונדערטער טויזנטער דאלער צו בויען א מקוה טהרה, עס זאל זיין א זכות פאר זיי פאר קינדער, און דא קען מען עס האבן פאר אפאר טויזנט דאלער.

איך ווארט זאלסט מיר זאגן אויב דו ביסט גרייט דאס צו ענדיגן, און איך וועל דיר שיקן די געלט, אדער אויב דו ביסט פארנומען, וועל איך בעטן א צווייטן.

א שאד צו ווארטן, ווייל יעצט קען מען נאך אריינכאפן א גוטע רעגן זאל אנפילן די בורות, באלד ווערט אייז קאלט וועט נישט רעגענען, וועט מען דארפן ווארטן ביז נאך ווינטער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת לך לך, ז' מר-חשון, שנת תשפ"ה לפרט קטן

מרת ... תחי'

איך האב ערהאלטן אייער בריוו.

עס איז א מנהג אז ווען א יולדת גייט ארויס, גייט זי די ערשטע זאך אין שול הערן ברכו, צו דאנקען און לויבן דעם אייבערשטן אויף די גרויסע ניסים פון געבוירן א קינד; עס איז דא וואס פירן זיך צו ברענגען א מנין אין שטוב, מען מאכט גרינגער פאר די יולדת צו הערן ברכו.

אז אייער מאן וויל נישט ברענגען קיין מנין אין שטוב, ער שעמט זיך אז זיינע חברים זאלן זען די דירה אזוי נאכגעלאזט וכו' - זאלט איר נישט מאכן קיין קריגעריי, איר קענט ווארטן ביז איר גייט ארויס פון שטוב און גיין שבת אין שול הערן ברכו.

מען דארף געדענקען נישט צו מאכן פון עיקר טפל און פון טפל עיקר, דער עיקר איז עס זאל זיין אהבה אחוה שלום ורעות, און אויך טוט מען אלע שיינע מנהגים, אבער דער ציל איז מען זאל געדענקען נישט צו מאכן קיין קריגעריי.

בעזרת ה' יתברך - יום ב' פרשת לך לך, ג' מר-חשון, שנת תשפ"ה לפרט קטן

לכבוד מיינע טייערע ... שיחיו

איך האב ערהאלטן אייער בריוו.

ברענגען קינדער ברענגט נאר ברכות, קינדער ברענגט פרנסה, קינדער ברענגט שלום בית, קינדער ברענגט נאר גוטס; מען האט נישט מער כח מיט ווייניג קינדער און מען האט נישט א בעסערע שלום בית מיט ווייניגער קינדער, עס איז נישט אמת וואס מענטשן זאגן אז די קינדער שטערן פון זיך באקענען מאן און ווייב, דאס איז טשאדעלע באדעלע מעשיות, נאר בזכות די קינדער האט מען שלום בית.

דער אייבערשטער זאל העלפן ענק זאלן זיין פרייליך און זוכה זיין צו אמת'ע שלום בית; וועלן ענק האבן כח צו מגדל זיין די קינדער.

בעזרת ה' יתברך - יום ג' פרשת נח, כ"ז תשרי, שנת תשפ"ה לפרט קטן

מרת ... תחי', קרית ברסלב

איך האב ערהאלטן אייער בריוו.

דאנקט דעם אייבערשטן פאר אייער קינד, הערט נישט אויף זאגן "שכוח אייבערשטער", און אז אייער קינד וויינט ביינאכט, ער ציינדלט, זאלט איר זאגן "שכוח אייבערשטער פאר מיין קינד", און דאס וואס איר פרעגט וכו'; וואס מיינט איר, די וואס האבן נישט קיין קינדער שלאפן ביינאכט? זיי קענען נישט שלאפן ווייל זיי וועקן זיך אויף פון זייער אייגענע וויינען, איז אז דער אייבערשטער האט אייך געגעבן א געזונטע ליכטיגע קינד וואס וויינט ביינאכט, זיינע ציין קומען ארויס - זאלט איר דאנקען דעם אייבערשטן פאר די מתנה, און חס ושלום טראכטן די שלעכטע מחשבות פון נישט וועלן ברענגען קינדער.

די גרעסטע מתנה איז קינדער, און נעבעך מענטשן מיינען אז מען וועט לעבן שענער און זיסער אן די מתנה פונעם אייבערשטן; דאס לעבן גייט אריבער, די פאר יאר גייט פארביי, און וואס בלייבט פונעם מענטש... נאר דער וואס האט זוכה געווען נישט צו צוריק האלטן די מתנות וואס דער אייבערשטער וויל געבן.

היינט איז געווארן א נייע וועלט, פרויען גייען ארבעטן און נאכדעם לויפט מען צום רב זוכן היתרים אז מען האט נישט קיין כח און קיין צייט; ווי איידער צו באקומען א היתר פון רב איז ענדערש צו בלייבן אין שטוב זיך אראפלייגן אינמיטן טאג, אזוי האט מען כח צו קענען טון רצון השם.

