בעזרת ה' יתברך - יום ב' פרשת ויחי, י"ג טבת, שנת תשפ"ד לפרט קטן
לכבוד מיין טייערער ... נרו יאיר
אז דיין גרויסער קינד נעמט די פינגער אין מויל – זאלסטו איר נישט טשעפען חס ושלום. קענסט בעטן דעם אייבערשטן אז דאס זאל אוועק גיין, אבער חס ושלום טשעפען, בפרט ווען דאס קינד אליינס שרייט: "איך וויל דאס נישט טון, איך פארגעס, איך כאפ נישט".
זיכער נישט קנס'ען, אוועק שיקן דאס קינד פון די שבת סעודה; מען קען חס ושלום פארלירן דאס קינד אינגאנצן. ענדערש זאלן די קינדער זיצן ביים טיש מיט די פינגער אין מויל און הערן נאכאמאל און נאכאמאל אז מען קען אלעס בעטן דעם אייבערשטן.
גרייט דיר אן א מעשה פון צדיקים פאר די סעודות שבת, דערצייל זיי די מעשה פון רבי ינאי (ירושלמי תרומות ח, ג), ער האט זייער מורא געהאט פון שלענג, ער האט געציטערט צו גיין שלאפן, ווייל אפשר וועט די שלאנג ארויפקריכן אויף זיין בעט, ער האט זיך געמאכט א פאטענט, ער האט אריינגעשטעלט די פיר פיס פונעם בעט אין פיר אמערס וואסער. איין נאכט וועקט ער זיך אויף מיט א שלאנג אין די הענט, האט ער געזאגט "עס העלפט נישט קיין פאטענטן, נאר איין זאך העלפט, תפילה, תפילה און נאכאמאל תפילה".
דערצייל זיי אזעלכע מעשיות, וועלן זיי אויסוואקסן ערליכער אידן.
שרייב מיר אויב דו ווערסט באליידיגט ווען איך זאג דיר הנהגות ווי זיך צו פירן, אויב דו ווערסט באליידיגט וועל איך דיר שרייבן נאר תורה און ענינים.