בעזרת ה' יתברך - יום ה' פרשת עקב, כ' מנחם-אב, שנת תשפ"ה לפרט קטן
מרת ... תחי'
בנוגע וכו'; יעדע מענטש האט א זאך וואס מען קען נישט טרעפן און געפינען ביי א צווייטן, דער רבי זאגט (לקוטי מוהר"ן חלק א', סימן לד): "כי יש בכל אחד מישראל דבר יקר מה שאין בחבירו", יעדער איד האט עפעס וואס א טייערע שיינע זאך וואס מען קען עס נישט טרעפן ביי זיין חבר; אזוי דארף מען קוקן אויף אנדערע און זיכער ווען עס קומט צו די אייגענע קינדער, עלטערן דארף וויסן יעדע קינד איז א וועלט פאר זיך, מען טאר נישט לייגן קינדער אויפן וואגשאל, ערווארטן פון א קינד זאל זיין אזוי ווי דער ברודער אדער שוועסטער, דאס איז זייער נישט ריכטיג; אויך קען דאס גורם זיין אז די קינד זאל ווערן צעקלאפט און נישט קענען וואקסן, ווען די קינד שפירט אז מען איז נישט צופרידן וכו'.
אלע אייערע קינדער זענען ליכטיג און טייער, יעדע קינד שיינט אויף זיין וועג, און אז מען וועט אזוי קוקן אויף זיי – וועלן זיי זיך עפענען ווי שיינע בלומען און מען וועט זען פון זיי נחת און פרייד.
ווען איר שיידט אפ חלה און ווען איר צינדט די שבת לעכט, און ווען וכו'; ביי די דריי מצוות איז א צייט וואס פרויען קענען פועל'ן גרויסע זאכן.