וואויל איז דעם מענטש וואס געבט זיך איבער צום אייבערשטן און נעמט אן די מתנות, די זיסע קינדער, און איז מחנך די קינדער מיט תורה און יראת שמים.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת נח, כ"ו תשרי, שנת תשפ"ה לפרט קטן

לכבוד מיין טייערער ... נרו יאיר, קרית ברסלב

האסט מיר געפרעגט ווי אזוי דו קענסט זוכה זיין צו ערליכע קינדער; דער ענטפער איז - זאלסט יעדן טאג אוועק געבן אפאר מינוט התבודדות אויף דעם.

מאך זיך א קביעות צו בעטן יעדן טאג פינף מינוט נאר אויף ערליכע דורות. חכמינו זכרונם לברכה דערציילן (תנא דבי אליהו רבה, פרק יח): "מַעֲשֶׂה בְּכֹהֵן אֶחָד שֶׁהָיָה יְרֵא שָׁמַיִם בַּסֵּתֶר, וְהָיוּ לוֹ עֲשָׂרָה בָּנִים מֵאִשָּׁה אַחַת, שִׁשָּׁה זְכָרִים וְאַרְבַּע נְקֵבוֹת", עס איז געווען א כהן זייער אן ערליכער איד וואס האט געהאט צען קינדער - זעקס זין און פיר טעכטער, "וּבְכָל יוֹם וָיוֹם הָיָה מִתְפַּלֵּל וּמִשְׁתַּטֵּחַ וּמִתְחַנֵּן וּמְבַקֵּשׁ רַחֲמִים וּמְלַחֵךְ בִּלְשׁוֹנוֹ עָפָר, כְּדֵי שֶׁלֹא יֵצֵא אֶחָד מֵהֶן לִידֵי עֲבֵירָה וְלִידֵי דְּבַר מְכֹעָר", ער פלעגט זיך יעדן טאג אראפווארפן אויף דער ערד וויינען און בעטן דעם אייבערשטן, אז אלע זיינע קינדער זאלן זיין ערליכע אידן; "אָמְרוּ לֹא יָצְתָה אוֹתָהּ שָׁנָה וְלֹא שֵׁנִית וְלֹא שְׁלִישִׁית, עַד שֶׁבָּא עֶזְרָא וְהֶעֱלָה אֶת יִשְׂרָאֵל מִבָּבֶל, וְהֶעֱלָה אֹתוֹ כֹּהֵן עִמָּהֶם. לֹא נִכְנַס אֹתוֹ כֹּהֵן לְבֵית עוֹלָמוֹ, עַד שֶׁרָאָה כֹּהֲנִים גְּדוֹלִים וּפִרְחֵי כְּהוּנָה מִבָּנָיו וּמִבְּנֵי בָּנָיו עַד חֲמִשִּׁים שָׁנָה, וְאַחַר כָּךְ נִכְנַס אוֹתוֹ כֹּהֵן לְבֵית עוֹלָמוֹ", ביז ער האט זוכה געווען ארויף צו גיין קיין ארץ ישראל מיט אלע זיינע קינדער צוזאמען מיט עזרא הסופר, און אלע זיינע קינדער זענען געווארן כהנים גדולים אין בית המקדש, און דער כהן האט זוכה געווען צו קינדער און אייניקלעך וואס אלע פון זיי האבן געטון די עבודה אינעם בית המקדש; זעט מען פון דעם אז תפילה איז די עצה זוכה זיין צו ערליכע קינדער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת שופטים, ג' אלול, שנת תשפ"ד לפרט קטן

לכבוד ... נרו יאיר וזוגתו תחי', לעיקוואד

איך האב ערהאלטן אייער בריוו.

עס טוט מיר זייער וויי צו הערן וואס ענק זענען יעצט אריבער, ענק האבן פארלוירן וכו', נאכן זיך אזוי מוטשען מיט טריטמענטס וכו'; עס איז ענק זייער שווער, ענק זענען זייער צעבראכן.

איך בעט דיר טייערער ..., שטארק זיך מיט אמונה, דער אייבערשטער מאכט נאר גוט, דער אייבערשטער מאכט נישט קיין שלעכטס, און אז עס זעט אויס שלעכט - איז דאס אויך גוט, דער אייבערשטער איז דער בעל הרחמים, ער מאכט נאר גוט.

שטארק זיך מיט אמונה, אזוי וועט אוועק גיין אלע פחדים, ווייל דער רבי זאגט (ספר המידות אות מפלת, סימן א): "עַל יְדֵי פַּחַד הָאִשָּׁה מַפֶּלֶת" דורך שרעק קען א פרוי פארלירן וכו'. אויך זאלסטו קויפן א מאגנעט פאר דיין ווייב זי זאל עס טראגן מיט זיך, דער רבי זאגט (שם, סימן ב): "סְגֻלָּה לְמַפֶּלֶת נְפָלִים שֶׁתִּשָּׂא אֶצְלָהּ מַגְנֵט", און אויך איז דא א סגולה: "גַּם תִּשָּׂא אֶצְלָהּ חֲתִיכַת עֵץ מִקֶּבֶר הַצַּדִּיק" זי זאל טראגן מיט זיך א שטיקל האלץ פון א קבר פון א צדיק; אז מען זעט א בוים העכער א קבר פון א צדיק - זאלסטו נעמען א קליין שטיקל צווייג און דאס האלטן מיט זיך, "גַּם יִתֵּן צְדָקָה", אויך איז צדקה א סגולה נישט צו פארלירן וכו'.

