בעזרת ה' יתברך - יום ג' פרשת יתרו, ט"ז שבט, שנת תשפ"ו לפרט קטן
... נרו יאיר, קרית יואל
זע צו לערנען שיעורים אין מקרא, משנה, גמרא, הלכה ואגדה, אזוי וועסטו ליב האבן צו זיין א איד, דו וועסט ליב האבן אידישקייט, דו וועסט ליב האבן די בארד און פאות, וועסט ליב האבן דיין ווייב'ס צניעות, און אזוי ווייטער; ווייל דער הייליגער רבי זאגט (לקוטי מוהר"ן חלק א, סימן א): "עַל יְדֵי הַתּוֹרָה נִתְעַלֶּה הַחֵן וְהַחֲשִׁיבוּת שֶׁל יִשְׂרָאֵל", אז מען לערנט תורה קומט צוריק די חן צו די אידן, דאס איז ביים מענטש אליין, אז מען זעט אז מען האט ליב חס ושלום די וועג פון די פעלקער השם ישמרינו, "וְהַחֵן הוּא אֶצְלָם", די חן איז ביי זיי, מען האט ליב די וועג ווי אזוי די גוים גייען אנגעטון, מען האט ליב אן אפגעשוירענעם בארד, און פריצות רחמנא לצלן, געבט דער רבי אן עצה, צו לערנען תורה.
זאג יעדן טאג משניות און זאג תהלים, און וואש אפ דיין פנים מיט דיינע טרערן מיט תפילות והתבודדות צום אייבערשטן, בעט אים: "הייליגער באשעפער העלף, איך וויל זיין אן ערליכער איד, נאר ליב האבן די תורה און די צדיקים און גיין אין זייערע וועגן".
קום צו די שיעורים דאנערשטאג נאכט און זע אז דיין ווייב זאל גיין צו די פרויען שיעורים, עס איז אזוי וויכטיג, עס איז די יסוד פון אלעס.