בעזרת ה' יתברך
יום ד' פרשת בשלח, י' שבט, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
איך פריי זיך זייער צו הערן אז דו שטארקסט זיך מיט די עצות פון הייליגן רבי'ן; סיי דו לערנסט די הייליגע תורה און סיי דו ביסט זיך מתבודד, דו רעדסט צום אייבערשטן.
איך וויל דיר זייער בעטן זאלסט לערנען יעדן טאג לכל הפחות א בלאט גמרא. מיר הייבן אן די וואך פרייטאג א נייע מסכתא, מסכת מועד קטן; כאפ זיך מיט, לערן יעדן טאג א בלאט גמרא. דער הייליגער רבי זאגט (לקוטי מוהר"ן חלק א', סימן ריד): "'תַּלְמוּד' בְּגִימַטְרִיָּא אוֹתִיּוֹת שֶׁל שְׁמָהּ 'לִילִית', עַל כֵּן יֵשׁ כֹּחַ בְּלִמּוּד הַתַּלְמוּד לְהַכְנִיעַ אוֹתָהּ", 'תלמוד' באטרעפט די זעלבע מספר ווי די נאמען פון די קליפה וואס מאכט א מענטש זינדיגן אין פגם הברית; און ווען מען לערנט גמרא איז מען מכניע די קליפה, דערפאר האט דער סמ"ך מ"ם זייער מורא פון א דף גמרא; אלעס וועט ער לאזן דעם מענטש זאל טון, אבי נישט עפענען א גמרא.
זיי זיך נישט מבלבל אז דו פארשטייסט נישט וואס דו לערנסט, פאלג דעם רבי'ן, זאג די ווערטער פון די גמרא. דער רבי האט אונז געזאגט (שיחות הר"ן, סימן עו): "שֶׁאֵין צְרִיכִין בְּלִמּוּד רַק הָאֲמִירָה לְבַד, לוֹמַר הַדְּבָרִים כְּסֵדֶר, וּמִמֵּילָא יָבִין", מען דארף נישט פארשטיין ווען מען לערנט, מען דארף נאר לערנען און זאגן די ווערטער פון די הייליגע תורה; מען דארף נישט גלייך פארשטיין, און במשך די צייט וועט מען זוכה זיין צו פארשטיין.
איך בענק זיך אויך זייער צו דיר, איך האף בקרוב זיך נאכאמאל צו זען מיט דיר.
דער אייבערשטער זאל העלפן זאלסט האבן הצלחה אין אלע ענינים.