אויך זאל זי נישט גיין מיט גאלדענע צירונג, ווייל דער רבי זאגט (שם חלק ב', סימן א): "אִשָּׁה הַמַּפֶּלֶת נְפָלִים" א פרוי וואס פארלירט וכו' – "לֹא תֵּלֵךְ בְּקִשּׁוּטֵי זָהָב" זאל נישט גיין מיט קיין גאלדענע צירונג.

איך בין מתפלל פאר ענק און איך ווארט צו הערן בקרוב גוטע בשורות.

א כתיבה וחתימה טובה און א גוט שבת.

בעזרת ה' יתברך - יום ג' פרשת שופטים, א' דראש חודש אלול, שנת תשפ"ד לפרט קטן

לכבוד ... נרו יאיר, קרית ברסלב

קום אין שול אנגעטון מיט קליידער, מיט הוט און רעקל; זיי מכבד דעם אייבערשטן - וועט מען דיך מכבד זיין פון הימל, מען וועט דיר געבן כל משאלות לבך לטובה.

ביי אלע דריי תפילות, שחרית מנחה מעריב - זאלסטו קומען אין שול מיט הוט און רעקל, אויך זאלסטו נישט שמועסן אין שול - וועסטו זען אז דו וועסט נפקד ווערן בזרע של קיימא.

דער אייבערשטער זאל העלפן זאלט האבן הצלחה אין אלע ענינים.

א גוטן חודש און א גוט געבענטשט יאר.

בעזרת ה' יתברך - יום ג' פרשת שופטים, א' דראש חודש אלול, שנת תשפ"ד לפרט קטן

מרת ... תחי'

האט נישט מורא פון געבוירן קינדער, קינדער איז נישט קיין שרעקעדיגע זאך, קינדער איז א ברכה, קינדער ברענגט שלום בית, קינדער געבט לעבן, די הייליגע חכמים זאגן (נדרים סד:) "מי שאין לו בנים", אן קינדער איז מען אזוי ווי א טויטער מענטש.

דא האט איר א קליינע תפילה צו זאגן יעדן טאג:

"הייליגער באשעפער מאך מיך פרייליך, נעם אוועק פון מיר די עצבות ומרה שחורה, נעם אוועק פון מיר די אומזיסטע שרעק, איך זאל נישט האבן די נישט געזונטע מורא, איך זאל נאר מורא האבן פון דיר, ווייל איך האב אזוי מורא פון האבן קינדער און זיין א מאמע, איך האב אזא שרעק פון דעם, איך קען ממש נישט אנגיין, עס לאזט מיר נישט מנוחה.

אנא ה' רחם עלי, דערבארעם זיך אויף מיר, געב מיר א שטארקע אמונה, איך זאל פון קיינעם נישט מורא האבן נאר פון דיר, איך זאל נישט זארגן טאג און נאכט, איך זאל זיך שפירן אזוי רואיג, אזוי ווי א קליין קינד אין די מאמעס שויס, איך זאל זוכה זיין צו ערליכע דורות, בנים ובני בנים עוסקים בתורה ובמצוות, אמן".

דער אייבערשטער זאל העלפן איר זאלט האבן הצלחה אין אלע ענינים.

א גוטן חודש און א גוט געבענטשט יאר.

בעזרת ה' יתברך - יום ד' פרשת ואתחנן, י' מנחם-אב, שנת תשפ"ד לפרט קטן

מרת ... תחי'

איך האב ערהאלטן אייער בריוו.

אויף אייער פראגע אז מען איז ענק מכבד מיט די כיבוד 'קוואטער', ווילט איר וויסן אויב איז דאס כדאי אנצונעמען, ווייל ענק שעמען זיך אביסל.

עס איז גוט צו נעמען די כיבוד פון 'קוואטער' און זיך גוט אויסבעטן זוכה זיין צו האבן קינדער. אליהו הנביא קומט צו יעדע ברית און מען קען פועל'ן גרויסע ישועות, און אז מען איז מכבד מיט די כיבוד 'קוואטער' - זאלן ענק אננעמען די כיבוד בשמחה, ווייל דאס איז מסוגל לזרע של קיימא.

