בעזרת ה' יתברך
יום ב' פרשת ויקהל, כ' אדר א', שנת תשפ"ב לפרט קטן
לכבוד מיין טייערער ... נרו יאיר
מוהרא"ש זכותו יגן עלינו ברענגט כמה וכמה פעמים אין ספר אשר בנחל אז לימוד משניות האט א סגולה מער פון אנדערע לימודים, עס ברענגט אריין אינעם מענטש א גלוסט צו לערנען נאך און נאך תורה. ווען מען לערנט פלייסיג משניות, נאך א שטיק צייט הויבט אן קאכן אינעם מענטש א קאך צו לערנען נאך תורה, מען הויבט אן גלוסטן און בענקען צו די תורה.
איך ווייס אז דו לערנסט לעצטנס אסאך משניות, דו לערנסט אויפ'ן רבינ'ס דרך הלימוד (כמבואר בשיחות הר"ן, סימן עו), דו ביסט גורס פרקים משניות; זאלסטו וויסן, זיי גרייט אז עס גייט איין טאג פלאצן די באמבע, דו גייסט ווערן פלוצלונג הונגעריג פאר די תורה, דו וועסט זיך זען מיט שיעורים אויף שיעורים בכל התורה כולה.
אשרינו מה טוב חלקינו אז מיר זענען מקורב צו א רבי וואס ברענגט אונז צו די הייליגע זאכן מיט אזעלכע גרינגע זיסע און געשמאקע וועגן.