בעזרת ה' יתברך
יום ג' פרשת מקץ, כ"ו כסליו, ב' דחנוכה, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
מען טאר נישט בארגן געלט פאר די שבת התוועדות, ניין און נאכאמאל ניין! נאר צו קומען קיין אומאן; מוהרא"ש זאגט, צו קומען קיין אומאן מעג מען בארגן געלט, אבער צו קומען צום שבת התוועדות - טאר מען נישט בארגן. אז דו האסט געלט און דו ווילסט קומען, דו שפירסט פאר וויכטיג צו קומען - קענסטו קומען, און אז דו האסט נישט קיין געלט - זאלסטו חס ושלום נישט בארגן קיין געלט.
עס איז די ערגסטע זאך צו בארגן געלט; האבן חובות איז די גרעסטע סכנה. דער הייליגער רבי זאגט (ספר המדות אות תשובה, סימן מו): "מִי שֶׁרוֹצֶה לָשׁוּב, יִזָּהֵר מִלִּהְיוֹת בַּעַל חוֹב", ווער עס וויל תשובה טון זאל זיך אכטונג געבן פון חובות; נאך זאגט דער רבי (שיחות הר"ן, סימן קכב): "מוּטָב שֶׁיִּהְיֶה בַּעַל חוֹב לְעַצְמוֹ מִלִּהְיוֹת בַּעַל חוֹב לַאֲחֵרִים", א מענטש זאל ענדערש זיין א בעל חוב פאר זיך אליין ווי צו זיין א בעל חוב פאר א צווייטן; דערפאר זאלסטו אכטונג געבן נישט צו בארגן קיין געלט, נאר אנדערש זאלסטו זיין שולדיג פאר זיך אליין. דאס הייסט, אויב דו דארפסט עפעס קויפן און דו האסט נישט קיין געלט, זאלסטו ענדערש זיין שולדיג פאר דיר אליין און עס נישט קויפן, ווי צו בארגן און זיין א קנעכט פאר דעם פון וועם דו האסט געבארגט.
א ליכטיגן חנוכה.