אויך איז דא א סגולה פון הייליגן רבי'ן צו קוקן אויף די מוהל מעסער ווען עס האט אויף זיך די בלוט פון די מילה, בעטס אייער מאן זאל בעטן דעם מוהל רשות אויב ער קען אייך ברענגען די מעסער איידער מען רייניגט עס אפ פון די בלוט, און איר זאלט קוקן אויף דעם. דער רבי זאגט (ספר המידות אות מוהל, סימן ב): "אִשָּׁה שֶׁאֵינָהּ יְכוֹלָה לְהִתְעַבֵּר" א פרוי וואס וויל זוכה זיין צו קינדער, "תַּבִּיט עַל הַסַּכִּין שֶׁל מִילָה אַחַר הַמִּילָה" זאל קוקן אויפן מוהל מעסער נאכן ברית.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ח' מנחם-אב, שנת תשפ"ד לפרט קטן

מרת ... תחי'

וואס ווילט איר פון אייער מאן? וואס עסט איר אים אויף זיינע קושקעס? איר זענט דאך א אידישע טאכטער, א אידיש קינד טאר זיך נישט אזוי אויפפירן, וואס איז ער שולדיג אז איר זענט איבערגעשטרענגט? וואס ווילט איר פון אים? ביי מיר איז קלאר אז דאס וואס איר ווארט אזוי לאנג אויף אייער ישועה וכו' - איז נאר צוליב די צער און ווייטאג וואס איר זענט מצער אייער מאן, און אלע סגולות און אלע זאכן וואס ענק טוען - האלט זיך אפ, ווייל איר פארטרייבט די שכינה הקדושה פון שטוב.

איך זאג אייך צו, אויב איר וועט אויפהערן וויי טון אייער מאן – וועט איר געהאלפן ווערן וכו', און די סגולות פון אזויפיל יארן וועלן אנהויבן ארבעטן, אייער מאן איז א טייער קינד, ער טוט אלעס פאר אייך.

איך ווארט צו הערן אז איר האט אנגענומען די ווערטער וואס איך שרייב מיט בלוט פון הארץ.

בעזרת ה' יתברך - יום ב' פרשת ואתחנן, ח' מנחם-אב, שנת תשפ"ד לפרט קטן

מרת ... תחי'

איך האב ערהאלטן אייער בריוו.

ווען א פרוי באנעבעכט אייך פארן האבן אזוי נאנט איין קינד צום צווייטן  - זאלט איר ענטפערן מיט א שמייכל: "איך בין נישט קיין נעבעך, א נעבעך איז די וואס ווארטן אויף קינדער"; לאזט נישט די ווערטער איבערנעמען אייער מח און צוליב דעם מאכן נישט גוטע החלטות אין לעבן וכו'.

נאך מער זאלט איר וויסן, דאס איז די מאדע ביי אסאך יונגע פרויען; מען טרעפט א צווייטע פרוי און מען וויל זיך באגריסן, מען פרעגט די נאמען און וויפיל קינדער מען האט, און אפילו באמת וויל מען יא קינדער און מען פרייט זיך מיט קינדער - שטעלט מען זיך אהער כאילו מען איז מעכטיג און מען זאגט: "נעבעך, האסט קינדער!" און אנשטאט מען זאל יענעם זאגן: "נעבעך קינדער? איך בין א נעבעך? נעבעך איז ווער עס האט נישט קיין צדיק און נעמט זיין וועג פון לעבן פון די גוי'אישע גאס".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת דברים, ראש חודש מנחם-אב, שנת תשפ"ד לפרט קטן

מרת ... תחי'

איך האב ערהאלטן אייער בריוו.

זארגט זיך נישט, האט נישט קיין מורא, געבט זיך איבער צום אייבערשטן און הערט נישט אויף דאנקען דעם אייבערשטן.

דא האט איר א תפילה צו בעטן אין די חדשים:

"רבונו של עולם איך דאנק דיך און איך לויב דיך פאר אלע חסדים וואס דו טוסט מיט מיר, ובפרט פאר די חסד אז איך ווארט וכו'.

איך בעט דיר זייער, העלף מיר און דאס קינד מיר זאלן זיין געזונט און שטארק ברמ"ח איברים ושס"ה גידים, איך זאל האבן דאס קינד בנקל ובנחת אין צייט, מיט אלע ברכות וישועות.

אנא ה', העלף עס זאל נישט שאטן קיין שום שלעכט אויג, עס זאל נישט זיין קיין קנאה אויף מיר און דעם קינד, איך זאל נישט האבן קיין שום פחד, איך זאל נאר מורא האבן פון דיר, איך זאל וויסן און לאזן אלעמען וויסן אז אלעס איז נאר פון דיר, אלעס איז נאר גוטס, ממלא כל עלמין וסובב כל עלמין, אין שום מציאות מבלעדיך יתברך כלל, ובכל תנועה ותנועה שם אלופו של עולם,
אמן כן יהי רצון, אמן ואמן".

בעזרת ה' יתברך - יום ג' פרשת דברים, ב' מנחם-אב, שנת תשפ"ד לפרט קטן

מרת ... תחי'

איך בעט פאר ענק פאר קינדער, ענק זאלן זוכה זיין צו זרע של קיימא, און פאר ענקער הצלחה.

