בעזרת ה' יתברך - ה' פרשת ויקרא, י"א אדר ב', שנת תשפ"ד לפרט קטן
מרת ... תחי'
אייער מאן וויינט צו מיר אז עס איז אים ביטער שווער, עס איז אים ערגער פון אלס בחור, ער קען נישט לעבן אפגעשיידט, עס גייען אריבער וואכן און חדשים וואס מען לעבט נישט אינאיינעם, ער וויינט צו מיר, ער בעט מיר הילף; איך ווייס נישט וואס צו טון, איך ווייס אים נישט וואס צו זאגן.
בעט איך אייך זייער, איך האב זיך אוועק געגעבן צו מאכן ענקער שידוך, איך האב געהאט נאר בזיונות און איך לייד נאכאלץ פון דעם; איז כאטשיג זאל איך זען נחת, ווי איר לעבט כדרך התורה, אזוי ווי דער אייבערשטער זאגט.
וואויל איז דעם מענטש וואס טוט דעם אייבערשטנ'ס ווילן, ער איז מקיים וואס שטייט (דברים ו, ה): "וְאָהַבְתָּ אֵת ה' אֱלֹקֶיךָ בְּכָל לְבָבְךָ וּבְכָל נַפְשְׁךָ וּבְכָל מְאֹדֶךָ", ער געבט אלעס אוועק פון זיך פארן אייבערשטן.