זייט זיך מקבל א גוטע קבלה צו צינדן די שבת ליכט אפאר מינוט פארן זמן הדלקה, צינדט אן די שבת ליכט כאטשיג דריי מינוט פארן זמן, און בעטס ביי די ליכט אפאר ווערטער, בעטס:

"הייליגער באשעפער העלף מיר, געב מיר געזונטע קינדער, ערליכע קינדער, הייליגער באשעפער איך ווייס אז די שליסל פון קינדער ליגט נאר אין דיינע הענט, נאר דו קענסט געבן קינדער, בעט איך דיר א מתנת חינם, געזונטע ערליכע קינדער".

די פאר ווערטער וועט מאכן א רעש און א טומל אין הימל, און איר וועט זוכה זיין צו קינדער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת דברים, ב' מנחם-אב, שנת תשפ"ד לפרט קטן

מיין טייערער ... נרו יאיר

איך האב ערהאלטן א בריוו פון דיין ווייב תחי'.

זי האט געליינט אין א בריוו אין עצתו אמונה אז די סיבה פאר קראנקע קינדער איז, אז מען היט נישט טהרת המשפחה, מען איז מזלזל אין הלכות, זי זאגט עס טוט איר זייער וויי, ווייל לויט וויפיל זי ווייסט האלטן ענק די הלכות זייער ערליך, ביי ענק אין שטוב איז מען מקפיד אויף יעדע סעיף קטן אין שלחן ערוך, איז ווי קען זיין אז ענק האבן א קינד וואס איז נישט געזונט השם ירחם?!

אז מען זאגט פאר איינעם טשעפע נישט די הונט ווייל דו וועסט כאפן א ביס, מיינט עס נישט אז אויב איינער האט געכאפט א ביס איז דאס ווייל ער האט זיך געטשעפעט מיטן הונט. אזוי אויך, די תורה זאגט אז דער וואס היט נישט די הלכות וכו' - וועט האבן קינדער בעלי מומין בגוף ובנפש רחמנא לצלן, אבער דאס מיינט נישט צו זאגן אז דער וואס מוטשעט זיך מיט קינדער - היט נישט הלכות.

וואס זאל איך דיר זאגן, וויפיל איך וועל ענק שרייבן און שטארקן וועט נישט זיין גענוג, ווייל די צער און ווייטאג וואס עלטערן גייען אריבער ווען מען האט אין שטוב א קינד וואס איז נישט געזונט פיזיש אדער גייסטיש איז דאס שווערער ווי אלע צרות, קיין שום איד זאל נישט וויסן וואס די צרה איז, דאס איז די ביטערסטע צרה וואס קען זיין.

דאך וויל איך ענק בעטן, זייט אייך מחזק מיט אמונה פשוטה, מיר ווייסן גארנישט, מיר פארשטייען נישט דרכי המקום ברוך הוא. חכמינו זכרונם לברכה זאגן (ברכות ה.): "כל שהקדוש ברוך הוא חפץ בו", וועם דער אייבערשטער האט ליב, "מדכאו ביסורין", צעקלאפט מען אים מיט יסורים, "ואם קבלם" און אויב מען נעמט אן וואס דער אייבערשטער געבט, מען שווייגט און מען רעדט נישט קעגן די אמונה – "יראה זרע" וועט ער זוכה זיין צו קינדער, "יאריך ימים" און צו אריכות ימים.

דאס גרויסקייט פון א איד מעסט זיך נאר אין דעם, אז מען האט נישט קיין טענות אויפן אייבערשטן, מען רעדט זיך נישט אפ, מען גלייבט באמונה שלימה אז דער אייבערשטער מאכט דאס אלעס נאר מיך נענטער צו ברענגען צו אים, מיך אויסלייטער, און צוליב נאך סיבות וואס איז פארהוילן פון אונז; מיט דעם מעסט מען דאס גרויסקייט, אז מען האט נישט קיין טענות און תרעומות אויף די אמונה.

ענקערע יסורים זענען זייער גרויס, מוהרא"ש זאגט בשם דעם הייליגן חזון איש זכותו יגן עלינו, ווער עס האט א קינד אין שטוב, א זון אדער טאכטער וואס איז גייסטיש נישט מסודר, אדער פיזיש נישט געזונט, אן אינוואליד, השם ירחם - פאסט מען זאל זיך אויפשטעלן פאר די עלטערן אזוי ווי מען שטעלט זיך אויף פאר אן עלטערער איד אדער א תלמיד חכם, ווייל די צער און ווייטאג וואס די עלטערן גייען אריבער - איז נישט מעגליך מען זאל דאס פארשטיין.

ענק קומען אפ מיט דעם אלעס וואס מען דארף אפקומען. מוהרא"ש זאגט (שו"ת ברסלב, מכתב ג' שפו) ווער עס האט א נישט געזונט קינד אין שטוב, א דיסעיבלד אדער גייסטיש אומסטאביל - וועט נישט זען די פנים פון גיהנום, ווייל ער האט שוין געהאט אויף די וועלט די גיהנום, און אויב די עלטערן דערהאלטן זיך, זיי נעמען אן באהבה וואס דער אייבערשטער געבט זיי - דאס איז די העכסטע מדריגה, און דאס איז געווען די מדריגה פון די אבות הקדושים, אזוי ווי די הייליגע חכמים זאגן (ילקוט איוב, רמז תתק"ח), וואלט איוב נישט גערעדט קעגן דעם אייבערשטן ווען ער האט געליטן זיינע יסורים, אזוי ווי מען זאגט יעדן טאג ביים דאווענען אלקי אברהם, אלקי יצחק, ואלקי יעקב, "כך היו אומרים אלקי איוב", וואלט מען אויך געזאגט אלקי איוב, אבער איוב האט זיך נישט געקענט דערהאלטן, ער האט גערעדט קעגן די אמונה, זעט מען פון דעם אז דאס איז די גרויסקייט פון די אבות הקדושים אברהם, יצחק און יעקב, עס איז אריבער אויף זיי שווערע ביטערע יסורים און זיי האבן נישט געהאט קיין שום טענות אויפן אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת מטות מסעי, כ"ג תמוז, שנת תשפ"ד לפרט קטן

מרת ... תחי'

איך האב ערהאלטן די בריוו.

אז מען היט הלכות - האט מען געזונטע קינדער, און אז חס ושלום מען שפילט זיך ארום מיט די הלכות - קומען אזעלכע ביטערע צרות השם ישמרינו; פרעג איך אייך, וואס ווילט איר ענדערש, גיהנום אויף די וועלט אדער גן עדן?

שפילט אייך נישט מיט פייער, געבט אכטונג וואס מען רעדט אין די טעג, מען טאר נישט רעדן זאכן וואס מען טאר נישט טון, מען טאר נישט אנרייצן דעם מאן, און אויב חס ושלום מען שפילט זיך ארום מיט די זאכן - דארף מען ליגן אין שפיטאל וואכן און חדשים רחמנא לצלן זיך אויסצולייטערן השם ישמרינו, אפהיטן זאל דער אייבערשטער.

די הלכות וכו' איז נישט קיין קנס, די הלכות אין די אידישע שטוב איז נישט קיין שלעכטע זאך; עס איז הייליג, עס איז טייער; וואויל איז דעם וואס היט די הלכות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת פנחס, ט"ז תמוז, שנת תשפ"ד לפרט קטן

מרת ... תחי'

איך האב ערהאלטן אייער בריוו.

ווען עס קומען אריין אין אייך שלעכטע מחשבות, אז דאס קינד וואס איר ווארט וועט זיין נישט געזונט חס ושלום, זאלט איר דאס אוועק שטופן מיט תפילות; זאגט: "באשעפער העלף אז דאס קינד זאל זיין געזונט מיט אלע רמ"ח אברים און שס"ה גידים"; און ווען עס קומען אריין מחשבות אז דאס קינד וועט זיין א קליינער, עס וועט נישט וואקסן; זאלט איר מיט די מויל און צינג זאגן: "באשעפער העלף דאס קינד זאל וואקסן, עס זאל נישט זיין קיין מידזשיט" (קארליק); שטופט אוועק די שלעכטע מחשבות מיטן מויל, מיטן ארויסזאגן וואס איר טראכט צום אייבערשטן, און בעטן פאר דעם.

זאגט שמות הצדיקים, מען קען קויפן א ספר וואס האט אלע נעמען פון די צדיקים. מוהרא"ש זאגט, פרויען וואס ווארטן זאלן זאגן אין די חדשים "שמות הצדיקים" און בעטן דעם אייבערשטן אז בזכות די הייליגע צדיקים זאל מען האבן גרינג דאס קינד. ווייל דער רבי זאגט (ספר המדות אות צדיק חלק ב', סימן כ): "עַל יְדֵי הַזְכָּרַת שֵׁמוֹת הַצַּדִּיקִים יְכוֹלִים לְהָבִיא שִׁנּוּי בַּמַּעֲשֶׂה בְּרֵאשִׁית, כְּלוֹמַר לְשַׁנּוֹת הַטֶּבַע", דורכן דערמאנען די נעמען פון צדיקים - קען מען טוישן די טבע.

זאגט די נעמען פון צדיקים וואס איר געדענקט אויסנווייניג, צום ביישפיל: אברהם אבינו, יצחק אבינו, יעקב אבינו, משה רבינו, אהרן הכהן, יוסף הצדיק, דוד המלך, שלמה המלך, רבי שמעון בר יוחאי, רבי יצחק לוריא אשכנזי, רבי ישראל בעל שם טוב, רבי נחמן בן פיגא מברסלב, רבי נתן מברסלב, מוהרא"ש מברסלב וכו' וכו', און נאך נעמען פון צדיקים וואס מען געדענקט, און נאכדעם זאגט די תפילה:

"יְהִי רָצוֹן מִלְּפָנֶיךָ אָבִי שֶׁבַּשָׁמַיִם, אִין דִי זְכוּת וָואס אִיךְ הָאבּ דֶערְמַאנְט דִי נֶעמֶען פוּן דִי צַדִּיקִים, בִּזְכוּת זֵייעֶר תּוֹרָה, זֵייעֶרֶע מַעֲשִׂים טוֹבִים אוּן זֵייעֶר מְסִירַת נֶפֶשׁ, וִוי זֵיי הָאבְּן זִיךְ מוֹסֵר נֶפֶשׁ גֶעוֶוען פַאר דַיינֶעט וֶועגְן, זָאלְסְטוּ מִיר הֶעלְפְן אִיךְ זָאל גֶעבּוֹירְן גְרִינְגֶערְהֵייט אַ גֶעזוּנְט קִינְד בְּרַמַ"ח אֵיבָרִים וּשְׁסָ"ה גִּידִים; אִיךְ זָאל זוֹכֶה זַיין אַרִיבֶּער צוּ גֵיין דִי אַלֶע טֶעג וָואס אִיךְ וַוארְט גְרִינְגֶערְהֵייט. נֶעם אַוֶועק פוּן מִיר אַלֶע מִינֵי עַיִן הָרַע'ס אַז קֵיינֶער זָאל מִיךְ נִישְׁט קֶענֶען שֶׁעדִיגְן. הֶעלְף מִיר אִיךְ זָאל זוֹכֶה זַיין צוּ הָאבְּן עֶרְלִיכֶע קִינְדֶער וָואס וֶועלְן טוּן דַיין וִוילְן זֵייעֶר גַאנְץ לֶעבְּן. הֵיילִיגֶער בַּאשֶׁעפֶער, הִיט מִיךְ אוּן הִיט דָאס קִינְד, דִי דָאקְטוֹירִים שְׁרֶעקְן מִיךְ אָן אַז עֶפֶּעס טוֹיג נִישְׁט אוּן דָאס מַאכְט מִיר אַזֶעלְכֶע פְּחָדִים אַז אִיךְ הַאלְט דָאס מַמָּשׁ נִישְׁט אוֹיס, גֶעבּ מִיר אַ גֶעזוּנְט קִינְד, אַ לִיכְטִיג קִינְד, אַ הֵיילִיג קִינְד. רִבּוֹנוֹ שֶׁל עוֹלָם הֶעלְף מִיר אִיךְ זָאל זַיין גֶעזוּנְט אוּן שְׁטַארְק מַיין גַאנְצֶע לֶעבְּן, אִיך זָאל אֵייבִּיג טוּן נָאר גוּטֶע מַעֲשִׂים וָואס דוּ וֶועסְט הָאבְּן פוּן דֶעם אַ נַחַת רוּחַ, יִהְיוּ לְרָצוֹן אִמְרֵי פִי וְהֶגְיוֹן לִבִּי לְפָנֶיךָ, ה' צוּרִי וְגוֹאֲלִי, אָמֵן כֵּן יְהִי רָצוֹן".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת בלק, י' תמוז, שנת תשפ"ד לפרט קטן

לכבוד מיין טייערער ... נרו יאיר

זיי מחזק דיין ווייב, ענק וועלן האבן א שיינע שטוב מיט קינדער, טו די סגולה פון דאנקען דעם אייבערשטן; דו מיט דיין ווייב זאלן יעדן טאג דאנקען דעם אייבערשטן פאר די קינדער וואס ענק האבן, ליכטיגע געזונטע קינדער; דאס עפנט די הימל פאר ישועות און פאר נאך קינדער.

נאך א סגולה פאר קינדער; ענק זאלן זיך ליב האבן, ענק זאלן זיך נישט וויי טון, נאר זיך געבן גוטע ווערטער; דאס איז א סגולה פאר קינדער. דער רבי זאגט (ספר המידות אות בנים, סימן כב): "מַה יַּעֲשֶׂה אָדָם וְיִהְיֶה לוֹ בָּנִים", וואס זאל א מענטש טון צו האבן קינדער? וכו', "וִישַׂמַּח אֶת אִשְׁתּוֹ", ער זאל פרייליך מאכן זיין ווייב.

זיי מחזק זיין ווייב זאל מחזק זיין די צעבראכענע און צעקלאפטע ווייבלעך פון אנשי שלומינו, וסימנך: די וואס טוען זיך אן נישט איידל, זיי דארפן די מערסטע גוטע ווערטער וכו' וכו'.

בעזרת ה' יתברך - יום ג' פרשת חקת, ג' תמוז, שנת תשפ"ד לפרט קטן

לכבוד מיין טייערער ... נרו יאיר, קרית ברסלב

איך בין אזוי פרייליך דיך צו זען ביי די שיעורים, ווי דו קומסט זיך מחי' זיין מיטן בעטלער'ס ברויט און וואסער, מיטן בעטלער'ס חיים טובים (עיין ספורי מעשיות, מעשה יג).

איך בעט יעדן טאג פאר דיר און דיין ווייב ענק זאלן זוכה זיין צו זרע של קיימא, דער אייבערשטער זאל העלפן ענק זאלן מיר שנעל קענען דערציילן די גוטע נייעס.

וואו האלט די 'לוח ברסלב' לשנת תשפ"ה? איך בעט דיר זייער, זאלסט זיך צואיילן, ווייל די מפיצים זאגן, פון מוצאי ט' באב דארפן שוין מענטשן די לוח פאר די קומענדיגע יאר.

בעזרת ה' יתברך - יום ב' פרשת חקת, ב' תמוז, שנת תשפ"ד לפרט קטן

מרת ... תחי'

איך האב ערהאלטן אייער בריוו.

בנוגע די נאמען וכו'; יעצט איז נאך פרי צו אפמאכן וועגן א נאמען. עס שטייט פון צדיקים (שער הגלגולים, הקדמה כג; ועוד); ווען מען געבוירט א קינד קומט א בחינה פון רוח הקודש פאר די עלטערן וואס פאר א נאמען צו געבן, אם ירצה ה' ווען איר וועט האבן דאס קינד וועלן מיר מיטן אייבערשטנ'ס הילף רעדן וואס פאר א נאמען צו געבן.

ביז דערווייל זאלט איר נאר דאנקען און לויבן דעם אייבערשטן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת חקת, ב' תמוז, שנת תשפ"ד לפרט קטן

לכבוד מיין טייערער ... נרו יאיר, קרית ברסלב

דער דאקטער האט ענק גוט אנגעשראקן אז ער זעט שלעכטע זאכן אין די בלוט פון דיין ווייב, און דאס גייט שאטן פארן קינד חס ושלום, און ענק זענען דערשראקן און פארלוירן, ענק בעטן א ברכה.

איך זאג דיר אזוי, אויב דו וועסט שלום מאכן מיט דיינע שכנים, דו וועסט זיי מער נישט פיינט האבן, דו וועסט זוכן שלום מיט זיי, דו מיט דיין ווייב וועלן נאר זוכן דאס גוטס ביי זיי – זאג איך דיר צו דו וועסט זען א נס; סיי דיין ווייב וועט זיין געזונט און שטארק, און סיי דאס קינד וועט זיין געזונט און שטארק.

קום מיר נישט זאגן אז דו ביסט גערעכט, איך ווייס דו ביסט גערעכט, און פון דעם רעדט מען יעצט; ווען דו און דיין ווייב זענען גערעכט, און די שכנים טוען אזוי און אזוי, זאלסטו נאר זען גוטס און זוכן שלום.

געדענק, א געשעפט איז א געשעפט.

בעזרת ה' יתברך - יום ב' פרשת חקת, ב' תמוז, שנת תשפ"ד לפרט קטן

לכבוד מיין טייערער ליבער ... נרו יאיר, קרית ברסלב

וויסן זאלסטו, די נאטור פון א פרוי איז זייער הייקל, ספעציעל אין די טעג וואס גייט אן הלכות וכו' – דארף מען זיין זייער פארזיכטיג, און אז די פרוי וויינט – דארף מען זיין קלוג דאס נישט נעמען צום הארצן, נאר אויסהערן מיט געדולד און רעדן שיינער הארציגע ווערטער, און מיט סבלנות אויסווארטן אז די פאר טעג זאלן אריבערגיין וכו'.

דאנק דעם אייבערשטן אויף די מתנה; האסט באקומען א וואוילע גוטע ווייב פון א חשוב'ע משפחה, זיי איר מכבד און זיי מכבד אירע עלטערן, און זארג נישט וועגן קינדער; דו וועסט זוכה זיין צו א שיינע משפחה, ערליכע דורות, און אז דיין ווייב וויינט, זי זארגט זיך וועגן קינדער, בפרט ווען מען זעט נאכאמאל אז מען האט נאכנישט קיין גוטע נייעס – זאלסטו איר אויסהערן, אויסרעדן און פרייליך מאכן.

קום אין שול מיט דרך ארץ, אנגעטון ווי עס פאסט צו דאווענען פארן מלך מלכי המלכים; וועסטו האבן בקרוב גוטע נייעס.

בעזרת ה' יתברך - יום ד' פרשת שלח, כ' סיון, שנת תשפ"ד לפרט קטן

מרת ... תחי'

איר האט א טייערע מאן, איר האט א מאן אן ערליכער איד, ער איז אזוי פרייליך מיט אייך, ער האט אייך אזוי ליב, ער זאגט מיר ער דארף אן עצה ווי אזוי ער קען אייך פרייליך מאכן; ער האט אויסגעפלאצט צו מיר אין א געוויין אז ער וויל איר זאלט זיין פרייליך וכו' וכו'.

בעט איך אייך, איר זאלט נישט אויפהערן דאנקען דעם אייבערשטן פאר די מתנה פון האבן א מאן אן ערליכער איד, און אים זייער שעצן, וועט פון ענק ארויסקומען קינדער צדיקים; ווייל ווען מאן און ווייב שעצן זיך און מען פירט זיך איידל - קומען קינדער צדיקים.

דער אייבערשטער זאל העלפן איר זאלט האבן הצלחה אין אלע ענינים.